كاساس: پێنگاڤا ئێكێ سەركەفتی بوو و چاڤەڕێ كاروانەكێ ب زەحمەتین
راهێنەرێ هەلبژارتیێ ئیراقێ سێ ئسپانی كەیفخوەشیا خوە دیار كو شیان سەركەفتنەكا مەزن ل سەر هەلبژارتیێ ئەندۆنیزیا بینن ب پێنج گۆلان بەرانبەر گۆلەكێ ژ چارچووڤێ هەڤڕكیێن گەڕا ئێكی یا كۆما سێیێ ژ قۆناغا یا ڤاڤارتنێن هەڤپشك بۆ مۆندیالا جیهانی یا 2026ێ و نەتەوەیێن ئاسیا 2027ێ ئەوا ل پێنج شەمبییا بۆری ل یاریگەها بەسرا یا نێڤدەولەتی هاتییە كرن.
خیسۆس كاساس بۆ دەزگەهێن راگەهاندنێ گۆت: یارییەكا ئاست بلند و گەلەك خوەش بوو و شیاین سەركەفتنێ بینن، دڤێت ل هندەك جهان ئاستێ خوە باشتر لێبكەین، ئەم رژدین دێ باشتر كەین، ئەز یێ ل ڤێرە ژبۆ دەربازبوونا هەلبژارتیێ ئیراقێ بۆ مۆندیالێ، حەز ژ كارێ خوە دكەم ژبەركو هەڤكاریەكا ب كۆم دهێتە كرن، مە چەند یاریزان هەبوون تووشی هنگاڤتنێ بوویە و چاڤەڕێ ڤەگەڕیانا واینە، هەروەسان چاڤەڕێ كاروانەكێ درێژ و ب زەحمەتین.
هەروەسان راهێنەرێ هەلبژارتیێ ئیراقێ گۆت: من یاریزانێ دەستنیشانكری یێ سەرەكی یان یەدەك نینە، بۆ هەر یارییەكێ ئەم چەندین هزر و پلانان دانین و ئەو یاریزانێ دشێت مفایی بگەهینە تیمێ و بەرهەڤبیت دێ پشتگەرمیێ وی بین و هەمی یاریزان ژی جهێ باوەریێ نە، یارییا بهێت یا سێ شەمبیێ دگەل فێتنامێ قۆناغا دویێ یە و رژدین بۆ سەركەفتنێ.