كارەبا رۆناكـی یا حوكمەتێ یە نەیا كۆمپانیان
نیوار محەمەد سەلیم:
وەزیرێ كارەبێ و سامانێن سروشتی ب وەكالەت ڕاگەهاند، كابینەیا نەهێ یا حوكمەتا هەرێما كوردستانێ پێنگاڤێن مەزن بۆ چارەسەركرنا كێشەیا كارەبێ هاڤێتینە و نوكە زێدەتر ژ 85%ێ ژ وەلاتیان ل سەرانسەری هەرێمێ كارەبا 24 دەمژمێری هەیە.
كەمال محەمەد، وەزیرێ كارەبێ، د كۆنگرەكێ ڕۆژنامەڤانی دا ل دهۆكێ دیار كر، پڕۆژەیێ نووژەنكرن و دابینكرنا كارەبا 24 دەمژمێری ب تەمامی ژ لایێ وەزارەتا كارەبێ ڤە دهێتە بڕێڤەبرن و چو كۆمپانیەكا كەرتی تایبەت تێدا نینە و گۆت: «ئەڤە پڕۆژەیێ حوكمەتێ یە و هەمی داهات و سەرپەرشتی ژ لایێ وەزارەتێ ڤە دهێتە كرن».
دەربارەی كێشەیێن ڤێ دووماهیێ یێن كارەبێ ل پارێزگەها دهۆكێ، وەزیری گۆت: «هێرشێن ل سەر زەڤیا غازا كۆرمۆر و ئالۆزیێن دەڤەرێ كاریگەری ل سەر كێمبوونا بەرهەمێ غازێ هەبوویە، ئەڤە ژی بوویە ئەگەرێ كێمبوونا دەمژمێرێن كارەبێ ل هندەك دەڤەران، لێ ب هەماهنگی ل گەل ئیدارەیا پارێزگەهێ بزاڤ دهێنە كرن ئەڤ كێشە بهێتە چارەسەركرن».
وەزیرێ كارەبێ خویا ژی كر، سیستەمێ «ئی – پەسۆلە بۆ ب ساناهیكرنا كارێ وەلاتیان و كێمكرنا خەلەتیێن تۆماركرنا كارەبێ هاتیە دانان، دا كو وەلاتی ب شێوەیەكێ ئەلیكترۆنی ئاگەهداری مەزاختیێن خوە بن و ب ساناهی پارەی بدەن و گۆت: «دەرگەهێ مە بۆ هەر سكالا و گازندەیەكا وەلاتیان یێ ڤەكریە و لیژنێن دویڤچوونێ د بەردەوامن بۆ چارەسەركرنا هەر كێشەیەكا تەكنیكی یان كارگێڕی، كو دابینكرنا كارەبێ ژ كار بێخیت».
ل دووماهیێ ژی دا دیاركرن كو رێڤەبەرێ گشتی یێ كارەبا پارێزگەها دهۆكێ هاتە گوهۆڕین.
