كارگەهەكا دابینكرنا غازێ ل ناوچەداریا دینارتە هاتە ڤەكرن
ئاكرێ، سەباح زوهێر:
سەربەست سەبری، رێڤەبەرێ ناوچەداریا دینارتە بۆ رۆژناما ئەڤرۆ دیار كر، پڕۆژەیێ كارگەها غازێ ل ناوچەداریا دینارتێ تەمامبوویە، كو ئێك ژ پڕۆژەیێن گرنگە ل ناوچەداریا دینارتێ، نوكە غاز د ناڤ كارگەهێ دا بەردەستە و وەلاتیێن ڤێ دەڤەرێ دشێن غازێ ب دەستخوەڤە بینن چ ب رێكا بریكاران یان ژی ب رێكێن تایبەت و پێدڤی ناكەت ئێدی وەلاتی قەستا ئاكرێ بكەن.
رێڤەبەرێ ناوچەداریا دینارتە ئاماژە دا وێ چەندێ ژی كو دەمەكێ درێژە خەلكێ ڤێ دەڤەرێ ئاریشەیا كێمبوونا غازێ هەی، ژ بەركو چو كارگەه ل دەڤەرێ نەبوون و كارگەها غازێ ل ئاكرێ ژی یا دوور بوو، لێ نها ئەڤ ئاریشە هاتە چارەكرن و خەلكێ ڤێ دەڤەرێ پێدڤی چو جهێن دی نابیت و گۆت: «ئاریشەیا وان هاتە چارەسەركرن و پتری 60 گوندان و سەنتەرێ ناوچەداریێ دێ مفای ژ ڤێ كارگەهێ بینن».
