كارگەهێن ئاسنی زێدەتری 10 هزار دەلیڤەیێن كاری بەردەست كرینە
سولین سلێمان
رێڤەبەرێ گشتیێ وەبەرهێنانا هەولێرێ بۆ رۆژناما ئەڤرۆ دیار كر، هەرێما كوردستانێ و كابینەیا نەهێ یا حوكمەتا هەرێما كوردستانێ گرنگیەكا تایبەت ب كەرتێ پیشەسازیێ دایە، نۆكە مە ب چەندەها مۆلەتێن شیش ئاسنا داینە خودان كارگەهان، ئەڤ چەندە ژی ل دووڤ پلانێن وەزارەتا پیشەسازی هاتیە دانان كۆ ب هزاران دەلیڤێن كاری ژ بۆ وەلاتیان دابین كرینە.
سامان عەرەب رێڤەبەرێ گشتیێ وەبەرهێنانا هەولێرێ بۆ رۆژناما ئەڤرۆ گۆت ”هەر چەندە هەژمارا كارگەهێن شیش ئاسنی ل كوردستانێ زێدەبووینە، لێ هاوردەكرنا ئاسنی ژ دەرڤەی وەلاتی یا بەردەوامە، مە چەند جاران ژی داخواز كریە هاوردەكرنا وان بهێتە راگرتن، دا كو كارگەهێن ناڤخۆ پتر بشێن كاربكەن، ب خۆشحالیڤە ل هندەك پشكان وەزارەتا دارایی و وەزارەتا پیشەسازیێ هاریكاریا مە كرینە، ئانكۆ ب هەموو شێوازەكان ئەم پشتەڤانیا یێن ناڤخۆیی دكەین.
گۆت ژی ”ژ لایەكێ دیڤە مە هاریكاریا خودان كارگەهان كرینە د كرێیا كارەبێ یا باجێ دا كو ئەڤ كارگەهە بەردەوام بن د پرۆسەیا وەبەرهێنانێ دا».
هۆگر رابەر خودانێ ئێك ژ كارگەهێن وەبەرهێنانا ئاسنیە ل هەولێرێ بۆ رۆژناما ئەڤرۆ گۆت ”ل كارگەها مە ب هزاران كارمەند هەنە و پتریا وان ژ سەدێ 50 ناڤخۆیینە. گۆت ژی “ئەم رۆژانە هزار تەنێن شیش ئاسنی بەرهەم دئینین كۆ ساڵانە دبیتە ٣٦٠ هزار تەن و ب كوالێتیا ساندارتا جیهانی كۆ پتریا پێدڤیێن ناڤخۆ ب زێدەڤە پردكەن، لێ ئەم دخوازین حوكمەت پتر پشتەڤانیا كارگەهێن خومالی بكەت، دا كو پتر بشێن وەبەرهێنانێ بكەن ب تایبەت ژی كێمكرنا كریا كارەبێ و باجێ، دیسا ژی قەدەغەكرنا هاوردەیا شیشئاسنا ل بەرهەمێن دەرەكی ل دەرڤەی وەلاتی.
د. محەمەد شوكری سەرۆكێ دەستەیا وەبەرهێنانێ بۆ رۆژناما ئەڤرۆ گۆت ”ب هەموو شێوازان ئەم پشتەڤانیا خودان كارگەهێن شیش ئاسنێ ناڤخۆ دكەین، چونكی كوالێتیا بەرهەمێن وان گەلەك د بلندن و زێدەتری 10 هزار دەلیڤێن كاری ژ بۆ وەلاتیێن هەرێما كوردستانێ دابینكرینە، هیڤیدارین هاوردەكرنا وان ژ دەرڤە بهێتە راوەستاندن، چونكو ڤێ چەندێ مفا ژ بۆ هەموو لایەكی هەیە.
