كوردستان و بومبه‌بارنكرنا ئه‌ڤرۆ و دوهى
خالد ئه‌حمه‌د بادى
ب درێژاهیا دیرۆكێ دوژمنان ل سه‌ر كوردستانێ شه‌ره‌نیخه و هه‌ر ئێك ب راوێژ، ب رۆلێ خوه ل ده‌مێ گونجاى رادبیت و ئێك ژ وان بێى یێ دى چ ناكه‌ت و ب تنێ ل سه‌ر كوردان، ئه‌و هه‌ر چار وه‌لات د هه‌ڤگرتینه و هه‌ك نه ل سه‌ر هه‌موو پرسان ناكۆكن. دوهى بوو ئه‌و دارا جوان یا دار به‌ڕى و مازى و چنار و دیندار و كه‌زان و ..هتد. كو ب رووبارێن خوینا گه‌نج و لاوێن كورد هاتینه ئاڤدان و شینكرن و گه‌شه‌كرى، ئه‌ڤرۆ ب تۆپ و گولله و فرۆكه و مۆشه‌كێن دوژمنان هاتنه هشككرن، به‌لكو كوشتن چونكو دیرۆك یا پره ژ سه‌ربۆرێن مه ل گه‌ل دوژمنان، لێ كوردان ب رێژه‌كا باش مفا ژ وان سه‌ربۆران نه وه‌رگرتیه. بۆچى دبێژن ئه‌ڤ ژیانه مینا قوتابخانایه، لێ مه بۆ خوه چ وانه ژ ڤێ قوتابخانێ نه‌وه‌رگرتن. مه‌ره‌ما من ئه‌وه ئه‌ڤ پرسا هه‌ستیار د زێده‌بوونێ یه و رۆژانه هه‌رێما مه یا دكه‌ڤیته به‌ر گورزێن كوژه‌ك و بلا لایه‌نێن كو تركیا و ئیران و سووریا و عیراق هێرشى مه، دكه‌ن ب بهانا وانان كو چه‌كدارێن وان ل ناڤ خاكا مه‌دایه، بلا ئه‌و پارت و لایه‌ن چاڤ ل پێشمه‌رگێن كوردستانێ بكه‌ن، ل ده‌مێن شۆره‌شێن كوردان و ب تایبه‌ت شۆره‌شا گولانێ، ل ده‌مێ دوژمنان هێرش دكرنه سه‌ر ده‌ڤه‌رێن شۆره‌شێ، ئێكسه‌ر پێشمه‌رگێ قه‌هره‌مان خوه ژ وان ده‌ڤه‌ران ڤه‌دكێشا و شه‌رێ دوژمنى نه‌دكرن، دا كو چ وه‌لاتیێن سڤێل نه بنه قوربان و ئه‌گه‌ر نه، دا پێشمه‌رگه وانان ب مرى زڤرینن مالێن وانان، لێ رێنمایێن سه‌ركردایه‌تیا شۆره‌شێ ئه‌و بوو كو چ ده‌مان، چ بهانا نه‌ده‌نه ده‌ستێ دوژمنان و هه‌ر وه‌سا دا كورد نه بنه قوربانى. ل رێكه‌فتى (23\1\2019) سه‌د باره جه‌لاد و چه‌كچه‌كیلێن دوژمنێن كوردان و مرۆڤاتیێ هێره‌شا ئاسمانى ئینایه سه‌ر ده‌ڤه‌رێن نێروه و رێكان ل گه‌لیێ ره‌شاڤا كو چار قاره‌مان و بێ گونه‌ه و جوامێر و كورد بوونه قوربانى و ل وى گه‌لى یێ كو ب سه‌دان جاران به‌رخودان و قه‌هره‌مانى لێ په‌یدابوون و ل وى ده‌مى عیراقا گه‌نى بومبه‌باران دكرن، لێ نوكه توركیا یا بومبه‌ر باران دكه‌ت و عیراق ب چ ماف و توركیا ب چ بهانه و دوور نینه، سوباهى ئیران و سووریا ژى بهێن هنده‌ك كریارێن دى بكه‌ن ل ده‌ڤه‌را مه. ب شێوه‌كێ دروست و دۆرهێلى بچینه دناڤ بابه‌تى دا ئه‌گه‌ر ئه‌م د ناڤ سیسته‌م و قانوون و پرسێن حوكمه‌تا عیراقێ دا بین، ئه‌ركه كو عیراق ڤان ره‌فتارێن نه د قانوونى قه‌بوول نه كه‌ت، لێ ئه‌گه‌ر نه، فه‌ره حوكمه‌تا مه و هه‌موو لایه‌ینێن سیاسى هه‌لویست هه‌بیت ل به‌رامبه‌ر ڤان ره‌فتارێن وه‌لاتێن هه‌رێمى، بلا رێز ل هه‌ڤسویاتیێ بهێته‌گرتن و ماف بهێنه پاراستن و كورد قوربانیدانێ نه‌ده‌ن، دا كو به‌س خوینا گه‌نجێن مه ببنه قوربانى به‌رژه‌وه‌ندیێن هه‌موو لایه‌نان. له‌وما دبێژم دوهى بومبه‌بارانكرنا ده‌ڤه‌را مه و گه‌لیێ ره‌شاڤا نموونه ژ لایێ عیراقێ ڤه بوو، نوكه هاته بومبه‌رباران كرن ژلایێ توركیا ڤه. د ئێك ژ هۆزانێن خوه دا د. به‌درخان سندى دبێژیت (گه‌ر قه‌یسه‌ر و خه‌لیفه چوون، نێچیرێ دڤێت ئه‌م كورد خه‌زال و په‌زكویڤى بین و گه‌ر ترك و رۆس ب شه‌ر هاتن، دڤێت ئه‌م كورد هه‌ر پێش له‌شكرى بین. ل ڤێره پرسیار ئه‌رێ گه‌لۆ ما هه‌تا كه‌نگى ئه‌م كورد دێ قوربانى بین؟.
