كامیرا پارا !!
هه‌می هزرا خه‌لكێ مه ئه‌وه كو حوكمه‌ت یا پاره‌ی ژ وان چێدكه‌ت ده‌مێ دكه‌ڤنه كامیرا ترافیكێ! ئه‌ڤ پاره هیرده‌یه بۆ حوكمه‌تێ و ژخوه ناگریت بكه‌ته دبه‌ریكێت خوه‌دا! نه‌ڕازیبوونا ملله‌تی ل سه‌ر ڤێ كامیرێ ژ نه‌حه‌زكرنا وانه بۆ فێربوونا قانوونا هاتنوچوونێ، ملله‌تی نه‌ڤێت ل سه‌ر ڕێنمایا هاژۆتنا ترۆمبێلێ بكه‌ن! ژبه‌ر هندێ ده‌نگێ نه‌ڕازیبوونێ یێ بلند دبیت. ژبۆ سلامه‌تی و پاراستنا روحێن وه‌لاتیان ئه‌ڤ هزره ده‌ركه‌ت! و ئه‌نجامێن سه‌ركه‌فتیانه دیاركرن د سیسته‌مێ هاتنوچوونێ دا، ل هه‌می وه‌لاتێن جیهانێ ئه‌ڤ هزره یا بكارهینای، مه‌به‌ست پاره ژێچێكرن نینه! ئه‌و بڕێكه‌كا دی پاره‌ی ژته چێدكه‌ت شۆفێرێ به‌رێز ب پانزینی، موه‌لیدا كاهره‌بێ، ئاڤا موقه‌ته‌ر، بازرگانیا به‌رزه وه‌كی جگارا و تانكه‌رێن گازێ.. ئه‌ڤا پولیسێ مه‌یێ هاتنوچوویێ دكه‌ت تنێ كێمكرنا ژمارا مریانه ئه‌ڤێن گیانێ خوه ژده‌ست ده‌ن ب ئه‌گه‌را له‌زاتیا هنگۆ! لێ خه‌لكی دڤێت د به‌ردایی بن! ب كه‌یفا خوه بفڕیت و خه‌لكه‌كێ بێ گونه‌ه ژی گه‌ل خوه بفڕینیت و بكوژیت ب له‌زاتیا خوه‌یا بێ ڕامان. ل وه‌لاتێن قانوون هه‌ی دو سێ جۆره كامیره هه‌نه ل سه‌ر له‌زاتیا شۆفێران: كامیرا دانایی (بنه جه)، كامیرا ڤه‌شارتی، كامیرا پۆلیسێن سڤیل. مه ئێك كامیره یا هه‌ی ل كوردستانێ و ئه‌م یێ خوه نه‌رازی دكه‌ین و مه نه‌ڤێت ئه‌و ژی هه‌بیت! ئه‌ڤ هه‌رسێ جۆره كامیرا ترافیكێ دڤێت مه هه‌بن دا به‌س گیانێ زارۆكێن مه بنه قوربانی هاژوتنا بله‌ز بیت. ملله‌ت دڤێت حه‌ژ قانوونی بكه‌ت به‌ری ستێرێنی بگریت، دڤێت ئه‌م ڕێزێ ل چاڤێ كامیرێ بگرین هه‌كو چاڤێن وان د ڤه‌كری دا زارۆكێن هنكۆ ب سلامه‌تی ل سه‌ر وان جادێن مرنێ ده‌ربازبن! نه‌ك ئه‌نی گرێ بین و د نه‌ڕازیبین كو قانوون یا كار دكه‌ت ل سه‌ر جادێ. پا بۆچی ملله‌تێن بیانی نا بێژنه حوكمه‌تێن خوه دانانا كامیرا د قانوونا هاتنوچوونێ دا نینه؟! ئه‌م بێ قانوونیێ دورست دكه‌ین! ئه‌م حه‌ز ژ پێنگاڤێن پێشكه‌فتنێ ناكه‌ین! ل هه‌می جیهانێ ئێك قانوون و زمانه‌كێ هه‌ی بۆ هاژۆتنا ترومبێلێ به‌س مه دڤێت ئه‌م وه‌كی خوه قانوونان دورست كه‌ین و دامه‌زرینین! ژ به‌ر كو مه كوردان به‌ری خه‌لكی ترومبیل و جاده هه‌بوون! ئه‌ڤ خه‌لكه دڤێت فێری قانوونێ بیت به‌ری هاۆتنا ترومبێلێ بكه‌ت به‌ری هاژۆتنا كارێ ژیانێ هه‌میێ بكه‌ت هه‌ر مرۆڤه‌ك د كومه‌لێدا دڤێت پشتگێریا هه‌بوونا قانوونێ بكه‌ت كامیرا پارا ژی ئامیره‌كێ قانوونێ یه هه‌می ملله‌تێن وه‌لاتان بڕێزگرتن ڤه ل به‌ر ده‌ربازدبن! و ئه‌م؟
