كاری ل سەر هەمی وارێن باشتركرنا ژین و ژیارا خەلكێ كوردستانێ دێ كەم
سالار محەمەد دۆسكی:
هێلین شەوكەت یونس دەحلێنەوی مزیری، بەربژارا هەژمارە (47) لیستا (190) یا پارتی دیموكراتی كوردستان، د دیدارەكێ دا بۆ ئەڤرۆ گۆت: پشتی تیرۆستێن داعشێ شەڕێ سەپاندی ل گەل هەرێما كوردستانێ راگەهاندی وی دەمی ئەم ل هۆلەندا بووین و بابێ من بڕیار دا بهێتە كوردستانێ و جارەكا دی چەكێ شەرەفێ ب هەلگریت و ل گەل برایێن خوە یێن پێشمەرگە بچیتە بەرۆكێن شەرێ دژی داعشێ و دژی دوژمنی ب چەنگیت، د شەڕێ دژی تیرۆرستێن داعشێ دا باب و مامێن من هاتنە شەهیدكرن، ل دووڤ پێشنیارا لقێ ئێكێ خەباتكەر و ب شانازی ڤە من خوە بەربژار كریە و سوپاسیا وان ژی دكەم ژ بۆ ڤێ باوەریا ب من هاتیە دان من ژی حەزا خوە بەربژاركرنێ هەبوو وەكو بسپۆرەك د وارێ ژینگەهێ دا داكو بشێم بەردەوامیێ بدەمە خەبات و رێبازا باب و مالبتا خوە .
هێلین خانێ گۆت ژی: ژینگەها پارێزگەها دهۆكێ ل ئەڤێ قوناغێ و ل دووڤ ستاندارتێن جیهانی گرنگە ل پارێزگەها دهۆكێ گرنگی ب كەسكاتی و چاندنا داران بهێتەدان و ئەو پارزینگەهێن نەقانوونی و موەلیدەیێن كارەبێ بهێنە راكرن، چونكو ئەڤە ئەگەرەكێ سەرەكی نە بۆ پیسركرنا ژینگەها پارێزگەهێ، پارێزگەها دهۆكێ گەلەك جهێن گەشتیاری هەنە و پێدڤی یە زێدەتر گرنگی پێ بهێتە دان، دیسا پێدڤی یە حوكمەتا هەرێما كوردستانێ گرنگیێ ب دەتە دروستكرنا كارەبێ ژ رۆژێ، هەەكە چوومە پەرلەمانی دێ كار ل سەر هەمی پرۆگرامێن باشتركرنا ژین و ژیارا خەلكێ كوردستانێ كەم، دێ هەمی بزاڤێن من ئەو بن ژینگەها دەڤەرا مە پاقژتر لێ بهێت.
زێدەتر گۆت: بهێزبوونا پارتی دیموكراتی كوردستان ب هێزبوونا كوردستانێ و مانا قەوارەیێ هەرێما كوردستانێ ب دەستڤەئینانا مافێن خەلكێ كوردستانێ و پشتی پرۆسەیا ئازادكرنا ئیراقێ د هەمی قوناغان دا پارتی سازش ژ مافێن گەلێ خوە نەكریە، ژ نڤیسینا دەستورێ ئیراقێ و هەتا ئەڤرۆ ژ بەر كو سەرۆك مەسعود بارزانی یێ هەمی خەلكێ كوردستانێ یە و هەمی قەردارێن سەرۆك بارزانی و رێبازا پیرۆزا پارتی و بابێ رۆحی مەلا مستەفا بارزانی نە.
