كاك ئدریس بارزانی ڕێبەر بوو
مـەحفۆز مـایـی
د سالگەردا وەغەرا ئدریسێ جوانەمەرگ دا؛ سلاڤ بۆ گیانێ وی و تەڤایا شەهیدێن كوردستانێ،
د ڤێ بیرەوەریێ دا من دو جاران ئەو دیت دو هەلوەستێن وی بالا من ڕاكێشابوو:
١- د سەرەدانەكا وان دا بۆ پێشمەرگێن دەڤەرا (لۆلان) و (خنێرە)؛ پاییزا سالا ١٩٨٥ێ من دیت كو بۆ پێشمەرگا و ئەم یێن حازر دئاخفت. گۆتنەكا وی بالا من ڕاكێشا؛ ئەو ژی ئەوبوو دگۆت:
هوین دبینن حوكمەتا ئیراقێ یا رێكا ل ناڤ كوردستانێ و سەرێ ڤان چییا چێدكەت و ئەم یێن شەڕی دكەین. ئەو یا كارێ مە سڤك دكەت كو هەردەما ئەم گەهەشتین ئارمانجا خوە؛ دێ بینین وان كارێ مە د چێكرنا رێوباران دا یێ سڤك كری. وی گۆت شەڕێ مە نە ل گەل حوكمەتێ یە، شەڕێ مە ل گەل ڕژێمێ یە كو ئینكارا مافێن مە دكەت.
٢- هاڤینا سالا 1985 ل كەرەجێ، شەڤەكێ ئەز ل گەل بەرپرسەكی چووین مالا وی بۆ سەرەدان، مرۆڤەك ل وێرێ بوو هاتبوو دا هاریكاریا كۆرێ وی بكەت دا بچیت ئەورۆپا، وی گۆتێ هەكە بۆ خواندنێ بیت بلا بچیت هەكە نە؛ نابیت گەنجێن مە بچن دەرڤە.
سێ خالێن گرنگ د ژیانا خەباتا رەحمەتی كاك ئدریس بارزان یێ جانەمەرگ دا:
١- د بیاڤێ خەباتا چەكداری دا:
د شۆڕەشا ئیلۆنێ دا؛ بۆ پێشمەرگەی پشت و هاندەرەك مەزن بوو، ب ڕێبەری و شارەزاییا وی پێشمەرگەی سەركەفتنێن مەزن بدەستڤەدئینان، شەڕێن زۆزك و هندرێنی و ڤان سەركەفتنان وەكر كو حوكمەتا ئیراقێ نەچار بیت گفتوگۆیێ ل گەل سەرۆكاتییا شۆڕشا كوردستانێ بكەت.
٢- د بیاڤێ خەباتا ئاشتیخوازی و پێكڤەژیانێ دا:
وەك ئاشتیخوازەك كارەك وەسا كر كو هەمی ئۆپوزسیۆنا ئیراقێ د ئێك كۆنگرە دا؛ ئێك بن و پێكڤە ل دژی دیكتاتۆریێ خەباتێ بكەن.
هەروەسا ئەوبوو وەكر كو بەرەیێ كوردستانی د ناڤ هێزێن كوردی دا دروست بیت و هەمی هێزێن كوردستانێ پێكڤە خەباتێ د ناڤ چارچووڤەیێ بەرەیێ (جۆد) دا بكەن.
٣- د بیاڤێ ڕێكخستنێ و ڕاگرتنا پارتی ژ كەفتنێ و ژێكبەلاڤبوونێ، گەلەك هێز و پارتێن سیاسی دەما تووشی شكەستەكێ دبن دێ بینی هندەك كەس د ناڤ سەركرداتییی دا خوە جودا دكەن.
پشتی وەغەرا بارزانی، كو سیمۆبلا خەباتا نەتەوەیا كورد و سەرۆكێ پارتی و سەركێشێ شۆڕشا كوردستانێ بوو، هینگێ رەحمەتی ئدریس بارزانی وەكر كو پارتی ژێك بەلاڤ نەبیت و جارەكا دی د وەختەكێ كێم دا؛ پشتی شكەستنا شۆڕشێ جارەكا دی شۆڕشا كوردستانێ د ڕێكخستنەك بهێزتر دا دەستپێبكەت و جارەك دی مۆرالا خەلكێ كوردستانێ بهێز بكەت و شۆڕشا گولانێ بوو، بەردەوامییا شۆڕشا ئیلۆنێ و بەرهەمێ وێ فەدرالی بۆ كوردستانێ هاتە دی.
سلاڤ بۆ گیانێ سەركێشێ كاروانێ كوردینییی بارزانیێ نەمر.
سلاڤ بۆ گیانێ كاك ئدریس بارزانیێ جوانەمەرگ.
سلاڤ بۆ گیانێ تەڤایا شەهیدێن كوردستانێ.
