كوردستانه‌كا ئازاد یان شامه‌كا شه‌ریف
دبێژن خه‌لكی گوته پاشایێ خوه: پاشا عێل بریا، ئینا پاشای گوتێ: گول نخینا (مه‌ره‌م گۆل شلێرا) بچینن. هه‌رگاڤا به‌ر و گومتله‌ك لێك تشقلین، ئێكسه‌ر ئه‌م هه‌موو دێ بێژین ئه‌ڤه‌یه ئه‌و ده‌وله‌تا مه‌دڤێت یان ژی ب ڤی تیز و به‌رگیزی مه ده‌وله‌ت نه‌ڤێت یان ژی بۆ مه هێشتا گه‌له‌ك زوییه!. هه‌رچاوا بیت حه‌قێ خه‌لكییه، ڤان نقینكا بگرن و پاڤێنه حكومه‌تا خوه، به‌لێ من دڤێت ل سه‌ر دو تشتێن ژێك جودا براوه‌ستم، كو نه لسه‌ری و نه لخارێ چ تێكه‌لی دگه‌ل ئێك نینه، قه‌تلازی و گرفتارێن ئابووری و په‌نزین و كاره‌ب و ئاڤ و جادده و هه‌موو خلمه‌تێن دی چ گرێدان ب ده‌وله‌تبوونێ ڤه نینه، هه‌كه ئه‌م به‌رئاقلانه سه‌حكه‌ینه ڤێ چیڕی. ده‌وله‌ت تێگه‌هه‌كێ نوویه كو ئه‌ڤه نێزیكی دو چه‌رخایه هاتیه د مه‌یدانا سیاسی دا، نه‌خاسمه ل رۆژهه‌ڵاتا ناڤین پشتی ده‌وله‌تا ئۆسمانی نه‌مای، ژبه‌ر ڤه‌رێژێن وێ ئمیپراتۆریا مه‌زن چه‌ند ده‌وله‌ته‌ك چێبوون، هه‌رئێك ژی بناڤه‌كی، هنده‌ك ژی ل سه‌ر بنیاتێن دینی و مله‌تینی و جۆگرافی و نفشی هاتنه دانان. گه‌له‌ك ژ وان ده‌وله‌تا د ده‌ستودانه‌كێ گه‌له‌ك خرابدا چێبوون و بوونه ده‌وله‌ت و هێدی هێدی به‌رپێن خوه خوه‌شكرن و شیان قۆناغێن نه‌خوه‌ش و به‌رته‌نگ ده‌رباسكه‌ن، ده‌وله‌تێن عه‌ره‌بی میناكێن به‌رچاڤن كو چ چنه‌یێ هه‌ڵاڤێتین و نوكه هنده‌ك ده‌وله‌تێن باش و بهێز ژێ په‌یدابووینه. گه‌له‌ك ده‌وله‌ت نوكه هه‌نه، هه‌ر چه‌نده گرفتاریا په‌نزین و مه‌هیانا و كاره‌بێ نینه، مینا ده‌وله‌تێن كه‌نداڤێ عه‌ره‌بی كو د ژیانه‌كا ته‌نا و خوه‌ش و بله‌زه‌ت دا دژین، به‌لێ چ سه‌نگا سیاسی و جیوَپوَلیتیكی نینه، نه‌شێن رۆله‌كێ مه‌زن د ده‌ڤه‌رێ دا بگێرن و دیمه‌نێن نوو یێن سیاسی چێكه‌ن. به‌لێ پا ده‌وله‌تن و ئه‌ڤه ناهێته مانده‌لكرن. نوكه كوردستان ده‌وله‌ت نینه، به‌لێ یا به‌رپێكێن خوه د شدینیت به‌لكی لڤێرێ یان لوێرا هه‌نێ ده‌لیڤه‌ك بهێت و بۆ خوه ده‌وله‌ته‌كێ چێكه‌ن. به‌لێ ئه‌و ده‌وله‌تا ل كوردستانێ ژدایك دبیت وه‌كی چ ده‌وله‌تێن دی نینه، هنده‌ك ژوان ده‌وله‌تا بخێرا ڤی و وێ هه‌نێ یان به‌رژه‌وه‌ندیێن ڤی و وێ هه‌نێ چێكرینه، گه‌له‌ك ژ وان ژی بوونه پارچێن بچویك دا سوبه‌هی نه‌بنه گه‌ف بۆ سه‌ر ده‌وله‌تێن مه‌زن مینا ئه‌مریكا و ئه‌ورۆپا. ئه‌ڤ ده‌وله‌تا ل كوردستانێ ژدایك دبیت، كه‌دا خه‌باته‌كا دوور و درێژه، كه‌دا قۆربانیه‌كا بێ هژماره، كه‌دا سه‌دسالێن ده‌ربه‌ده‌ری و خوَلیسه‌ری و ره‌ڤ و ترس و برس و شه‌ڕ و نه‌ڤه‌حه‌ویانی َیه، ئه‌رێ هه‌كه ده‌وله‌تا مه ده‌رهاڤێژا (افراز) ڤان تشتا بیت چ تێكهه‌لی و گرێدان بقه‌تلازیا په‌نزین و كاره‌بێ ڤه هه‌یه! نه‌خێر، ژبه‌ركو ئه‌و تشتێن مه گۆتین د روحینه و دپیرۆزن. هه‌ر لسه‌ر ڤێ چیڕێ، رۆژنامه‌ڤانه‌كێ نفشپه‌رێسێ ترك گۆته (ئیسماعیل به‌شكچی): تو چاوا پشته‌ڤانیا كوردا دكه‌ی كو ئه‌ڤ پێزه‌ڤه‌نگی و نه‌عه‌داله‌تی و دره‌و و دزی دناڤ دا د به‌لاڤن و لسه‌ر ڤی بنیاتی ده‌وله‌ته‌كێ بۆ خوه دانن. به‌شكچی گۆتێ: ده‌وله‌ته‌كا خراب و پێزه‌ڤه‌نگ یا كوردا بخوه چێتره ژ حوكمێ كه‌سه‌كێ بیانی (هه‌كه یێ دیموَكراسی ژی بیت). ڤێجا دڤێت لسه‌ر ڤی بنیاتی ئه‌م هه‌موو ڤان تشتا و ده‌وله‌تێ پێكڤه نه‌گرێده‌ین.
