كار ل سەر چێكرنا هەشت پۆندێن ئاڤێ یێ بەردەوامە
سندس سالح سلێڤانەیی:
رێڤەبەرێ ئاڤدێری دیار كر، بەری نوكە 57 پۆند ل پارێزگەها دهۆكێ هاتینە چێكرن و نوكە كار ل سەر چێكرنا هەشت پۆندێن دی یێ بەردەوامە و پشتی ب دووماهی دهێت دێ گەلەك مفا ژێ هێتە وەرگرتن، ب تایبەت بۆ كەرتێ چاندنێ.
هێژا عەبدولواحد، رێڤەبەرێ ئاڤدێرێ بۆ رۆژناما ئەڤرۆ گۆت: هەر ژ دەستپێكا كارناما كابینا نەهێ یا حكومەتا هەرێما كوردستانێ گرنگیەكا باش ب ئاڤاكرنا پۆند و ئاڤاكرنا بەنداڤان هاتیە دان، لەورا كەرتێ چاندنێ د ڤان سالان دا گەشەكریە و پێنگاڤێن باش هاڤێتێنە و ئەز ب باوەرم دێ هێشتا باشتر لێ هێت.
دەربارەی مفایێن وان پۆندان ژی گۆت: چێكرنا گەلەك مفایێن خوە هەنە، ژ وانا زێدەكرنا ئاڤا سەر ئەرد، هەروەسا ئاڤا ژێر ئەرد ژی، هەروەسا پرۆژەیێن ب خواندكرنا ماسیان و كەرتێ گەشتیاری و چاندنێ و ب خودانكرنا ئاژەلان گەلەك مفای ژێ دبینن، هەروەسا بۆ هەموو كارۆبارێن دی ل گوندان، چونكو هەكە ئاڤ نەبیت گوند ژی پێش ناكەڤن و گەشەكرنێ ناكەن، هەروەسا نەبوون یان كێمیا ئاڤێ دبیتە ئەگەرێ چولكرنا گوندان و بۆ داگرتنا وان پۆندان پشتبەستنا مە ل سەر ئاڤا بارانێ یە و سۆپاس بۆ خودێ ل ڤان سالان باران بارین ژی گەلەكا باش بوو، پۆندین مە هەموو پر ئاڤ بووینە و ئەڤ چەندە ژی جهێ دلخۆشیێ بۆ هەموویان ب تایبەت ژی بۆ جۆتیارێن هەر دەڤەرەكێ.
ل دووماهیێ گۆت: ل دووڤ پلانا حكومەتا هەرێما كوردستانێ بزاڤ دهێنە كرن ل گەل زێدەكرنا ئاڤاكرنا پۆند و بەنداڤێن ئاڤێ، پێدڤیە هندەك رێكێن دی ژی بهێنە دیتن كو ئابوورێ هەرێمێ بهێزتر لێ بهێت، بەلكو ئێدی پشتبەستنا مە نە ب تنێ ل سەر ئاڤێ یان پەترۆلێ بیت، بەلكو هندەك سكتەرێن دی ژی، ژ وانا كەرتێ گەشتیاری ژی گەلەكێ گرنگە، چونكو ئەم هەموو دزانین ل هەرێما كوردستانێ جهێن خۆش و دلڤەكەر هەنە و هەكە گرنگی و چاڤدان بۆ هەبیت دێ كەرتێ گەشتیاری ژی خۆرتر و بهێزتر لێ هێت و سالانە دێ هژمارەكا زۆرتر یا گەشتیاران سەرەدانا هەرێما كوردستانێ كەن و ئەڤ چەندە جهێ دلخۆشیا مە هەموویانە.
