كوردان خوه رۆڤه‌كر یان خه‌لكی كرنه قه‌هره‌مان
مه‌زن دبێژن: هه‌كه تو مرۆڤه‌كێ باش بی، دێ به‌ندكه‌كێ سۆر و زه‌ر بی و ب سه‌ر ده‌رازینكا خوه ڤه‌بی. ئه‌زێ ل وێ هزرێ ڤێ جارێ كورد به‌ندكه‌كێ ره‌نگینن و یێ ب سه‌ر ده‌رازینكا مالا خوه‌ڤه هاتینه هه‌لاویستن. ئه‌ڤ چیره ژ دو لایاڤه دهێته دیتن، گه‌له‌ك وه‌سا هزر دكه‌ن، وه‌ختێ ئه‌ورۆپی و ئه‌مریكیا ڤیا ئێكی بكه‌نه قه‌هره‌مان، گه‌له‌ك یا ب ساناهیه، ڤێ گه‌رێ ژی، كورد یێ دبایێ فه‌له‌كا وان دا نێڕن.
بۆچوونه‌كا دی یا هه‌ی، دبێژیت: كوردان ب خوه خوه رۆڤه‌كر، له‌وا بالا خه‌لكی بۆ خوه كێشا. ئه‌ڤه ژی ژ وێ سه‌ربۆرێ دهێت ئه‌ڤا چه‌ند سالێن بۆری كورد تێرا بۆرین و شیاین باوه‌ریێ بۆ خه‌لكی چێكه‌ن كو مله‌ته‌كێ بكێر هاتینه و دشێن به‌رژه‌وه‌ندیێن خه‌لكه‌كێ دی (نه‌خاسمه دنیایا دیمۆكراسی) بپارێزن.
به‌لێ هه‌كه ئه‌م سه‌حكه‌ینه تێكهه‌لێن ئه‌ورۆپی و ئه‌مریكیا ل گه‌ل كوردان بۆ پێنجی سالێن بۆری دزڤرن، گه‌له‌ك ژ رۆژنامه‌ڤان و مرۆڤدۆستان ل وه‌ختێ شۆڕشێ قه‌ستا كوردستانێ یا كری، پتریا وان مله‌تێ كورد ب مله‌ته‌كێ زولم و كۆته‌كی لێكری سالۆخداینه، به‌لێ د ڤان پێنجی سالێن بۆری دا گه‌له‌ك ده‌رده‌سه‌ری ب سه‌رێ مله‌تێ كورد هاتینه و كه‌سێ خوه لێ نه‌كریه خودان، میناك ژی د مشه‌نه، هه‌وجه ناكه‌ت به‌حس بكه‌ین. هه‌تا سالا (1991) ژی ره‌وشه‌نبیر و رۆژنامه‌ڤانێن ئه‌ورپی ـ ئه‌مریكی نه‌شیابوون ده‌وله‌ت و قرال و مه‌زن و میرزادێن خوه رازی كه‌ن كو جاره‌كێ د تانا كوردان بچن.
پشتی سه‌رهه‌لدانا (1991) هنده‌ك گاڤێن شه‌رمین ژ لایێ چه‌ند ده‌وله‌تاڤه هاتنه هاڤێتن، كو خێچا (36 لوكه) هاته ده‌ستنیشانكرن، كو ئێدی گه‌فا عیراقێ ل سه‌ر كوردان نه‌ما، ناهێلن فرۆكێن عیراقێ ل سه‌ر وێ خیچێ بفڕن. پاشی كورد بوونه فلمه‌ك و دنیایا دیمۆكراسی سه‌حدكرێ، هه‌ر چه‌نده ل ده‌ستپێكێ كوردان هنده‌ك گاڤێن شاش هاڤێتن، وه‌كی قه‌ومینێن سالێن نوتان كو كورد ب سه‌روچاڤێن ئێكڤه بوون، پاشی ل سالا (1998) ب چاڤدێریا ئه‌مریكا كورد پێكهاتن، ئێدی شه‌ڕێ ناڤخوه ژی نه‌ما.
ژبلی به‌رژه‌وه‌ندیان، فلمێ كوردان پشتی سالا (2003) پتر هاته ئازراندن، نیڤ دیمۆكراسیه‌ته‌ك ل هه‌رێما كوردستانێ په‌یدا بوو، ئێدی كوردان هزر د ئاڤاكرن و ژیانێ دا كر، ئه‌ڤ دیمه‌نه پشتی سالا (2005) زیق بوو، وه‌ختێ هه‌لبژارتن هاتینه كرن، پاشی ل سالا (2009) هه‌لبژراتن جاره‌كا دی هاتنه كرن، ئێدی كریارا دیمۆكراسیه‌تێ زیق بوو، هه‌ر چه‌نده ل بازا (مستوی) پێدڤی نه‌بوو، هه‌تا سالا (2013) ئێدی باوه‌ریه‌كا تمام بۆ دنیایا دیمۆكراسی چێبوو دێ ئه‌ڤ مله‌ته بكێر خوه هێن، ئێدی ئه‌و دشێن خوه برێڤه‌ببه‌ن.
د ڤی دیمه‌نێ نوو دا، كورد یێ ب هه‌می شیانێن خوه هه‌ڤرووشی داعشێ دبن، یێ شه‌ڕێ وان دكه‌ن، یێ قه‌هره‌مانا قۆربانی ڤێ ئاخێ دكه‌ن، ڤان كریارێن وان بالا خه‌لكی بۆ خوه راكێشا، ئێدی ژبلی گۆتن و نڤیسینان، بۆ وان (جله كه‌تیه مله) د ناڤ ڤێ گێله‌شۆكێ دا ئه‌وێن ب كێر دیمۆكراسیه‌ت و ژیانێ دهێن تنێ كوردن، ژ نوو وان ژی ده‌ستێن خوه هه‌لدان و چه‌ك و جه‌بلخانه ژی بۆ كوردان فرێكرن، هه‌ڤلێر پتری به‌غدا بۆ ناڤه‌نده‌كا سیاسی، به‌لكی پتر وه‌كی پایته‌ختێ ده‌وله‌ته‌كێ سه‌ره‌ده‌ریێ ل گه‌ل دكه‌ن. ژبه‌ر ڤێ چه‌ندێ كوردا ب خوه خۆ رۆڤه‌كر (ئسبات)، ئه‌و ب خوه بوونه قه‌هره‌مان، به‌ری نوكه ژی هه‌ر قه‌هره‌مان بوون، به‌لێ وان نه‌دڤیا بزانن.
