كارگەهەكا لێكدانا ترۆمبێلان دێ هێتە ڤەكرن
ئەڤرۆ
هەولێر، قائید میرۆ:
بڕیارە كارگەهەكا لێكدانا تڕۆمبێلان ل هەرێما كوردستانێ بهێتە دامەزراندن و پەیڤدارێ دەستەیا وەبەرهێنانێ ژی دبێژیت: ئەرد بۆ كارگەهێ دێ هێتە دابینكرن و دێ مفایەكێ زۆر بۆ هەرێما كوردستانێ هەبیت.
بەرگەشت ئاكرەیی، پەیڤدارێ دەستەیا گشتیا وەبەرهێنانێ بۆ رۆژناما ئەڤرۆ دیار كر، پشتی هاتنا كۆمپانیێن ئەلمانی بۆ هەرێما كوردستانێ داخوازكریە كارگەهەكا تایبەت ب تڕۆمبێلان ل هەرێما كوردستانێ بهێتە ڤەكرن و گۆت: «كارێ ئەڤێ كارگەهێ دێ لێكدانا تڕۆمبێلان بیت، دەستەیا وەبەرهێنانێ یا رازیە ب ڤەكرنا ئەڤێ كارگەهێ ژ لایێ ئەلمانیاڤە، ئەرد بۆ كارگەهێ دێ هێتە دابینكرن و هەموو هاریكاری و ئاسانكاری ژی بۆ دامەزراندنا ئەڤێ كارگەهێ ژ لایێ حوكمەتا هەرێما كوردستانێ ڤە دێ هێنە كرن».
بەرگەشت ئاكرەیی گۆتژی: «بڕیارە ئەو ژی پێداچوونێ بكەن و بەرسڤا وەرەهێنانێ بدەن بۆ دامەزراندنا كارگەهەكا گرێدانا ترۆمبێلان، بەری نوكە ل بەسرا ئەو پێنگاڤ هاتیە هاڤێتن و تڕۆمبێلێن بیجۆ ل پارێزگەها بەسرا پێكڤە هاتینە گرێدان، ل هەرێما كوردستانێ ژی هەمان كار دێ هێتە كرن، پارچەیێن تڕۆمبێلان ل دەرڤە دێ ئیننە د ناڤ هەرێما كوردستانێ دا و ژ لایێ ئەڤێ كارگەهێ دێ هێنە پێكڤە گرێدان و كەنە تڕۆمبێل و بدەنە بازاڕی، بێگومان دێ مفایەكێ زۆر بۆ هەرێما كوردستانێ هەبیت».
