(( كانتۆنیزم )). .. شه‌ڕه‌كێ دن. . پارچه‌بوونه‌ك دن
گه‌لۆ چما پڕانیا لایه‌نێن په‌یوه‌ندیدار و شۆله ژێ ئه‌ڤ پڕوَسه‌یه ڕه‌ت كر ؟ چما مه‌رجه‌عیه‌تا شنگالیان ب میر و شێخ و پیر و قه‌واڵ و فه‌قیر و ڕه‌وشه‌نبیر و سه‌نته‌ر و پیره‌ك و زاروَك و كاڵ و توَلاز ڤه كابووس و ڕه‌شه‌یا ((كانتوَنیزم)) ێ ڕه‌ت كر؟ چما سازیێن فه‌رمی, سه‌روَكایه‌تیا هه‌رێمێ و په‌ڕله‌مان و سه‌روَكایه‌تیا حوكمه‌تێ و هنده‌ك مه‌كته‌بێن سیاسێن پارتێن كوردستانی و كه‌سایه‌تیێن كورد ئه‌ڤ پرسه ڕه‌ت كر و ب دیتنێن ل هه‌ڤجوه دا شڕوَڤه و پێشبینیێن خوه خوه‌یا كرن؟ لێ گه‌لوَ ل هه‌مبه‌ر ئه‌ڤێ ڕه‌ت كرنێ ژی, بێده‌نگی و چاڤدێری و میانڕه‌وی و خوَڤه‌دزینه‌ك, نه‌خێر به‌لكی پشته‌ڤانیه‌ك ژی!! ل ئالیێ هنه‌ك ده‌وله‌ت و حوكمه‌ت و لایه‌ن و حزب و خودان ئه‌جێنداێن ده‌ركی ڤه ژێ هاتیه كرن. حكومه‌تێن ده‌وروبه‌ر و هێزێن ده‌ڤه‌رێ میكاڤیلیانه چاڤدێریا گوَهرینكاریێن شنگالێ و شنگالیان دكه‌ن و ب گرنگیڤه دخوازن گوهداریا هه‌ڵوێستێ (مسعود بارزانی) سه‌روَكێ هه‌رێما كوردستانێ بكه‌ن و بزانن ل په‌ی ئه‌ڤان جوَرێن ئاسته‌نگ و كریاران چ ڤه‌ژه‌نینه‌ك سیاسی هه‌نه !! پڕانیا ڕاگه‌هاندنێن توركیا (جمهورییه‌ت, انازوَل, جیهان, میللیه‌ت) د بابه‌تێن سه‌ره‌كیێن خوه دا, گرێدانه‌كا زوَر بابه‌تیانه هه‌یه دناڤبه‌را پاڵده‌رێن (داعش) بوَ هێرشا سه‌ر شنگالێ ل 3ێ ئاب 2014ێ و لایه‌نێ كو ئیروَ شنگالێ ب كانتوَن ڕادگه‌هینیت , هه‌روه‌سا دبێژن كو ئیران و سوریێ بو ده‌مێ چركه‌كێ ژی نكاریه په‌یوه‌ندیێن خوه ژ (قه‌ندیل) ێ ڕا قوت بكه‌ن. هنه‌ك شڕوَڤه‌كارێن سیاسیێن بیانی د وێ باوه‌ڕێ دانه كو (پانئیرانیزمێ) كاریه مفایه‌كێ سیاسی و له‌شكه‌ری زێده ژ پڕوَسه‌یا رێڤه‌به‌ریا (كانتوَنیزم) ا ڕوَژئاڤا وه‌ربگریت, وه‌كی گه‌هاندنا چه‌ك و ته‌قه‌مه‌نی و هاریكاریێن لوَجیستیكی بوَ ده‌ستهه‌ڵاتا به‌شار ئه‌سه‌دی و ئاسته‌نگ و كوَسپ بوَ كوَنگره‌یا كوردستانێ و ئێكنه‌گرتنا ئیداره‌ێن كوردی ژ ئالیێ سۆپا و له‌شكری و ئابووری و دارایی و ئه‌وله‌هیێ ڤه و شكه‌ست پێدانا هه‌ردوو كوَنگره‌ێن (هه‌ڤلێر و دهوَك) بوَ ته‌بایی كرنا هێزێن سیاسیێن كوردێن روژئاڤا, هه‌روه‌سا ژبه‌ین برنا خه‌ونا ده‌وله‌ت بوونێ و بڕیارا ڕاپرسیا خه‌لكێ هه‌رێمێ بوَ ڕاگه‌هاندنا سه‌ربه‌خویێ ژ عیراقا ده‌ستكرد. ب دیتنا من پشكه‌ك گرنگ ژ پیاده‌كرنا شه‌رخوازیا روَژانه‌یا (داعش) د گه‌ل هه‌رێمێ ل دووڤ داخوازی و د ده‌ستێ ئه‌ڤان ده‌وله‌تان دایه, له‌وا هه‌رده‌مێ ده‌ستكه‌فتێن گرنگ و هه‌ڵوێستێن نێڤده‌وله‌تیێن ئه‌رێنی ژ پڕوَسه‌ێن سیاسی و ئیداری و ئابووری ل هه‌مبه‌ری هه‌رێمێ و میلله‌تێ كورد بهێنه ئه‌نجامدان, ده‌ملده‌ست (داعش) ل میحوه‌رێن جوداجودا ب هێرش و خوكوژێن خوه ڕێگریێ و ئاسته‌نگان چێدكه‌ت. له‌وا ده‌مێ سه‌روَكێ هه‌رێمێ بڕیاڕا نه‌هێلانا پێشمه‌رگێ حزب و لایه‌ن و ده‌سته و تاكه كه‌سان دا و حوكمه‌تا هه‌رێمێ رێكه‌فتنه‌ك ئابووری ل گه‌ل به‌غدا موَهركر و گه‌نگه‌شه‌كا هه‌ڤپشك د ناڤبه‌را ئه‌مریكا و هه‌رێم و به‌غدا دا هاته ئه‌نجامدان كو ل دووڤ هنه‌ك مه‌رجان له‌شكرێ هه‌رێمێ پشكداریێ د پڕوَسه‌یا ئازادكرنا مویسل دا بكه‌ت , داخوازا (عه‌لی لاریجانی) سه‌روَكێ په‌ڕله‌مانێ ئیرانێ ژ لایێ بارزانی ڤه هاتیه ره‌ت كرن. ئێدی هێرش و خوَپه‌قاندن و گه‌رمكرنا سه‌نگه‌رێن شه‌رێ (داعش) ل ته‌ڤایا میحوه‌ران, نه‌خاسمه گوێر ـ مخمۆر و شنگال و تلسقوف ده‌ستپێكر و دووماهی ئاسته‌نگ ژی نه دستووریا دامه‌زراندنا ب ناڤ كانتوَنا شنگالێ یه كو ئیروَ نه‌یارێن كوردان دخوازن پارچه‌بوونێ زێده و زێده‌تر لێ بكه‌ن. یا گرنگه بێژین كو شه‌نگال وه‌كی كانتوَنه‌ك چ به‌رژه‌وه‌ندیا ئێزیدیان بخوه‌ڤه ناگرین, به‌لكی مه‌ره‌م و ئارمانج ژێ تێكدانا ئێكڕێزیا كوردانه و شه‌ره‌كه ژ ئالیێ هنه‌ك ئه‌جێنداپارێزێت ده‌ره‌كیڤه دژی هه‌رێمێ و سه‌روَكایه‌تیا وێ.