ڕامانا په‌یڤا (ڕێڤه‌به‌ر) دهزرا ده‌نگده‌راندا! گه‌لی ده‌نگده‌را هوون لسه‌ر چ بنیات ده‌نگێ خوه ده‌نه به‌ربژێرێ خوه؟ ژبه‌ركو یێ نێره یان یا مێ یه؟ ئه‌رێ هنده‌ك ژ هنگو ژ چه‌په‌رێ فلانی و هنده‌ك ژ چه‌په‌رێ بێڤانی! هوون نه وێرن ده‌نگێ خوه نه‌ده‌ن و نه وێرێن ده‌نگێ خوه ژی بده‌ن، ژبه‌ركو تۆ دترسی نانێ ته بهێته بڕین (ئه‌ندامو)! مه‌رجێن به‌ربژێری چنه كو ببیته كاندیدات ؟ دڤێت ئه‌ز كیژ ره‌نگ بم دا بكارم بمه ڕێڤه‌به‌ر؟ دڤێت چه‌ند مار دزگێ مندا بن دا سه‌ره‌ده‌ریێ د چاره‌سه‌كرنا ئارێشێن ئه‌ندامێن خوه بكه‌م؟ دڤێت كی پشته‌ڤانییا من بكه‌ت و كی پشتا من بگریت و من پێشكێش بكه‌ت كو ئه‌ز بكێر دهێم و كه‌س ژمن باشتر نینه كو بمه (ده‌ڤخه‌به‌ر)؟، دڤێت ئه‌ز پره‌كا باشم وه‌كی ئه‌ڤێ به‌ری خوه به‌رپرس ب پێلاڤه لسه‌ر پشتێ ده‌رباز ببیت؟ نه‌بێژم ئای. ئه‌گه‌ر سه‌یدای گوتێ و فه‌رماندا تنێ ئه‌ز بێژم: بلا ئه‌ز به‌نی! ،به‌ری ئه‌ز (سی ڤی)یا خوه پێشكێشی جهێ كاری بكه‌م ئه‌ز دخزمه‌تا كێ دا بم؟ دخزمه‌تا ئه‌نداما؟ یان یا لایه‌نا دا كار بكه‌م؟ پا بێهنا نه‌هه‌قیێ و ڕزیاتیێ یا ژمه دفڕیت ئه‌ی هه‌وار! پا ئه‌م دپیسین ئه‌ی هه‌وار! پا ئه‌م د دره‌وین و سێ چوار ڕیچكین گه‌لۆ! ما نه مه‌رجێن به‌ربژاره‌تیێ دهێنه به‌لاڤكرن به‌ری بیته رۆژا ده‌نگدانێ ئه‌گه‌ر كه‌سه‌ك هه‌بیت و دخوه‌ڕا بینیت سه‌رجه‌له‌بیێ بكه‌ت!؟ به‌ربژێر چ بكه‌ت به‌ری ببیته هه‌لامه‌ت لوێ ڕۆژێ؟ به‌رهه‌ڤی چنه كو (به‌رحه‌زه‌ك) هه‌بیت ببیته ڕێڤه‌به‌ر؟ ئه‌رێ ڕامانا (ڕێڤه‌به‌ر) چییه د تێگه‌هشتنا مه ده‌نگده‌راندا؟وه‌كی ده‌نگده‌ر ئه‌ز دبینم مه‌رج ئه‌ڤه‌نه: 1. به‌ربژێر دڤێت ئاستێ وییێ قوچانێ چه‌ندبیت؟ 2. دڤێت بسپوری هه‌بیت د هه‌رسێ هونه‌رادا. 3. شانووكار بیت:ئه‌كته‌ر بیت بكاریت بكه‌ته گری و كه‌نی ژ قه‌ستا د هه‌می جووره هه‌لكه‌فتن و ئاهه‌نگادا. 4. موزیكڤان بیت: ته‌مبورڤان بیت، و تایبه‌ت دهول قوت بیت دهولێ بزانیت لێده‌ت ڤێجا چ دهولكا ئێكی بقوتیت یان دهولێ بۆ ئێكی لێده‌ت! هه‌روه‌سا بسپوری د لێدانا (پیكێ) دا هه‌بیت. 5. شێوه‌كار بیت: تابلویێن كه‌سێن خالی و ڤالا دورست بكه‌ت، په‌یكه‌رێن دره‌وا ل باژێری دانیت. 6. دڤێت تو زارۆك و خێزانا خوه ژبیربكه‌ی و ڕازیكرنا سه‌یدای گرنكتره ژ په‌روه‌ردا عه‌یالی و پێتڤیێن مالێ. 7. له‌ق هاڤێژ و سه‌ره‌خور بی، تێر نه‌بی ژ كومكرنا پاری. 8. لسه‌ر ڤان مه‌رجا دڤێت خودان (نه‌شال) بیت! ئانكو دزیكه‌ر بیت و یێ شاناز بیت د دزیێت خوه‌دا. 9. ده‌ستبه‌ردان ژكاری نابیت، هه‌تا بهێیه هه‌لكێشان، ده‌ركرن، یان ڕه‌زیلكرن. 10. دوو رووی یان سێ رووی بیت. 11. گیانێ خوه‌به‌خشكرنێ هه‌بیت. زه‌حمه‌ته و بكه‌سێڤه ناهێت ئه‌ڤ مه‌رجێن گوتی. رێڤه‌برنا ده‌زگه‌هه‌كی یان جهه‌كێ فه‌رمی دخوازیت كه‌سایه‌تیه‌كا بهێز و شاهره‌زا و خودان مێشكه‌كێ ساخله‌م و زانسته‌كێ بلند و یه‌كسانی د هزر دیتنا سه‌رو چاڤاندا بسپور بیت. نه‌ك دزیره‌ك و ساخله‌مین بو گرتنا كورسیكا و لسه‌ر گولتا دچین بۆ كاری و شولی.. دێ كه‌ره‌م بكه‌ن خوه بهه‌لبژێرن هوون دئازادن.
