كـورد ل دویڤ چـارەسـەریان دگـەڕن
عەمەر هەرگۆشی
زێدەباری هندێ كو گەلێ كوردستانێ د كاودانێن خراب یێن ئابۆری دا دەرباز دبیت و مووچەبرین و دەست برن بۆ پاریێ خەلكی بەردەوامە، هەولێن خراپتر ژی یێن دهێنەدان دا دۆخێ هەرێما كوردستانێ خراپتر لێ بكەن، بەلێ حوكمەتا هەرێما كوردستانێ ل سەر هەولێن خۆ یا بەردەوامە دا بەردەوامیێ ب پەیوەندیێن دروست یێن خۆ ل گەل بەغدایێ بدەن و ماف و مووچەیێن فەرمانبەرێن هەرێما كوردستانێ دابین بكەن.
وەكو دیارە ناكۆكی د ناڤبەرا وان دا زۆر دئالۆزن و چارەسەری ژی دسەختن. دەما حوكمەتا كوردستانێ پێداگیریێ ل پەیرەو كرنا دەستووری دكەت و داخوازا مافێن رەوایێن گەلێ كوردستانێ دكەت، ژنویكا دەسهەلاتدارێن ئیراقێ پتر دەست ب بڕینا مووچە و شایستەیێن دارای یێن هەرێمێ دكەن پەیرەوێ سیاسەتا برسیكرن و ئەزیەتدانا خەلكێ كوردستانێ دكەن و دەست ژ سیاسەتا كەڤنا رەگەزپەرستانە و دژە كورد هەلناگرن، كو مەرەم ژێ ئەوە هەرێما كوردستانێ و دەسهەلاتا رەوایا كوردستانی لاواز بكەن و گەلێ ئاشتیخوازێ كوردستانێ بێزار و برسی بكەن و ئەو پێشكەفتن و پەرەسەندنێن كوردستانێ هەین، راگرن ب ڤێ چەندێ ژی ئاریشەیێن مەزن بۆ حوكمەتا كوردستانێ و گەلێ كوردستانی بیننە پێش.
دەسهەڵاتدارێن بەغدا هەمی جاران ب چاڤەكێ كێم سەرەدەریێ ل گەل هەرێما كوردستانێ دكەن چ جاران د ئامەدە نەبووینە داخوازی و مافێن رەوا و دەستووری یێن كوردستانی جێ بەجێ بكەن، هەر گاڤەكێ ب هەجەتەك و بەهانەیەكێ زۆریێ ل خەلكێ كوردستانێ دكەن و جار مووچەی دبڕن؛ جار ژی هەولا داگیركرنا خاكا كوردستانێ ددەن و گەلەك جاران ژی ب درۆنان و چەكی؛ شەڕێ كوردستانیان دكەن، ئەوا خەلكێ كوردستانێ ل هیڤیێ بوو كو ئیراقەكا ئارام و ئێكگرتی بهێتە ئاڤاكرن كو هەمی پێكهاتە وەكی برا ب یەكسانی ب مافێن خۆ شاد ببن و پێكڤە د ئیراقا ئاڤەدان دا ئازاد و سەربەست بژین، هەمی بەروڤاژی دەرچوون و دەسهەڵاتدارێن ئیراقی سۆز و پەیمانێن خۆ بۆ گەلێ كوردستانێ جێ بەجێ نەكرن و تشتەك ل سروشتێ وان یێ دژە كورد نە هاتە گوهۆرین و كارەسات و مەینەتێن گەلێ كوردستانێ زێدەتر لێكرن، ئەوا نوكە ل هەنبەر گەلێ كوردستانێ دهێتە ئەنجامدان ل دژی دەستووری و هەمی یاسا و رێكەفتنێن د ناڤبەرا حوكمەتا هەرێمێ و بەغدایێ دا و ئەگەر ب ڤێ رەنگی حوكمەتا ئیراقێ بەردەوام بیت ل سیاسەتا برسیكرن و سەپاندنا بریاران و دەسهەلاتا خۆ، تشتەك نامینیت كو گەلێ كوردستانێ جارەكا دی ئۆمێدا خۆ ب دەسهەلاتا ئیراقێ بینیت و دلێ خۆ ب ئیراقەكێ خۆش بكەت كو ل دوماهیكا تۆنێلی ژی چ رۆناهیان نەبینیت.
ئەڤرۆ دەسهەلاتدارێن ئیراقی یێن ل دۆریانەكا چارەنڤیساز دا یان دڤییا سەرێ خۆ بۆ خواستەكێن رەوا یێن گەلێ كوردستانێ بچەمینن، یان ژی ل سەر رێكا دیكتاتۆرێن پێش خۆ بچن و ئوبالا كارەسات و مالوێرانیێن داهاتی بگرنە ملێ خۆ، كو بێگومان ژان و ئازارێن وێ دێ گەلەك د كاریگەر بن.
