كازم ساهری سوپاسیا وی كریە
سولین سلێمان:
نیگاركێش (ئازاد تەنیا) كو ئەڤە پتری بیست و پێنج سالانە ل سەر جادەیا ل بەر دیوارێ كەلها هەولێرێ وێنەیان بۆ خەلكی چێدكەت، د دیدارەكێ دا بۆ رۆژناما ئەڤرۆ گۆت: هەر چەندە من ب شێوەكێ ئەكادیمی هونەر نەخواندیە، بەلێ ئەڤە بەهرەیە كە خودێ دایە من و رۆژانە ئەز ل سەر لێڤا ڤێ جادێ كاردكەم و هەر كەسەكێ بڤێت دهێت داخوازا چێكرنا وێنەیێ خوە بكەت بەرامبەر پارەكی ئەز بۆ چێدكەم چنكو ژیانا من ل سەر ڤی كاری یە، هەروەسا گەلەك جاران وێنەیێن كەسێن ناڤدار ژی وەك سترانبێژ یێن كورد و بیانی چێدكەم و هەر كەسەكی ل دەف من ببینت دەستخۆشیێ ل من دكەن.
هەروەسا گۆت: جارەكێ من وێنەیەكێ هونەرمەندێ عیراقی (كازم ئەلساهر) چێكربوو، ئەو وێنە ل گەل چەند وێنەیێن دی ل بەر لێڤا ڤێ جادێ دانا بوو، رۆژەكێ كەنالەكێ ئەسمانی دیدارەك د گەل من كر و ئەو وێنە نیشادا و دیارە (كازم ساهر) ئەو وێنە دیت بوو لەورا د دیدارەكا خوە دا بەحسی وی وێنەی كر و سوپاسیا من كر، بۆ زانین ئەز سازێ ژی دژەنم و هەتا نوكە چەندین كەس ل بەر دەستێ من فێری چێكرنا وێنەیان و ژەنینا سازێ بووینە.
