كه‌ڤال و په‌یكه‌ران ژ كاغه‌ز و قۆدیكان چێدكه‌ت
دهۆك، زنار تۆڤی:
شێوه‌كار و مۆزیكژه‌ن سۆندای ته‌ته‌ر، كو خه‌لكێ باژێرێ عامۆدێ یه ل رۆژئاڤایێ كوردستانێ و نوكه ل وه‌لاتێ سویسرا دژیت، ل ده‌ستپێكێ وی كارێ مۆزیكێ دكر و سازه‌ك ب داركێن مۆتان چێكربوو، پاشان ده‌ست ب چێكرنا كه‌ڤال و په‌یكه‌ران كریه، د دیداره‌كێ دا بۆ رۆژناما ئه‌ڤرۆ دیاركر كو ل چه‌ند رۆژێن بۆری وی پێشانگه‌ها تایبه‌ت یا شێوه‌كاری و په‌یكه‌رسازیێ ل باژێرێ تۆنێ ل سویسرا ڤه‌كریه، ئه‌ڤ پێشانگه‌هه دێ هه‌تا 13 مه‌ها ئادارێ یا به‌رده‌وام بیت، وی ب 17 په‌یكه‌ر و 20 كه‌ڤالان پشكداری د وێ پێشانگه‌هێ دا كریه، ئه‌و كه‌ڤال و په‌یكه‌ر ژ رۆژنامان و كاغه‌زان و قۆدیكێن كۆلایێ و دار و به‌ران و پرتێن ئاسنان دچێكرینه، ل رۆژا ئێكێ یا ڤه‌كرنا پێشانگه‌هێ ئاهه‌نگه‌كا سترانان ژی هاتبوو گێڕان.
ناڤهاتی گۆت: پێشانگه‌ها من ب ناڤێ (زایینا ژ مرنێ) ب واتایا هندێ، كو گه‌له‌ك جاران ئه‌م وه‌كو ملله‌تێ كورد ژ مرنێ رزگار بووینه، ناڤه‌رۆكا بابه‌تێن پێشانگه‌هێ ژی ل سه‌ر بابه‌تێن مرۆڤایه‌تیێ بووینه، پشكه‌ك ژی ل سه‌ر فولكلۆرێ كوردی و سرۆشتێ كوردستانێ بوویه، د هه‌مان ده‌مدا من چه‌ندین پارچه مۆزیكێن كوردی د ناڤا وێ پێشانگه‌هێ دا ژه‌نین و ئاماده‌بوویان ژی خۆشیه‌كا تایبه‌ت ژێ دیت، بۆ زانین ژی به‌ری ئه‌ز بهێمه سویسرا بۆ دمێ چه‌ند سالان ئه‌ز ل دهۆكێ بووم و چه‌ندین كارێن هونه‌ری ل دهۆكێ من ل وێرێ ئه‌نجام داینه.
