كارێ هونەری ژن و زەلامان نانیاسیت
عەزیز هە‌ورامی:
دەرهێنەر (ناجی سەلیمی) كوخەلكا رۆژهەلاتێ كوردستانێ یە، د دیدارەكێ دا بۆ رۆژنامەیا ئەڤرۆ گۆت: ب دیتنا من نوكە ئاستێ هونەرێ كوردی ب شێوەیەكێ گشتی یێ باشە، چنكو فلمێن كوردی ل گەلەك فەستیڤالێن جیهانی پشكداردبن و خەلاتان ب دەستڤە دئینن.
هەروەسا گۆت: ژبلی دەرهێنانا فلمێن سینەمای من دەستێ نڤیسینێ ژی هەیە و دەقێن چەندین فلمان نڤیسینە، هەروەسا پەیوەندیێن من ل گەل فلمساز و سینەماكارێن هەرچوار پارچەیێن كوردستانێ دباشن، ب تایبەت ژی یێن هەرێما كوردستانێ، بۆ زانین من حەفت كورتە فلم هەنە، هەموو ژی ژ نڤیسینا منن، ناڤەرۆكا وان گرێدای ژین و ژیار هەروەسا ئاریشەیێن جڤاكێ مەنە، گەلەك هزران ژ ئەندامێن مالێ وەردگرم و دكەمە سیناریۆ و كورتە فلم، من پشكداری د هژمارەكا فەستیڤالان دا كریە و فلمێن من خەلات وەرگرتینە، ژوانا خەلاتێ باشترین دەرهێنەر، هەروەسا خەلاتێ باشترین نڤیسەرا كورتە فلمان و حۆشحالم وەك ژنەك كارێ سینەمایی دكەم، هەر چەندە كارێ سینەمایی بۆ ژنان ب زەحمەترە ژ زەلامان، بەلێ هەردەم ئەز دبێژم كارێ هونەری ژن و زەلامان نانیاسیت.
