كارەبا مێڤانا زاخۆیە و هەولێر ل بەغدا د ئەركەكێ بزەحمەت دایە
عەلی حاجی:
چاڤەڕێ دهێتە كرن ئەڤرۆ ب ئەنجامدانا چار یارییان هەڤڕكیێن گەڕا 14ێ یا خولا ستێرێن ئیراقێ یا فوتبۆلێ ل یاریگەهێن جودا بهێنە ئەنجامدان، یانەیێن زاخۆ و هەولێر دێ بەرانبەر نوونەرێن پایتەختێ ئیراقێ بەغدا بن.
تەلال ئەلبلۆشی گەشبینە تیما وی بەردەوامیێ بدەتە ئەنجامێن سەركەفتی
جەماوەرێ وەرزشی یێ یانەیا زاخۆ ئەڤرۆ ل دەمژمێر پێنجێ ئێڤاری ب ژڤانن بۆ پشتەڤانی و دیتنا یارییا تیما وان ل یاریگەها زاخۆ یا نێڤدەولەتی بەرانبەر تیما یانەیا كارەبا یا بەغدایی د یارییەكا گرنگ دا بۆ كوڕێن خابووری ئەوێن دێ بزاڤێ كەت ب سەركەفتن بەردەوامیێ ب دەنە رێزبەندییا خوە یا پێشیێ و نەهێلێن یانەیێن د ڕێزبەندیێن كێمتر دا جهێ وێ ژێ وەربگریت، زاخۆ ل رێزا سێیێ دهێت ژ حەفت سەركەفتن، چار وەكهەڤی و بتنێ دو خوسارەتی هەنە، دبەرانبەر دا یانەیا كارەبا 15 خال هەنە ل ڕێزا 13ێ دهێت، ڕاهێنەرێ تیما زاخۆ یێ قەتەری تەلال ئەلبلۆشی گەشبینە ل سەر تۆماركرنا ئەنجامێن سەركەفتی و مانا خوە د ڕێزبەندیێن پێشیێ دا.
چەكێ زاخۆ جەماوەرێ وێ یە
دهێتە زانین ئێك ژ مەزنترین پشتەڤان ل سەر ئاستێ ئیراقێ یێ یانەیا زاخۆ یە كو دهندەك یارییان دا هژمارەیا پشتەڤانان دگەهیتە 30 هزار كەسان و زێدەتر، نە بتنێ ل یاریگەها زاخۆ پشتەڤانیێ دكەن بەلكۆ د وەرزێ ئەڤ سالە دا پرانییا یارییان هژمارەكا زوور دگەل تیما خوە شاند كرییە بۆ دەڤەرێن دی یێن ئیراقێ، بۆ یارییا ئەڤرۆ دهێتە پێشبینیكرن رێژەیەكا ئێكجار زوور بەرهەڤن و ب چالاكیێن جودا دەستەیا پشتەڤانان كارێن جوان ئەنجامبدەن.
سەرپەرشتێ تیما زاخۆ گەشبینە
ل دۆر دووماهی بەرهەڤیێن كوڕێن خابووری حەمید سەرپەرشتێ تیمێ بۆ رۆژنامەیا ئەڤرۆ دیار كر بەرهەڤیێن وان گەهشتینە ئاستەكێ باش و پلانێن هەر یارییەكێ جوداهییا خوە یاهەیی ل دووڤ ئەو یانەیا یاری دگەل دهێتە كرن، هەموو یاریزان بەرهەڤن و رژدن بۆ سەركەفتنێ و گۆت: ئەم ڕێزێ ل هەر تیمەكێ دگرین و یارییا ئەڤرۆ وەكو یا دووماهیێ ئەم ڕەڤتارێ دگەل دگەین، گەشبینن دگەل پشتەڤانییا جەماوەرێ خوە سەركەفتنێ بینن.
دیدارێن ئاگرین دناڤبەرا زاخۆ و كارەبا
ل دووڤ ئامارێن ئەنجامێن یارییان دناڤبەرا هەردو یانەیان دا، 24 یاریان هەمبەری ئێك بووینە، ئێكەم یارییا وان ل هەشتێ نیسانا سالا 2010ێ بوو ل بەغدا ژ خولا پلا نایابا ئیراقێ ئەوا بێ گۆل وەكهەڤبووین، دووماهی یاری ل وەرزێ بۆری ل 25ێ نیسانا سالا 2024ێ ل پایتەختێ ئیراقێ بەغدا بوو، كوڕێن خابووری شیابوون ب 3-1 گۆلان سەركەفتنێ بینن، سەرجەمێ گشتی یانەیا زاخۆ هەردو تیما نەهـ سەركەفتن ل سەر ئێكودو ئیناینە و شەش وەكهەڤی ژی هاتینە.
ئەمجەد و گۆستاڤۆ سەرێ لیستا گۆلكەران دهێن
هەردو ستێرێن یانەیا زاخۆ یێ بەرازیلی گۆستاڤۆ هێنریك و یاریزانێ هەلبژارتیێ ئیراقێ ئەمجەد عتوان سەرێ لیستا گۆلكەرێن تیما خوە دهێن ب تۆماركرنا حەفت گۆلان، دیسان هەر ئێك، ناسر محەمەدو چار گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز گۆلەك تۆماركرینە.
هەولێر بەرانبەر ئاستەنگا تەلەبە دا
هەر ژ یاریێن ئەڤرۆ تیما یانەیا هەولێر دێ ل پایتەختێ ئیراقێ بەغدا بیتە مێڤانا یانەیا تەلەبە د یارییەكا ب هێز بۆ كوڕێن كەلهە و منارە، ئەوا بڕیارە ل یاریگەها كەرخ دەمژمێر 2:30 پشتی نیڤرۆ بهێتە كرن، تیما هەولێر خودانا 19 خالانە ڕێزبەندییا 10 ب كاتی دهێت ژ پێنج سەركەفتن، چار وەكهەڤی و چار خوسارەتی هەنە، ئانكو ئەنجام و ئاستێ وێ د خولێ دا یا جێگیر نینە، ژلایێ خوەڤە تەلەبە 21 خال كۆمكرینە رێزا حەفتێ دهێت، دیدارێن وان زێدەتر سەركەفتنێن تەلەبە بووینە ب 10 جاران و شەش سەركەفتن هەولێرێ ئینابوون و نەهـ وەكهەڤی هاتینە، ئێكەم یارییا وان هاتیە كرن ل 16ێ ئادارا 2001 بوو ب وەكهەڤی دووماهی هاتبوو، دووماهی یارییا وان ل وەرزێ بۆری بوو ئەو ژی ب وەكهەڤی ب دووماهی هاتبوو.
ژ یارییێن دی یێن ئەڤرۆ تیما زەورا دێ ل یاریگەها خوە مێڤاندارییا نەفت كەت د بەرانبەر دا یانەیا نەجەف دێ ل یاریگەها رومادی بیتە مێڤانا یانەیا ئەلكەرمە د یارییەكا ب هێز دا، چاڤەڕێ ییە یارییێن گەڕا 15ێ ل شەمبییا بهێت دەستپێبكەن.
