كورته فلمه‌كێ كوردی د به‌ریكانا فلمه فیسته‌ڤاله‌كا ئوردنێ دا پشكداره
ئه‌ڤرۆ:
فیكه، كورته فلمه‌كێ كوردیه ژ ده‌رهێنانا (عادل عه‌بدولره‌حمان) ی یه، ل پشكا به‌ریكانا كورته فلمان ل گه‌ڕا 13 یا فلمه فیسته‌ڤالا كه‌رامه بۆ فلمێن مافێ مرۆڤی پشكداره و هه‌ڤڕكیێ بۆ وه‌رگرتنا خه‌لاتی دكه‌ت، دوهی رۆژا سێشه‌مبی 20/12/2022 ئه‌ڤ كورته فلمه ل فیسته‌ڤالا ناڤهاتی هاته نیشادان.
عادل عه‌بدولمه‌جید، ده‌رهێنه‌رێ فلمێ (فیكه) دیار كر كو فلمێ وی یێ كو دوهی ل گه‌ڕا 13 یا فلمه فیسته‌ڤالا كه‌رامه بۆ فلمێن مافێ مرۆڤی هاتیه نیشادان پشكداره و هه‌ڤڕكیێ بۆ وه‌رگرتنا خه‌لاتی باشترین كورته فلم دكه‌ت و بۆ رووداو گۆت: “كورته فلمێ من دگه‌ل 14 كورته فلمێن دی د به‌ریكانا كورته فلمێن فیسته‌ڤالا ناڤهاتی دا پشكداره كو ئه‌ڤ كورته فلمه ژ هه‌ر ئێك ژ وه‌لاتێ (فه‌ره‌نسا، ئێرله‌ندا، جه‌زائیر، فه‌له‌ستین و چه‌ندین وه‌لاتێن دی) د به‌ریكانێ دا پشكدارن”.
ناڤهاتی ئاماژه ده وێ چه‌ندێ كو دوهی ئه‌و پشكداری په‌نه‌له‌كی ژی بوویه و تێدا به‌حسێ رێگریێن هه‌مبه‌ر سینه‌مایێ و چاره‌سه‌ریان كریه، بتایبه‌تی پشتی به‌لاڤبوونا ڤایرۆسێ كۆرۆنایێ، هه‌روه‌سا به‌حسێ پشكداربوونا فلمسازان د فیسته‌ڤالێن سینه‌مایێ دا و به‌لاڤكرنا به‌رهه‌مێن وان د پلاتفۆرمێن به‌لاڤكرنا فلمان دا و بده‌سته‌ڤه‌ئینانا داهاتی ژی هاته‌كرن بۆ وێ چه‌ندێ بشێن د كارێن خوه دا د به‌رده‌وام بن.
كورته فلمێ (فیكه) به‌حسێ سێ زارۆیێن كه‌مپا دۆمیز ل پارێزگه‌ها دهۆكێ دكه‌ت، ژ ئه‌گه‌رێ برسێ نێچیرا كۆتره‌كێ دكه‌ن، به‌لێ دووڤ دا د ئاهه‌نگا رۆژا جیهانی یا ئاشتیێ دا وێ كۆترێ ئازاد دكه‌ن.
گه‌ڕا 13 یا فلمه فیسته‌ڤالا كه‌رامه بۆ فلمێن مافێ مرۆڤی ل 15ی كانوونا ئێكێ یا سالا 2022 ل ئوردنێ ده‌ستپێكریه و ئه‌ڤرۆ رۆژا 21/12/2022 دێ ب دووماهی هێت و خه‌لات دێ هێنه به‌لاڤكرن،
رێكخه‌رێن ڤێ فیسته‌ڤالێ ئه‌ڤێ روودانا هونه‌ری ب فیسته‌ڤالا ئێكێ ل سه‌ر ئاستێ ئوردنێ و وه‌لاتێن عه‌ره‌بی دده‌نه نیاسین، بتایبه‌تی ب مافێن مرۆڤی.
عادل عه‌بدولمه‌جید، ل سالا 1987 ل دهۆكێ ژ دایكبوویه، ده‌رچوویێ په‌یمانگه‌ها هونه‌رێن جوانه ل دهۆكێ، پشكا درامایێ ل كۆلیژا هونه‌رێن جوان ب دووماهی ئینایه، ده‌رهێنه‌رێ چه‌ندین كورته فلمان و به‌رهه‌مه‌كێ شانۆیێ یه.
