كوردستانێ پێدڤی ب هاوردەكرنا پیڤازان نینە
ئەڤرۆ
سولین سلێمان
بهایێ پیڤازان ل ناڤا هەرێما كوردستانێ د بلندبوونێدایە، ل هندەك جهان ژی بهایێ كیلۆیەكا پیڤازا بچیتە سێ هزار دیناران. ب گوتنێن خودان گۆمركان ئەگەرێن گرانبونا پیڤازێ نە ب تنێ ل هەرێما كوردستانێ، بەلكو ئەڤە گرفتەكا جیهانیە. جوتیارەك ژی دبێژیت: هەكە پشتەڤانیا جوتیاران بهێتە كرن، كوردستانێ پێدڤی ب هاوردەكرنا پیڤازان نینە.
دانا عەزیز، ئەندامێ جڤاتا گۆمركێن هەولێرێ بۆ رۆژناما ئەڤرۆ گۆت: ئەڤە زێدەتر ژ مەهەكێیە بهایێ پیڤازێ بلند بوویە، بەری نۆكە ئێك كیلو پیڤاز ب هزار دیناران یان ژی 500 دیناران بوو، لێ نوكە كیلۆیەك ب دو هزار دینارایە و ئەگەرێن وێ ژی جیاوازن، ئێك ژ وان ئەوە نوكە پیڤاز ژ ئیرانێڤە ناهێنە ناڤخویا كوردستانێدا، چونكی بەریا نۆكە ژ ئیرانێڤە پیڤاز دهاتنە ناڤا بازارێن كوردستانێ دا، لێ نۆكە هاتیە راگرتن.
ئاماژەكر ”گرانبونا بهایێ پیڤازان نە ب تنێ كوردستان گرتیە، بەلكو هندستان و ئیران و لبنان ژی گرتینە و ئەڤ ئاریشە هەنە.
ئاری ئەحمەد خودانێ زەڤیەكێ كشتوكاڵیە بۆ رۆژناما ئەڤرۆ گۆت ”جهێ هەرێما كوردستانێ گەلەك یا دەولەمەندە ژ بۆ چاندنا پیڤازان، لێ هەلگرتنا وێ ئاریشە دروست كرینە و ئەڤ چەندە ژی بویە ئەگەرێ وێ كۆ ئاریشا كێمیا پیڤازا دروست ببیت و بها ژی گران بیت.
ئاماژەكر ”بەرهەمێن مە هەتا مەها پێنج دێ پێگەهن و ئەگەر پشتەڤانیا مە بهێتە كرن، ئەم دشێین ئاستێ چاندنا پیڤازان بگەهینینە ئاستێ بژێویێ هەتا ژ بۆ ئیراقێ ژی، چونكی خەلكێ كوردستانێ پێدڤی ب پتری 100 تەنێن پیڤازان هەیە.
گۆت ژی ”ب پشتەڤانیكرنا مە جوتیاران كوردستانێ پێدڤی ب هاوردەكرنا پیڤازان ژ بۆ دەرڤە نامینیت، چونكی ئەم ل ناڤخۆ دشێین پیڤازێن تیژ و شرین ژی بچینین، ب شێوازەكێ زۆر سەركەفتی و هەمی پێدڤیێن ناڤخۆ ژی دێ پركەتەڤە.
