كه‌ڤالان ل دووف داخوازیان چێ دكه‌ت
هه‌له‌بچه، عه‌زیز هه‌ورامی:
شێوه‌كارا ئیراقی (ره‌نا ئه‌حمه‌د) كو خه‌لكا باژێرێ سه‌لاحه‌دینه، د دیداره‌كێ دا بۆ رۆژناما ئه‌ڤرۆ دیاركر كو ئه‌و یا خۆشحاله وه‌كو شێوه‌كاره‌كا ژن پشكداریێ د پێشانگه‌هه‌كا هه‌ڤپشكدا بكه‌ت ل باژێرێ سلێمانیێ كو شێوه‌كارێن هه‌موو پارێزگه‌هێن ئیراقێ دوێ پێشانگه‌هێ دا د پشكدارن و گۆت: من ب دو كه‌ڤالان پشكداری دڤێ پێشانگه‌هێ دا كریه، ناڤه‌رۆكا كه‌ڤالێن من ژی ل دوور وان ئێش و ئازارانه ئه‌وێن ل ئیراقێ ژن تووش دبنێ.
هه‌روه‌سا گۆت: ل پرانیا باژێرێن ئیراقێ من پشكداری د پێشانگه‌هێن هه‌ڤپشكدا كریه و كه‌ڤالێن من هاتینه نیشادان، هه‌روه‌سا مه سه‌نته‌ره‌ك ل باژێرێ سامه‌را هه‌یه ئه‌م خولان ژبۆ فێركرنا وێنان ڤه‌دكه‌ین و ئه‌و زارۆیێن ژیێ وان نه‌ه سال و پێهه‌ل دهێنه ڤی سه‌نته‌ری و گه‌له‌ك مفای ژێ دبینن، بۆ زانین هه‌تا نوكه من پشكداری د چو پێشانگه‌هێن ده‌رڤه‌ی وه‌لاتی دا نه‌كریه، به‌لێ ل ڤێ دووماهیێ دو داخوازنامه بۆ من ژوه‌لاتێ مسرێ و توركیا هاتینه دێ چم پشكداربم، ئه‌ز كه‌ڤالێن خوه دفرۆشم و بهایێ وان ژ 100 دۆلاران ده‌ست پێدكه‌ن و هنده‌ك جاران ل دووف داخوازیان كه‌ڤالان چێدكه‌م.
