كارێ راگەهاندنێ بوو ئەگەر كو پترحەز ژ جیهانا زارۆكان بكەت
دلڤین رەشید:
مەدیاكار (رەیان زیاد حسنی) د دیدارەكێ دا بۆ رۆژنامەیا ئەڤرۆ دیاركر كو زێدەباری كارێ راگەهاندنێ ئەو حەزژ كارێ دۆبلاژێ و وێنەگری و مۆنتاژ و ئەكتەریێ ژی دكەت و هیڤیا وی ئەوە ب وێ رێكێ بشێت خزمەتا وەلاتێ خۆ بكەت.
ناڤهاتی گۆت: كارێ راگەهاندنێ ئێك ژ حەزێن من یێن زارۆكینی بوو، هەر دژیێ هەشت سالیێ دا من زارڤەكرنا مەدیاكاران دكر و مالباتا من بوونە پشتەڤان كو ئەز بەرەف خەونێن خۆڤە بچم، ئەو بوو من ژ بەرنامەیێ زارۆكان ل كەنالێ دهۆك تیڤی وەك پێشكێشكار دەستپێكر و هەتا نوكە ژی یێ بەردەوامم و كارێ راگەهاندنێ بوو ئەگەر كو ئەز گەلەك كەسان بنیاسم، هەروەسا پتر حەزژ جیهانا زارۆكان بكەم، لێ پشتی هاتنا سۆسیال مەدیایێ و زێدەبوونا كەنالێن راگەهاندنێ هەتا ڕادەیەكی رەوش ئالۆزبوویە، چنكو گەلەك جاران هندەك بابەت بەلاڤ دبن ناڤەرۆكا وان یا دۆرە ژ ڕاستیێ، لەورا داخوازێ بینەر و گوهدارێن خۆشتڤی دكەین پتر گوهداری و بینەریا كەنالێن باوەرپێكری بكەن، چنكو ئەو دێ هەردەم یا راست بۆ هەوە بێژن.
