كوردستان تیڤی ژ دایكینیێ یا دبیته ژن باب
دایكا چ حالێ چ؟!، باوه‌ركه‌ن ئێدی كه‌س وه‌كو ژنباب ژی به‌رێ خوه ناده‌تێ، هه‌ما باشه هێشتا چ ناڤێن ته‌لاق و تشتێن دی نه‌كه‌ڤتینه سه‌ر.
سه‌رده‌مانه‌كێ، ده‌ما دگۆتن ته‌له‌ڤزیۆنا دایك، مرۆڤی ئێكسه‌ر دزانی به‌حسێ ته‌له‌ڤزیۆنا كوردستانه، لێ نها ئه‌ڤ دایكه یا ل به‌ر سه‌كه‌راتا مرنێ و یا ژ كار و كریار و به‌رهه‌مان ته‌واو بووی و ب تنێ پیچه‌كا رحێ یا مایه د له‌شی دا و كه‌س نزانیت ئه‌و رحه دێ كه‌نگی خاترا خوه ژ مه هه‌موویان خوازیت.
ل پتریا مالێن كورداندا، رێزبه‌ندیا كوردستان تیڤی ژماره ئێك بوو، لێ نها ره‌نگه رێزبه‌ندیا وێ چبیته دگه‌ل رێزبه‌ندیا كه‌نالێن زارۆیان و ره‌نگه هێش خوارتر بیت.
ب درێژاهیا چه‌ند سالانه، من نه‌دیتی یه كوردستان تیڤی خوه گوهۆریبیت و د گه‌ل سه‌رده‌می و هه‌بوونا وه‌ختی گۆنجابیت، به‌رنامه هه‌ر وه‌كو خونه و نه‌شیایه ده‌ه ژ سه‌دێ ژی خوه و به‌رنامێن خوه بگۆهریت، یانكو په‌رێ وه‌كو به‌رێ.
ئه‌گه‌رێن ئه‌ڤ پاشڤه‌مان و كه‌ڤتنا كوردستان تیڤی، ره‌نگه به‌ری ڤێ ره‌وشا ب سه‌ر كوردستانێ دا هاتی، هنده‌ك ئه‌گه‌رێن كێم یێن ماددی هه‌بن، لێ ب من وه‌ره ئه‌گه‌رێ سه‌ره‌كی، نه‌شاره‌زابوونا رێڤه‌برنا وێ یه و هه‌تا نها كادرێ حزبێ وێ ب رێڤه دبه‌ت، ئه‌لبه‌ت كادر ژ راگه‌هاندكاری گه‌له‌ك جودایه.
ئه‌ڤ بابه‌تێ من، نه ره‌خنه‌كا وێرانكه‌ره، لێ ژبه‌رو كه‌سه‌كم و من كوردستان تیڤی خۆش ڤیایه و هه‌تا راده‌یه‌كێ باش خزمه‌تا میدیا كوردی و خزمه‌تا دۆزا كوردی و گه‌لێ كورد ب گشتی كری یه و ئێكه‌م كه‌نالێ ئه‌سمانی یێ كوردستانی بوویه، لێ ره‌خنه‌یا من ل سه‌ر ده‌مێ نوكه‌یه كو گه‌له‌ك لاوازه و ل پێش كه‌نالێن دیڤه پاشڤه مایه، ئه‌ڤه‌ژی نه‌كو وان كادره‌كێ راگه‌هاندنێ یێ زیره‌ك نینه، لێ رێك نه‌دایه وی كادرێ كو دێ شێی بێژی راگه‌هاندنكار. ئه‌وێن ل وێرێ و پتریا ده‌زگه‌هێن راگه‌هاندنا پارتی كار دكه‌ن، ل سه‌ر بنیاتێ كادرێ حزبی وی كاری دكه‌ن و نه‌ك كادرێ راگه‌هاندنێ.
له‌وما بۆ نوكه پاش پێشنیار دكه‌م، بۆ پتر راگه‌هاندنا پارتی خۆرت ببیت و ب شێوه‌یه‌كێ ئه‌كادیمی بكه‌ڤیته د مه‌یدانا میدیایا كوردی دا و ل وێرێ پتر خزمه‌تا كورد و كوردستان و پارتی بهێته كرن، فه‌ره كادرێ راگه‌هاندنێ ل وان جهان كار بكه‌ن و ئه‌ڤ كادرێن حزبی و چ ژ كارێ راگه‌هاندنێ نه‌زانن و بتنێ بۆ مووچه‌ی ل وێرێ، بهێنه ڤه‌گۆهاستن بۆ هه‌ر جهه‌كێ دی یێ حزبی كو بشێت كاره‌كێ ئه‌نجام بده‌ت.
