كار ل سه‌ر پێشڤه‌برنا كوالێتیا كارمه‌ندێن ساخله‌میێ دهێته كرن
دهۆك، له‌زگین جۆقی:
رێڤه‌به‌رێ گشتی یێ ساخله‌میا پارێزگه‌ها دهۆكێ دیار كر، دوهی 21/2/2022ێ وركشۆپه‌ك د ناڤبه‌را ساخله‌میا دهۆكێ و زانكۆیا پۆلیته‌كنیك یا دهۆكێ دا هاته ئه‌نجامدان و تێدا كار بۆ پتر بهێزكرنا په‌یوه‌ندیان هاته كرن، نه‌خاسمه ژی پێشڤه‌برن و بلندكرنا كوالێتیا كارمه‌ندێن ساخله‌میێ بۆ كاركرنێ د ناڤ دام و ده‌زگه‌هێن ساخله‌میێ دا.
د. ئه‌فراسیاب موسا، رێڤه‌به‌رێ گشتی یێ ساخله‌میا پارێزگه‌ها دهۆكێ بۆ رۆژناما ئه‌ڤرۆ گۆت: “گرنگیا وركشۆپێ ئه‌وه هه‌ماهه‌نگیه‌كا باش د ناڤبه‌را زانكۆیێ و ساخله‌میێ دا هه‌بیت بۆ وێ چه‌ندێ ده‌رچوویێن زانكۆیان كار د ناڤ ده‌زگه‌هێن ساخله‌میێ یێن حكومی و نه‌حكومی دا بكه‌ن، دیسا رژدی ل سه‌ر پێشڤه‌برن و بلندكرنا كوالێتیا كارمه‌ندێن ساخله‌میێ هاته كرن، كو ده‌مێ ژ زانكۆیێ ده‌ردچن بشێن ب باشترین شێوه خزمه‌تا نه‌خۆشان د ناڤ دام و ده‌زگه‌هێن ساخله‌میێ دا بكه‌ن”.
گۆتژی: “به‌ری نوكه رژدی ل سه‌ر ئاڤاهیان و دابینكرنا ئامیره و كه‌ره‌ستێن نۆشداری دهاته كرن، لێ نوكه كار ل سه‌ر پێشڤه‌برنا شیانێن ساخله‌میێ دهێته كرن”.
رێڤه‌به‌رێ گشتی یێ ساخله‌میا پارێزگه‌ها دهۆكێ زێده‌تر گۆت: “ڤێ وركشۆپێ چه‌ندین ئارمانج هه‌نه، ژ وانا: دیتنا ده‌لیڤێن كاری بۆ ده‌رچوویێن زانكۆ و په‌یمانگه‌هان و په‌یداكرنا ده‌لیڤێن كاری بۆ خوبه‌خشی و مه‌شقدانا قوتابیان د ناڤ دام و ده‌زگه‌هێن ساخله‌میێ دا و میكانزما مه‌شقا هاڤینی و دانانا ستافێ زانكۆیێ بۆ كاری د ناڤ ساخله‌میێ دا و میكانزما ڤه‌كۆلینێن زانستی و ده‌ستنیشانكرنا ئاریشه‌یێن ساخله‌میێ د ناڤ جڤاكی دا ژلایێ ساخله‌میا دهۆكێ ڤه و ئاراسته‌كرنا وان بۆ زانكۆیێ، داكو مفا بۆ نامه‌یێن ماسته‌ر و دكتۆرایێ ژی بهێته وه‌رگرتن و چه‌ندین ته‌وه‌رێن دی د ناڤ وركشۆپێ دا هاتنه شرۆڤه‌كرن”.
