كه‌كێ من زاڤایه
د. ئەمجەد عوبەید
ده‌ستێ خۆ یێ د بن كه‌فشێ ویرا بربوو، ب ماقویلی ل سه‌ر مۆكیتێ سۆررا ده‌رباز د بوون، سترانا “كه‌كێ من زاڤایه هایێ” هۆل د هه‌ژاند، خه‌ونا به‌ری پێنج سالان پێكڤه دیتی، ئه‌ڤرۆ بۆ راستی، یاریێن ئاگری ل هه‌ردو ره‌خ و پێشی و پاشییا وان به‌رف بانێ هۆلێ فڕین، كه‌س و كار و دوست هه‌ڤالان هه‌ردو لایێن وان گرتبوون، ده‌ست د قوتان و سه‌ما دكرن، ئه‌وان ژی ب هێمنی و ب لێڤێن گڕنژی رێكا خو د بڕی. ژ نیشكه‌كێڤه خوهه‌كا سار ل سه‌ر له‌شێ پیرانێ بیست و پێج سالی ژ سه‌ری هه‌تا بنێ پییان چوو خوار، پی یێن وی سست بوون، چۆكێن وی نه‌شییان كه‌له‌خێ وی راگرن، هه‌ول دا هه‌می هێزا خۆ ب كاربینیت دا چ وه‌ستییان ل سه‌ر دێمێ وی دیار نه‌بیت، ئه‌ڤرۆ ئه‌و رۆژه یا ژمێژه دایبابێن وی ل هێڤییێ، ل هێڤییێ كو ئێكانەیێ خۆ ببینن زاڤا، نه‌ڤییا ئه‌و خۆشییا دلێ وان مشت كری ب نه‌خوشییێ ب هێته گوهۆڕین.
چه‌ند پێنگاڤه‌ك د هاڤێت بێ هێزیێ ئه‌و پتر داگیر دكر، نه دڤیا خو راده‌ستی ڤێ وه‌ستیانێ بكه‌ت، لێ پشتی نه‌چار بووی ده‌ڤێ خۆ بره بن گوهێ هه‌ڤژینا خۆ و هێدی گۆتێ “ ده‌ستێ من توند بگره و ملێ خۆ باش بده به‌رملێ من، پی یێن من یێن سست بووین و من هێزا ب رێڤه‌چوونێ نه‌مایه“. ب كۆته‌كی خۆ گه‌هانده جهێ بووك و زاڤا لێ دروینن.
چه‌ند ده‌م د بۆری ئێشانێ ئه‌و پتر د گڤاشت، به‌ری هێزا خۆ راگرتنێ ژده‌ست ب ده‌ت ب زۆری گوستیلا خۆ یا زاڤاتیێ ژ تلا خۆ كر و گۆته هه‌ڤژینا خۆ: “ ئه‌ڤه ئه‌مانه‌تی ته“. و ب ئێك جاری راده‌ستی نه‌خوشییێ بوو.
هۆلا شه‌هیانێ ژ ده‌واتییان ڤالا بوو.. هۆلا پێشوازییا نه‌خۆشان ل نه‌خۆشخانێ ژ مرۆڤان پڕ بوو. نۆژداران هه‌می زانین و شیانێن خۆ ئێخستنه كار، چ مفا نه‌بوو. پێنجی رۆژێن ره‌به‌ق بووكا ره‌به‌ن بۆ ئێك چركه ژی ده‌ستێ وی به‌رنه‌دا.
رۆژا پێنجی و ئێكێ، پشتی خه‌لكی هه‌مییێ گۆڕستان ب جه هێلای، ئه‌وێ له‌وه‌ندیێن خۆ به‌ردان وپڕچا خۆ د بن بسكان را بڕی و هنده‌ك ژ ئاخا گۆڕێ وی ب سه‌رێ خۆ وه‌ركر، كوستیلا خۆ ئێخسته سه‌رێ له‌وه‌ندییه‌كی و یا وی ئێخسته له‌وه‌ندیێ دی و سه‌رێ خۆ به‌ره‌ف ئاسمانان بلند كر. هه‌می تشت د بێ ده‌نگ بوون ب تنێ كوتره‌كا شین ل هنداڤی وێ دفڕی و سترانا “ كه‌كێ من زاڤایی هایێ” ڤه‌دلۆری، ئه‌وێ ژی سه‌ما دینا ل به‌ر ئاوزاێن وێرا دكر.
