كورتە فلمەك ل دۆر (بلاک مێلا) ئەلكترۆنی هاتە چێكرن
چنار ئەحمەد:
رێڤەبەرێ دەزگەهێ هیڤی پرێس و سەرۆكێ كەمپینا هیڤی دیار كر كو بلاک میلا ئەلكترۆنی (الابتزاز) دیاردەكا بەربەلاڤە ل جیهانێ و تاوانەكا سەردەمیە، ب لێبوورین ڤە هەرێما كوردستانێ ژی ژێ بێ بەهر نەبوویە ژ بەر ڤێ چەندێ ژی گرۆپێ هیڤی رابوویە ب چێكرنا كۆرتە فلمەكی ب ناڤێ (نامەیێن رەش) ل دۆر بابەتێ ناڤهاتی.
هیوا بێهی، رێڤەبەرێ دەزگەهێ هیڤی پرێس و سەرۆكێ كەمپینا هیڤی بۆ رۆژناما ئەڤرۆ دیار كر كو ل دەستپێكا دامەزراندنا گرۆپێ هیڤی یێ خوەبەخش وان مۆلەتا كاری یا دەمكی ژ پارێزگەها دهۆكێ وەرگرتبوو، بەلێ پشتی وان مۆلەتا فەرمی ژ رێڤەبەریا گشتی یا رەوشەنبیری و هونەری ل پارێزگەها دهۆكێ وەرگرتی كار و چالاكیێن خوە بەرفرهتر لێكرن ب مەرەما هشیاركرنا ئافرەتان ژ مەترسیا بلاک مێلا ئەلكترۆنی، ژ بەر كو پتریا جاران ئافرەت تووشی بلاک مێلیێ دبن ل دەمێ وێنە ڤیدیۆیێن هەستیار ب هەر مەرەمەكا هەبیت بۆ زەلامان فرێدكەن و دووڤ دا دكەڤنە بن گەفێن بەلاڤكرنێ یان ژی ب رێیێن جودا ژ مۆبایلێن وان دهێنە هاككرن و نهێنیێن وان دهێنە دزین و ئافرەت دبنە قوربانی ڤان كریاران و ژ لایەكێ دی ڤە ئارمانجا وان ئەوبوو وان گەنجان هشیار بكەن یێن كو بزاڤا بلاک مێلیێ دگەل ئافرەتان یان ژی زەلامان دكەن كو ل دووڤ یاسایێ ئەڤ كەسە دهێنە سزادان و گۆت: «د بەردەوامیا كار و چالاكیێن خوە دا گرۆپێ مە ب هەماهەنگی ل گەل پەیمانگەها هونەرێن جوان ل دهۆكێ ب سپۆنسەریا كۆمپانیەكا كەرتێ تایبەت رابووینە ب چێكرنا كۆرتە فلمەكی ب ناڤێ (نامەیێن رەش) كو ناڤەرۆكا ڤی كورتە فلمی بەحسێ ئێك ژ رێیێن بلاک مێلییا ئەلكترونی و دەرئەنجامێ خوەش باوەریا ئافرەتان نیشاددەت، پشتی ل سۆشیال میدیایێ هاتیە بەلاڤكرن رەنگڤەدانەكا باش هەبوو و ئەم شیاین ب گەهینە ئارمانجەكا مەزن، ئەڤە د دەمەكی دایە ل دەستپێكا دامەزراندنا گرۆپێ ناڤهاتی مە پرۆژەك ل ژێر ناڤێ (رەش هنێریا ئەلكترونی ل دژی ئافرەتان بەرپرسیارەتیا مە هەموویانە) پێشكێش كربوو و رێكخراوا (ئینتەرنیۆز) یا ئەمریكی پشتەڤانیا دارایی لێ دكر».
ناڤهاتی گۆت: «داخوازێ ژ وان هەموو كەسان دكەم یێن مۆبایلا بكاردئینن باوەریا خوە ب شاشێن مۆبایلا نەئینن و نهێنیێن خوە تێدا نەپارێزن داكو تووشی چ حالەتێن نەخوەش نەبن و دپاراستی بن، ژ بەر كو (الابتزاز) رەش هنێریا ئەلكترونی پروسەكا بدەستڤەئینانا دەستكەفتێن ماددی، سێكسی یان بەرژەوەندیێن تایبەت یێن بێ رەوشتیێ نە ب رێیا گەف و ترساندنا كەسێ قوربانی ب بەلاڤكرنا وێنە و ڤیدیوێن هەستیار یان ژی پێزانینێن نهێنی یێن گرێدای ویڤە یە».
ل دوماهیێ ناڤهاتی ئاماژە دا وێ چەندێ كو پشتی دەمێ گرێبەستا گروپێ هیڤی دگەل رێكخراوا ئەمریكی ب دووماهی هاتی وان وەكو گرۆپەكێ خوەبەخش شیان دەزگەهێ (هیڤی پرێس) دامەزرینن و ل سەندیكا روژنامەنڤیسێن كوردستانێ تۆمار بكەن و ب فەرمی مۆلەتا كاركرنێ وەرگرن و گۆت: «كاركرنا مە ل پاشەرۆژێ دێ خزمەتكرن بیت د بیاڤێ راگەهاندنێ و هشیاركرنێ و گەشەپێدانا رۆژنامەڤانی ل هەرێما كوردستانێ، ژ بەر كو پتریا ئەندامێن مە رۆژنامەڤانێن ئەكادیمی نە، هەروەسا مە ل بەرە دووبارە دەست ب چالاكیێن كەمپینا هیڤی بكەینە ڤە ب شێوەیەكێ باشتر و جوداتر خزمەتا گەنجان و ئافرەتان بكەین».
