كرێكارێن دهۆكێ خرڤەبوونەكا نەرازیبوونێ ئەنجام دا
ئەڤرۆ
ب هەلكەفتا رۆژا جیهانی یا كرێكاران، دوهی هەژمارەكا كرێكارێن دهۆكێ خرڤەبوونەكا نەرازیبوونێ ل هەمبەر جڤاتا پارێزگەها دهۆكێ ئەنجام دا و چەندین داخوازی ژ لایەنێن پەیوەندیدار كرن.
كرێكارێن دهۆكێ ل ئاڤاهیێ سەندیكا كرێكارێن كوردستانێ ب رووپیڤان هاتنە هەمبەر جڤاتا پارێزگەها دهۆكێ و ل وێرێ داخوازیێن خوە پێشكێشی لایەنێن پەیوەندیدار كرن و كرێكارەكێ پشكدار ژی گۆت: «مە د یاداشتنامەكێ دا كو 14 داخوازی بوون رادەستی لایەنێن پەیوەندیدار كرن، ئەم د خوازین داخوازیێن مە بهێنە هنارتن بۆ جهێن بلندتر و بهێنە بجهئینان».
وەلات ئەمین، سەرۆكێ سەندیكا كرێكارێن كوردستانێ، لقێ دهۆكێ د كۆنگرەكێ رۆژنامەڤانی دا خویا كر، 137 سالیا رۆژا جیهانا كرێكاران ل هەموو كرێكاران پیرۆز بیت، دیسا داخواز ژ حوكمەتا هەرێما كوردستانێ كر، داخوازیێن كرێكارێن دهۆكێ چارەسەر بكەت، دیسا كرێكار تەخەكا گرنگە د جڤاكی دا و پتر ژ نیڤا جڤاكی پێك دئینن و گۆت: «هندەك ژ وان داخوازیێن مە جڤاتا پارێزگەهێ دشیچت چارەسەر بكەت و هندەكێن دی ژی بۆ جهێن بلندتر بهنێریت و بهێنە چارەسەركرن، ژ بەركو پارێزگەها دهۆكێ هەژارترین پارێزگەهە ل سەر ئاستێ هەرێما كوردستانێ، لەو ئەم دخوازێ ژ جهێن پەیوەندیدار دكەین پێداچوونەكێ د ژیانا كرێكاران دا ل دهۆكێ بكەن».
فەهیم عەبدوللا، سەرۆكێ جڤاتا پارێزگەها دهۆكێ د كۆنگرەیێ رۆژنامەڤانی دا، پشتەڤانیا خوە و جڤاتێ بۆ داخوازیێن كرێكاران دوپاتكر و گۆت: «كرێكار و پالە توێژەكا مافخوارینە و وەلات ل سەر وەستیان و خوه و زەند و باسكێن وان دهێتە ئاڤاكرن و ئەو تشتێ پەیوەندی ب مەڤە هەبیت دێ ب رژدی ل سەر كار كەین و ئەوێ پەیوەندی ب ئیدارا خوەجها پارێزگەهێ ژی ڤە نەبیت ب ئەمانەت دێ گەهینینە جهێن بەرپرسیار».
