كـولتوورە.. ئـەم بەنییا دكـەینە ئـەزبـەنـی!
تارق عەبدال
هندەك مرۆڤان سروشتێ وان ب ڤی رەنگی یە، چەند تو حەزژێ بكەی و گرنگیێ پێ بدەی و چەند بۆ وان بكەی و چەند خۆ بۆ وان كێم بكەی، هەر دێ چن، چ ئەڤرۆ بیت یان سبەهی بیت. ئەڤجا بهێلە ئەو كەسێن هەنێ ب ئاگرێ خۆڤە ئەڤرۆ ل بەهشتا دلێ تە دەركەڤن و بچنە د ناڤ دۆزەخێ دا.
فێربە ئەو مرۆڤێن ب حەزژێكرنا تە و گرنگیدانا تە و ب هەبوونا تە بێزار و دل تەنگ دبیت، تو چ منەتا لێ نەكە، چونكی تو ل هەر كەسەكی نێزیكتری و باشتری گرنگیێ بدەیە خۆ. ئەز د وێ باوەریێ دا مە، د ناڤ جڤاكا مەدا ئەڤ جۆرە مرۆڤە گەلەك هەنە، لێ ل ڤێرە بابەت دبیتە دو چق، یا ئێكێ ئەوە جۆرەكێ ڤان مرۆڤان حەز ژ تە دكەت و گرنگیێ ب تە ددەت، ژبەر زەنگیا تە و پلەو پایەیا تە، لەورا دێ بینی هەر گاڤا تو كەتی دێ زانی كانێ هەڤالێن تە كینە.
(دكتور ئیبراهیم فەقی) دبێژیت: دەما مرۆڤ مەزن دبیت دێ هەڤالێن تە زانن تو كی، بەلێ ئەگەر تو كەتی دێ تو زانی كا هەڤالێن تە كینە! یا دوێ ژی ئەوە هندەك مرۆڤ نەژ هەژی وێ گرنگیدان و حەژێكرنێ نە یا تو پێدەی، ئەوژی چاوا دیار دبیت دەمێ تو دبینی تو هەر یێ گرنگیێ دەیێ و ئەو كەس بەروڤاژی وێ گاڤێ هەوجە ناكەت تو هند خو پێڤە ماندی بكەی، هند خۆ بشكێنی ژبۆ هندی ئەو قەدرێ وێ ڤیان و گرنگیا تە نەزانیت، هەر تشتێ بهایێ وی پێ بدەو نەزێدەتر.
بزانە ئەو كەسێ ژبەر مال و سامان و پۆستێ تە گرنگیێ ددەتە تە و حەزژتە بكەت، بلا ل دەف تە یەقین بیت هەر گاڤا ئێك ژ وان تە ژ دەست دا دێ وی دەمی بینی، وەكی ڤێ گۆتنا مەزنان ئەوا دبێژیت (كەس برایێ كەتی نینە و هەڤالێ پاری ناهێتە هاری).
بلا تە چەند خزمەت یان كاروكریارێن باش ئەنجامدا بن، دەما تو هەلنگڤتی ئێكسەر دێ ژ (ئەزبەنی) بیە (بەنی) ئەڤجا هشیاربن كەسێن ژ هەژی و خۆدان بەگراوەندەكێ زانست و مەعریفی و دلسۆز و خودان وژدان بكەنە ئەزبەنی و بەربرس، دا ئەوژی كەسێن مینا خوە بدانیتە جهێن ژ هەژی، ئەگەر نە دێ رۆژ ب رۆژ حال و باردۆخێ مە خرابتر بیت.
