كه‌ڤال رێیا ئێكانه‌یه كو بشێم ئه‌و تشتێن د دلێ مندا بگه‌هینم
زاخۆ، عه‌لی حاجی:
ناجیا نیسان، كچه‌كا شێوه‌كاره ل زاخۆ دژیت، د دیداره‌كێ دا بۆ رۆژناما ئه‌ڤرۆ دیاركر كو گه‌له‌ك تشت د دلێ وێ دا هه‌بوون، به‌لێ ب رێیا وێنه‌ی دشیا وان تشتان ژ دلێ خوه بینیته ده‌رێ و ب رێیا ته‌له‌ڤزۆنێ ژی وێ خوه فێری چێكرنا وێنه‌یان كر.
ناجیایێ گۆت: د ژیه‌كێ بچووك دا من ته‌ماشه‌ی ته‌له‌ڤزیۆنێ دكر و هێدی هێدی فێری چێكرنا كه‌ڤالان بووم و ب رێیا چه‌ند خۆله‌كان ژی من زێده‌تر شیانێن خوه به‌رب پێشڤه‌برن، وێنه‌یێن من هه‌موو د هزری نه، ژبه‌ركو دخوازم هه‌ر كه‌سه‌كێ وێنێن من ببینیت ل به‌ر راوه‌ستیت و هزرێ تێدا بكه‌ت، كه‌ڤال رێیا ئێكانه‌یه كو بشێم ئه‌و تشتێن د دلێ مندا هه‌ین ئه‌ز بگه‌هینم و دگه‌ل هه‌ر كه‌ڤاله‌كی ژی ئه‌ز نامه‌یه‌كێ دگه‌هینم، ئه‌و كه‌ڤالێن ئه‌ز چێدكه‌م گرێداینه ب ژیانێ ڤه و حه‌ز ژچێكرنا وێنه‌یێن چاڤلێكه‌ر ناكه‌م، ژبه‌ركو ئه‌و ناما دگه‌هینم بێ كو باخڤم دخوازم بگه‌هیت.
ل دووماهیێ گۆت: پشتی من خواندنا خوه ب دووماهی ئینای ئێدی دێ زێده‌تر پشكداریێ د پێشه‌نگه‌هان داكه‌م، هه‌ر چه‌نده من پێشانگه‌هه‌كا تایبه‌ت ژی ڤه‌كری یه، ئه‌و كه‌ڤالێن ئه‌ز چێدكه‌م مه‌ره‌ما من ژێ فرۆتن نینه، به‌لێ یا گرنگتر ئه‌وه بشێم كاره‌كێ باش بكه‌م و په‌یاما خوه بگه‌هینم و كه‌ڤالێن من گرێداینه ب ئافره‌تێ ڤه كا چاوا جهێ وان دناڤ جڤاكی دا به‌رزه دبیت.
