كوردستان و رۆژا لاڤـه یا نشتیمانی
غیاس خـالد زێباری
ب ده‌ستپێشخه‌ری و به‌رهه‌ڤی و چاڤدێریا سه‌رۆك مه‌سعود بارزانی ل رۆژ 23/4/2025 ل هه‌ولێرا پایته‌ختێ هه‌رێما كوردستانێ ب ئاماده‌بوونا سه‌رۆكێ هه‌رێمێ و سه‌رۆكێ حوكمه‌تێ و ژماره‌كا ژ به‌رپرس و سه‌ركرده و كه‌سایه‌تیێن جڤاكی و ئایینی ل ئیراقێ و رۆژهه‌تا ناڤین و ئه‌مریكا و ئۆرۆپا بۆ جارا ئێكێ رۆژا لاڤه‌یا نشتیمانی ل كوردستانێ هاته گێران، راسته ڤان ساڵێن داویێ پێكڤه ژیانا ئۆلی و ئه‌تنی و ئازادی و كلتوورێ پێكڤه ژیانێ و ئارامی و سه‌قامگیریێ و په‌یوه‌ندیێن دبلۆماسی یێن خۆرت و مۆكۆم هه‌رێما كوردستانێ و گه‌لێ وێ زۆر ب ئه‌رێنی ب جیهانێ داینه نیاسین، لێ كاریگه‌ریا ڤان ره‌نگه چالاكی و كۆمبوونا جوداهی و كاریگه‌ریه‌كا تایبه‌ت هه‌یه بۆ زێده‌تر ناساندنا وی كولتوورێ پێكڤه ژیانا ئۆلی و مه‌زهه‌بیا دوور و درێژ یا جڤاكێ كوردستانێ ب تایبه‌ت ل سه‌رده‌مێ سه‌رهه‌لدان و به‌رفره‌هبوونا رێبازا بارزانی ل سه‌ر ده‌ستێ شێخ عه‌بدولسه‌لام و شێخ ئه‌حمه‌د بارزانی و بارزانیێ نه‌مر كو كریه كلتوور و پیرۆزیێن جڤاكێ كوردستانێ و ل سه‌ر ده‌ستێ سه‌رۆك مه‌سعود بارزانی زێده‌تر داكۆكی ل پاراستنا ڤی كلتوورێ پێكڤه ژیانێ كریه و هه‌رده‌م ب ئێك ژ بهایێن جڤاكێ كوردستانێ زانی یه و ئێخستینه د چارچۆڤه‌كێ قانووی دا، زۆر قوربانی ژی ژ پێخه‌مه‌ت پاراستنا ماف و ئازادیێن ئۆل و ئه‌تنێن دیتر ل كوردستانێ داینه. ژ به‌ركو به‌رهه‌ڤبوویێن رۆژا لاڤه‌یا نشتیمانی ل كوردستانێ ل وه‌لاتێن جودا و ئایین و ئه‌تنێن جودا و ئاست و پێگه‌هێن جودا بوونه و راسته‌وخۆ ئه‌ڤ كلتوورێ پێكڤه ژیانا كوردستانێ ب چاڤێن خوه دیتن و سه‌ره‌دانا جهێن پیرۆزێن ئایینێن جودا كر و ل سه‌ر ئاستێ راگه‌هاندنێ ژی ره‌نگڤه‌دانه‌كا زۆر هه‌یه، ب ده‌ستكه‌فته‌كێ مه‌زنێ خه‌لكێ كوردستانێ ل سه‌ر ده‌ستێ سه‌رۆك مه‌سعود بارزانی دهێته هژمارتن . ره‌وشا ئه‌ڤرۆ یا كوردستانێ پێدڤی ب ڤان ره‌نگه چالاكیان هه‌یه كو دوزا كوردی یا سیاسی و نه‌ته‌وه‌یی و كلتوورێ جوانێ خه‌لكێ كوردستانێ ب هه‌می پێكهاتێن خوه ب به‌فره‌هی نیشا جیهانێ بده‌ت و پشتی ڤه‌گه‌ریانێ ببنه پشته‌ڤان و دوستێن گه‌لێ كورد و ده‌ستهه‌لاتێن هه‌رێما كوردستانێ، ئه‌ز باوه‌رم دێ كاریگه‌ریه‌كا زۆر ل پاشه‌رۆژێ هه‌بیت چونكی ب ڤێ چالاكیێ ئه‌ڤ كلتوورێ جوانێ كوردستانێ گه‌هشته سه‌رتاسه‌رێ جیهانێ، ژلایه‌كێ دیتر ئه‌ڤه به‌لگه‌هه كو سه‌رۆك بارزانی پارێزه‌ر و درێژه‌پێده‌رێ وی كلتوورێ پێكڤه ژیانا ئۆلی و ئه‌تنی و نه‌ته‌وی یا كوردستانێ ئه‌وا پێشه‌وایێن به‌رێ یێن رێبازا بارزانی به‌ره‌ڤانی لێ دكر .
