كلیلا سه‌ركه‌فتنا مرۆڤى د ده‌ستێن مرۆڤى ب خوه دایه
ئەڤرۆ نیۆز،زنار تۆڤى:
باوه‌رى ب خوه بوون ئێك ژ ستوونێن گرنگ یێن ئاڤاكرنا هه‌ر كه‌سه‌كینه،هه‌كه ل گه‌ل هندێ ژى مرۆڤ خودان پلان و هزره‌كا باش بیت و به‌رێ مرۆڤى ل پاشه‌رۆژا مرۆڤى بیت و ل گه‌ل دا مرۆڤ ب خوه ببیته پالده‌رێ خوه،ل وى ده‌مى مرۆڤ ب خوه دێ بیته ئه‌گه‌رێ سه‌ركه‌فتنا خوه د ژیانێ دا و دێ شێت هاریكاریا كه‌سانێن به‌رامبه‌ر ژى كه‌ت.
عه‌بدولجه‌بار عه‌بدولقهار ڤه‌كۆله‌ر و شاره‌زایه‌كێ جڤاكیه بۆ ئه‌ڤرۆ نیۆز دبێژیت:كلیلا سه‌ركه‌فتنا مرۆڤى ژ پالده‌رێن مرۆڤى ده‌ست پێ دكه‌ن و ئه‌و پالده‌ر ژى دبنه دو جۆر،ئێك ژ وان پالده‌رێن نافخۆیى نه و یێدى ژى پالده‌رێن ژ ده‌رڤه نه،هه‌روه‌سا پالده‌رێن نافخۆیى ژ وێرێ ده‌ست پێ دكه‌ن كانێ مرۆڤى د گیانێ خوه دا چه‌ند هێز هه‌یه و چه‌ند ژ وێ هێزێ دده‌ته كارى؟،دیسا مرۆڤى چه‌ند پلان بۆ ژیانا خوه دانایه و ل دووڤ سیسته‌مه‌كێ رێكخستى كار دكه‌ت؟،هه‌روه‌سا دڤێت مرۆڤ مفاى ژ ده‌مێ خوه و شیانێن خوه ژى وه‌ربگریت،هێشتا دیاركر:پالده‌رێن ده‌رڤه ژى ئه‌ون كانێ چه‌ند دایك و بابێن مرۆڤى و جیران و كه‌سوكارێن مرۆڤى بووینه پالده‌ر بۆ مرۆڤى؟،ئه‌ڤه ژى دبنه هوكاره‌كێ گرنگ بۆ سه‌ركه‌فتنا مرۆڤى،دیسا ئه‌و سیسته‌مێ مرۆڤ دناڤ دا كار دكه‌ت،وه‌كو سیسته‌مێ ئابوورى و سیاسى و جڤاكى،چونكى زۆر جاران ئه‌ڤ سیسته‌مه ژى دبنه هاریكار و رێیه‌ك بۆ سه‌ركه‌فتنا مرۆڤى و زۆر جاران دبنه رێگر ل هه‌مبه‌رى پێشكه‌فتنا مرۆڤى،لێ خالا ئێكێ ئه‌وه،كو هه‌رده‌م مرۆڤ ب خوه دبیته كلیلا سه‌ركه‌فتنا خوه د ژیانا خوه دا،هه‌روه‌سا هه‌كه ده‌وروبه‌رێن مرۆڤى د هه‌ڤكار بن ل گه‌ل مرۆڤى سه‌ركه‌فتنا مرۆڤى دێ پتر لێ دهێت و مرۆڤ دێ گه‌له‌ك پێش دكه‌ڤیت.
ڤه‌كۆله‌ر و شاره‌زایێ جڤاكى ئه‌و چه‌ند ژى گۆت:هه‌موو مرۆڤ نه‌شێن ببنه مرۆڤێن سه‌ركه‌فتى،ژبه‌ركو سه‌ركه‌فتنا مرۆڤى بارا پتر ل سه‌ر جۆرێ هزركرنا مرۆڤى رادوه‌ستیت،له‌ورا هه‌ر مرۆڤه‌كێ هزر بكه‌ت،كو دێ شێت سه‌ركه‌ڤیت،دێ ل دووڤ هزر و پلانا خوه كاركه‌ت و دێ مفاى ژ ده‌مێ خوه و پلانا خوه بینیت و دێ بیته كه‌سه‌كێ سه‌ركه‌فتى د ژیانا خوه دا،لێ ئه‌و كه‌سێ هزره‌كا سه‌قه‌ت هه‌بیت و بێژیت ئه‌ز چو جاران سه‌رناكه‌ڤم،دێ هزرا وى كارتێكرنێ ل سه‌ر ره‌فتار و هزر و كریارێن وى كه‌ت،هێدى هێدى ئه‌و كه‌سه دێ خوه پاشڤه لێده‌ت و ل دوماهیێ نه‌شێت سه‌ركه‌فتنێ ب ده‌ست خوه ڤه بینیت.
عه‌بدولجه‌بارى ئه‌و ژى گۆت:هنده‌ك مرۆڤێن هه‌ین هه‌كه ئێك بێژیتێ تۆ بكر ناهێى و تۆ مرۆڤه‌كێ بێ سه‌روبه‌رى،ل وى ده‌مى ئه‌و مرۆڤ دێ هه‌ولده‌ت كو خوه هه‌مبه‌رى وان كه‌سان ب سه‌لمینیت كو خودان شیانه و دێ پتر كار دكه‌ت و دێ خوه ماندى كه‌ت و ل دوماهیێ دێ سه‌ركه‌فتنێ ب ده‌ست خوه ڤه دئینیت،لێ هنده‌ك مرۆڤ ژى هه‌نه ب وان ئاخفتنان داخبار دبن و نه‌شێن خوه پێش بێخن و بۆ پاشڤه دزڤرن و بێ هیڤیاتى ل ده‌ف په‌یدا دبیت.
ئه‌و ڤه‌كۆله‌ر و شاره‌زایێ جڤاكى دیاركر ژى:بارودۆخێ سیاسى یێ خه‌لكێ كوردستانێ ل سه‌ده‌یا بورى و هه‌تاكو نوكه د ره‌وشا نه‌سه‌قامگیر و ئالۆزدا ده‌رباز بووینه،له‌ورا نه‌بوونا سه‌قامگیریێ د ژیانا مرۆڤى دا دبیته ئه‌گه‌ر كو مرۆڤى ستراتیجیه‌كا دومدرێژ نه‌بیت،هه‌روه‌سا دایك و بابێن مه گه‌له‌ك ده‌رده‌سه‌رى و ره‌ڤ و مالوێرانى دیتینه ل سه‌ده‌یا بورى دیتینه،له‌ورا ئه‌ڤه هه‌موو بووینه هوكار كو مرۆڤێ كورد نه‌شیایه ب دروستى هزره‌كا دومدرێژ هه‌بیت،له‌ورا ب گشتى جڤاكێ مه خودان هزره‌كا كورته و ئه‌ڤه ژى ڤه‌دگه‌ریت بوو نه‌بوونا سه‌قامگیریێ د وه‌لاتێ مه دا.