كـورد پێكهاتەیەكا ڕەسـەن و سەرەكینە
دلهین حەمدی
ئەڤە ئەو دەستەواژەیە یاكو پتریا دەولەتێن سەركوتكار و دژە كورد بكاردئینن و ئەڤە ئەو دەولەتن یێن كو كوردستانا مەزن ب سەر وان دا هاتیە دابەشكرن و ژ خێر و بێرێن كورد و كوردستانیان دخۆن و پیستێ میهێ ب سەر خۆ دا برینە و د ناخ و ناڤەڕۆكا خۆ دا ژی گورگێن دڕندە و دەڤ بخۆینن، دیرۆك دیدەڤانە ل سەر ڤان هەر چار وەلاتان (ئیران، ئیراق، سووریا، توركیا) كو هەر ئێك ژ ڤان وەلاتان ب شێوازەكێ هەولا سەركوتكرن و بەرزەكرنا ناسنامەیا كوردان داینە و ئەڤ چار وەلاتە دبیت د گەلەك بابەتان دا هەڤبیر و باوەر نەبن، لێ هەردەما كو بابەتێ كوردان دهێتە پێش هەر هەمی دبنە ئێك دەنگ و ئێك ڕەنگ ل دژی كورد و كوردستانیان.
ئەگەر ل بەراهیێ ئەم ل سەر وەلاتێ ئیرانێ ڕاوەستین دێ بینین كو ل سەردەمێ ڕژێما پاشایەتی یا ئیرانێ هەتاكو نها كورد ب ڕێكێن جوداجودا هاتینە سەركوتكرن و سزادان هەر ژ سێدارەدانا ڕایەدارێن كۆمارا ساڤایا كوردستانێ ل مهابادێ، بگرە هەتاكو دگەهیتە بەرزەكرن و سێدارەدانا گەنج و لاوێن كورد لسەر دەستێ كۆمارا نەئیسلامیا نها یا ئیرانێ ژبلی هندێ كو كورد ژ مافێن خۆ یێن دەسپێكی و زمان و چاند و هونەرا خۆ هاتینە بێ بەهركرن و سەرەڕای بێ كاریێ و بڕینا دەستێ خزمەتگوزاریێ بۆ دەڤەرێن كوردی ڕژێما نەئیسلامی و سەركوتكارا ئیرانێ زەڤی و زار و ئەردێ بازرگانی یێ كوردان ژی دەستێ خۆ دانایە سەر و سیستەمێ باجەكا گران ژی لسەر سەپاندینە و ئامادە نینن ب هیچ ڕەنگەكێ مافێ كوردان بەحس لێ بكەن، هندی كو وەلاتێ ئیراقێ یە ژی ل سەردەمێ ڕژێمێن مەلكی و هەتاكو ڕژێما سەدامی هەولا وان بنبڕكرن و نەهێلانا نەتەوەیێ كورد بوو ب هەر ڕەنگەكێ بیت و ئەگەر ڕێكەفتنەك ژی ل گەل كوردان كربیت ل وەختێ خۆ دا بۆ ئاشتیێ ل دوماهیێ ل سۆز و ڕێكەفتنێن خۆ پاشگەز دبوون و هەولا كۆمكوژی و ئەنفال و كیمیابارانكرنا گەلێ كورد ددان لێ پشتی ڕاپەڕینا خەلكێ باشورێ كوردستانێ و ئازادیا ئیراقێ ل بن دەستێ ڕژیما بەعسی كوردان پشكداری د ئیراقا نوی و فیدڕالی دا كر و بۆ ماوەیەكێ پەیوەندی د باش بوون لێ پشتی ڤێ چەندێ و ل بهارا سالا (٢٠١٤)ێ و هەتا نها حوكمەتا ئیراقێ یا شەڕێ بڕینا بۆدجە و مووچەی دگەل هەرێما كوردستانێ دكەت داكو هەرێما كوردستانێ لاواز بكەن و دەسهەلاتا ناڤەندی ل هەرێما كوردستانێ بسەپینن لێ سەركردایەتیا سیاسی یا هەرێما كوردستانێ ڕێگر بووینە ل بەرامبەر ڤێ چەندێ و پلانێن وان هەلوەشاندینە و كیانێ هەرێما كوردستانێ بەرەف پێش و پێشتر برینە، لێ وەلاتێ توركیایێ ناڤدارە ب وەلاتێ كۆمكوژیان و مەزنترین كۆمكوژیێن توركا ئەنجامداین ل دیرۆكێ كۆمكوژیا ئەرمەنیان بوو و لدویڤ دا كۆمكوژیێن گەلێ كورد دهێن هەر ل سەر دەستێن توركێن نەژادپەرست و ئەڤە هەمی ژ بۆ وێ چەندێ بوون داكو ناسنامە و هەبوونا كوردان ل دەڤەرێن كوردی نەهێلن و نەژادێ توركان ل دەڤەرێن كوردی بنەجه بكەن و هەتا نها ژی توركێن نەژادپەرست ل سەر ڤێ هزرا شۆفینی دبەردەوامن و هەر ل سەر ڤێ چەندێ بەری ماوەكێ (بنیامین نەتەنیاهۆ) یێ سەرۆكوەزیرێن ئیسڕائیلێ پەیامەك دایەڕایەدارێن توركیایێ كو ئێدی سیستەمێ پاوانخوازیێ و ئیمپراتوریەتا ئوسمانی و كۆمكوژیان نەمایە و دەستان ژ خەونێن خۆ یێن چەپەل بەردەن، وەلاتێ سووریێ ژی ل بەری ڕژێما حافز ئەسەدی و ل سەردەمی ڕژێمێ ژی هەبوونا كوردان هەر نەدهاتە هەستكرن و كورد د بێ بەهر بوو ژ هەر مافەكێ بنەڕەتی و هەتا مافێ وەلاتیبوونێ و ناسنامەیێ ژی پێ نەدهاتەدان و پشتی شۆڕشا گەلێ سووریێ ل سالا (٢٠١١)ێ هێدی هێدی كورد دهێنە د ناڤ گۆڕەپانا سیاسی و شەڕی یا سووریێ دا و هەتاكو ب دلێرانە و چاڤنەترسانە مل ب ملێ هێزێن هەڤپەیمانیا نیڤدەولەتی ل دژی گڕۆپێن تیرۆرستی و داعشێ شەڕكرینە، لێ دەسهەلاتا نها یا سووریێ ڕێ نادەن كورد ڕۆلێ خۆ ببینن ل دەڤەرێن خۆ و جارەكا دی شەڕێ سەربازی بەرپاكرینە ل دژی كوردان ب سەرۆكاتیا (ئەحمەد شەرع)ی و د لێدوانێن خۆ دا ژی ئەحمەد شەرع دبێژیت كورد پێكهاپەیەكا ڕەسەن و سەرەكینە، لی ب هیچ رەنگەكێ لێدوان و كریار وەكهەڤ نینن و هەر ب هەمان شێوە كریار و لێدوانێن وەلاتێن توركیا و ئیراق و ئیرانێ ژی هەروەكی یێن ئەحمەد شەرع ل بەرامبەر گەلێ كورد وەك هەڤ نینن و مەرەما وان حەلاندنا ناسنامە و شووناسا گەلێ كوردە د ناڤ جڤاكێن خۆ دا.
