كلاسیكۆیا مه‌زن ریال مه‌درید دژی به‌رشه‌لۆنا
ئه‌ڤرۆ،
جه‌ماوه‌رێ وه‌رزشی تایبه‌ت پشته‌ڤانێن هه‌ردو یانێن ئسپانی ئه‌ڤرۆ ل ده‌مژمێر 5:15 چاڤه‌ڕێ كلاسیكۆیا مه‌زن و بهێزترین دیدارا پێشبینیكری دناڤبه‌را خودانێن ئه‌ردی ریال مه‌درید و هه‌ڤڕكا وێ به‌رشه‌لۆنا ژ چارچووڤێ هه‌ڤڕكیێن گه‌ڕا حه‌فتێ یا خولا پلا ئێكا ئسپانی ئه‌وا دێ ل یاریگه‌ها سانتیاگۆ بیرنابیو ژلایێ دادڤانێ نێڤده‌وله‌تی خوسێ مارییا سانچێز مارتینێز هێته بڕێڤه‌برن.
یانا به‌رشه‌لۆنا ب 22 خالان سه‌رێ لیستێ دهێت و ریال مه‌درید ب هه‌مان خال لێ كێمتریا حه‌فت گۆلان رێزا دویێ دهێت ئه‌وا دێ ب زاخه‌كا بلند هێته دناڤ یاریگه‌هێ دا پشتی ده‌ربازبوونا خوه بۆ قۆناغا 16ێ یا قاره‌مانیا چامپێۆنز لیگ مسۆگه‌ر كری به‌رۆڤاژی یانا به‌رشه‌لۆنا ئه‌وا ئه‌وا د مه‌ترسیا دووركه‌فتنێ دایه، لێ بۆ ڤێ یاریێ هه‌موو بووچوون و پێشبینی دهێنه كرن ژبه‌ركو هه‌ردو تیم د كۆلاسیكۆیان دا هێز و ئاسته‌كێ تایبه‌ت یێ هه‌یی، لدووڤ ئاماره‌یێن هه‌ردو یانا د هێلا به‌ره‌ڤانیێ دا به‌رشه‌لۆنا باشتره ژ ریالێ، د هه‌شت یاریێن بوری دا بتنێ گۆله‌ك ل سه‌ر یانا كاته‌لۆنی هاتیه تۆماركرن و حه‌فت گۆل ل سه‌ر ریالێ بووینه، هه‌روه‌سان هێرشبرێن به‌رشه‌لۆنا باشترن ئه‌وێن20 گۆل هه‌مبه‌ری 19 گۆلان بۆ ریالێ هاتینه تۆماركرن.
ئامارێن هه‌ردو تیما
ل دووڤ ئامارێن هاتینه به‌لاڤكرن یێن فه‌رمی و نه فه‌رمی كو یانا ریال مه‌درید 100 سه‌ركه‌فتن تۆماركرینه هه‌مبه‌ری وێ به‌رشه‌لۆنا 97 سه‌ركه‌فتن ئیناینه و52 جاران وه‌كهه‌ڤبووینه، لێ د یاریا ئه‌ڤرۆ دا یانا به‌رشه‌لۆنا دێ پشتبه‌ستنێ ب چه‌ند ستێرێن خوه كه‌ت نموونه روبێرت لیڤاندۆڤێسكی، عوسمان دیمبلی، سێرجیۆ بۆسكێتس، ئانسۆ فاتی، فرانك كێسی، جۆلیس كۆندی، ماركۆس ئالۆنسۆ، هیكتۆر بیلێرین، راڤینا و كرێستنسن، هه‌مبه‌ری وێ ریال مه‌درید پشتگه‌رمیا هه‌ر ئێك ژ كه‌ریم بنزێمه، ڤێنیسیوس جۆنیرۆ، تۆنی كرۆز، مۆدرێچ، ڤالڤێردی، تیچوامینی، ئه‌نتۆنیۆ رۆدێگر لێ نه‌پشكداریا گۆلپارێز كۆرتۆا ژبه‌ر هنگاتنێ دربه‌ك ریالێ كه‌فتیه.
