كارینێ و دلینێ جهێ خوە د ناڤ هەلبژارتیێ ئیراقێ دا پاراست
ب فەرمی هەردو خویشكێن ئێك و كچێن پارێزگەها دهۆكێ كارین و دلین كەمال جەلالەدین جهێ خوە د ناڤ رێزێن هەلبژارتیێ ئیراقێ بۆ یارییا شەترەنجێ پاراست، پشتی د هەڤڕكیێن قارەمانییا ئیراقێ یا قۆناغا دویێ و دووماهیێ دا بۆ باشترین یاریزانان رێزێن چارێ و هەشتێ ل سەر ئاستێ گشتی ب دەستڤە ئیناین، ئەوا یاریێن وێ هەولێرا پایتەخت مێڤاندارییا وێ كرین و هەڤڕكیێن قارەمانیێ ل دووڤ سیستەمێ سویسری 11 گەڕان دهاتە ئەنجامدان.
د ئەنجامێ دووماهیێ دا كارین كەمال جەلالەدین شیا رێزا چارێ بهێت ب كۆمكرنا شەش خالان و كێمتر ژ قارەمانا ناسناڤی دلپاك ئیسماعیل ئەوا ل شەش خال و نیڤ كۆمكرین و هەردو رێزێن دویێ و سێیێ خال هندی ئێك بوون بتنێ جوداهییا خولەكان بوو و جهێ خوە دناڤ پێكهاتیێ سەرەكی یێ هەلبژارتیێ ئیراقێ پاراست، ژلایێ خوەڤە خویشكا وێ دلین كەمال رێزا هەشتێ هات ب كۆمكرنا سێ خالان وەكو یاریزانا یەدەك دناڤ رێزین هەلبژارتیێ ئیراقێ دا جهێ خوە پاراست.
ل دۆر ڤان ئەنجامان دلین كەمال كچا دهۆكێ د داخویانیەكێ دا بۆ رۆژنامەیا ئەڤرۆ گۆت: من دەستپێكێ ئاماژە پێ دابوو كو ئەركێ من ب سانەهی نابیت، ژبەركو جوداهییا بەرهەڤیێن مە دگەل ستێرێن دی یێن ئیراقێ، لێ ئەم رژد بووین و مە جهێ خوە وەكو یاریزانا یەدەك دناڤ رێزێن هەلبژارتیێ ئیراقێ دا پاراست، ئەڤە پێنگاڤا ئێكێ یە و گەشبینم بۆ داهاتی دێ باشتر بیت.، هەرچەندە ئەم 11 باشترین یاریزان ماینە و دێ شەڕی بۆ ناڤ رێزێن هەلبژارتیێ ئیراقێ كەین، پێدڤی ب پێنچ سەركەفتنامە هەتا بگەهمە ئارمانجا خوە.
هەروەسان دلین كەمال گۆت: من دەلیڤەیا پشكداریێ بۆ قارەمانیێن دەڤەر یێن هەین تایبەت یێن نێڤدەولەتی و عەرەبی، پێخوەشحالم پشتی ڤەقەتیانەكا درێژ ڤەگەڕیایم.
