كارێ دەستی بوویە داهاتیەك بۆ ژیانا وێ
دلڤین رەشید:
جیهان حەجی بەرەكات، د دیدارەكێ دا بۆ رۆژناما ئەڤرۆ دیاركر كو ئەو خەلكا گوندێ بۆرگە سەر ب قەزا شنگال ڤە، ژ ئەگەرێ نەخۆشیەكی نەشیایە خۆندنا خوە تەمام بكەت، پشتی داعش ب سەر شنگالێ دا گرتی و دگەل خێزانا خوە ئاوەرەی هەرێماكوردستانێ بووی و ل كەمبا خانكێ ئاكنجی بووی، ل وی دەمی گەلەك رێكخراو هاتن ژبۆ هاریكاریكرنا خەلكێ ئاوەرە، وێ ژی ب دەرڤەت زانی خوە فێری كارێ دەستی بكەت.
ناڤهاتیێ گۆت: راستە ئەم تووشی جینۆسایدەكا مەزن بووین و قوربانیێن ئێكی تێدا ژننێن ئێزدی بوون، بەلێ ئەڤ چەند نەبوویە رێگر كو ئەم دەستان ژ ژیانا خوە بەردەین، بەلكو بەرۆڤاژی هەر ژنەكا ئێزدی ب رێكەكێ بەرسڤا دۆژمنی دا، ئەڤە ژی هێز و ئیرادا ژنا ئێزدی دیار دكەت، كو د دیرۆكێ دا ئەم تووشی گەلەگ فەرمانان بووینە بەلی ژیان یا بەردەوامە و دی د بەردەوام بین و ژبلی كو نوكە ژیانا من ل سەر كارێ دەستی یە، دهەمان دەم دا من خۆ فێری زمانێ ئێنگلیزی ژی كریە ژبۆ هندی كو دەلیڤەێین كاری یێن باشتر پەیدا بكەم، لەورا داخوازێ ژ هەر ژنەكێ دكەم كاری ژبۆ ئارمانجێن خوە بكەن، چنكو ژیان یا بەردەوامە.
