كه‌س ژ به‌ر ترس و برسێ ناره‌ڤیت
وه‌كو دیار ده‌مه‌كه بابه‌تێ چوونا وه‌لاتیێن كوردستانێ بۆ ده‌رڤه‌ی وه‌لاتی د راگه‌هاندن و سۆسیال میدیان دا دئێته به‌حسكرن و ب بۆچوونێن جودا جودا. زۆربه‌ی بۆچوونان ل سه‌ر وێ چه‌ندێ دكۆكن، كو هۆكارێ چوونا گه‌نجان ژ بێكاری و بێ مووچه‌ی و نه سه‌قامگیریا ره‌وشا سیاسیه. لێ ب بۆچوونا من كه‌س نه ژ ترسێ و نه ژی ژ برسێ وارێ خوه بج هناهێلیت. ئه‌گه‌رێ سه‌ره‌كی شكاندنا وێ پرا باوه‌ریێ یه یا كو د ناڤبه‌را ده‌ستهه‌لات و وه‌لاتیان دا، كو ده‌مه‌كه ژ ناڤچوویه. نه‌مانا ڤێ بێ باوه‌رییێ چه‌ندین قووناغ ده‌رباز كرینه، یا كو بوویه سه‌ده‌م ژ بۆ شكاندنا سنۆرێن وه‌لاتان و سیاربوونا گه‌میێن بێ گه‌میڤان، تنێ ژ به‌ر وان بیرهاتنایه كو نه ئاریشا مووچا هه‌بوو نه‌ژی حوكمه‌ت یا مفلس بوو وه‌كی ئه‌ڤرۆ،به‌لكو بێ زاریبوونا خه‌لكی ڤه‌تگه‌ریێت بۆ ئه‌وان رۆژێن پاره هه‌ی لێ دیسا ژی پشكدار نه‌بوون د مه‌زاختنا وێ دا چونكو دزیكه‌ر و گه‌نده‌ل هه‌بوون و هه‌می لایه‌ن و پارت زی رێكدكه‌فتن ل سه‌ر دابه‌شكرنێ. لێ نوكه پاره ژی نه‌ما.. ئێكگرتن و ئێكرێزی ژی نه‌ما، ئه‌ڤه ئه‌و رۆژ هات كو ئه‌گه‌ر ده‌ستهه‌لاتدار كار نه‌كه‌ن ژ بۆ دروستكرنا پره‌كا دی، دێ دیرۆكا كوردان ب هه‌مان سیناریۆ چه‌ند باره بیت، ژ به‌ر هه‌مان سیاسه‌ت و كریارن یێن كو ب ئه‌گه‌رێ وان وه‌لاته‌كێ بێ نه‌خشه‌ینه سه‌ر رییێ ئه‌ردی .
