كوردستان پێدڤی ب نووبوونا پارتیه!!
هه‌ر ژ ده‌سپێكا دروستبوونا پارتی ل سالا 1946 ئه‌ڤێ پارتێ ئالایێ شۆره‌شێ هه‌لگرت دژی داگیركه‌ران و سه‌ركێشیا چه‌ندین شۆره‌ش و سه‌رهلدانان كر بۆ بده‌ستڤه‌ئینانا مافێن گه‌لێ كورد و پارتی ل گه‌ل ئالایێ شۆره‌شێ درووشمێن ئاشتی و ئازادی و دیمۆكراسی بۆ گه‌لێ كورد بلند كربوون! و ل دووماهیك كۆنگره ل سالا 2010 ب درووشمێن زۆر ب هێز ته‌ڤلی كاودانێن سیاسی یێن نوو بوو ل ده‌ڤه‌رێ كو دو ژ وان درووشمان (نووبوون و دادپه‌روه‌ری) نه! به‌لێ مخابن ئه‌ڤان هه‌ر دو درووشمان ب دروستی جهێ خوه دكار و به‌رنامێن پارتیدا نه‌كر و رێخستنا پارتی ئه‌ڤ درووشمه كارا نه كرن و هه‌تا راده‌كێ مه‌زن پشتگوه كرینه و هێشتا ب هزرا شۆره‌شگیریێ ره‌فتارێ ل گه‌ل كاودانان و پارتێن دی یێن كوردی دكه‌ت و ئه‌ڤ چه‌نده بوو ئه‌گه‌ر ڤالاتیه‌كا مه‌زن بكه‌ڤیته دناڤبه‌را قاعیدا پارتی و سه‌ركردایه‌تیێ! له‌ورا دبێژین كوردستان ب هه‌ر چار پارچاڤه نوكه پێدڤی ب نووبوونا پارتیه كو لگه‌ل ڤان كاودانێن ب له‌ز و گوهۆرینێن مه‌زن خوه بگوهۆریت و به‌رده‌وام د نووبوونێ دا بیت دا بشێت ب دروستی به‌ر سینگێ هه‌می پیلانان بگریت، ئه‌ڤه ل ده‌مه‌كی یه كو شه‌ڕێ داعش و قه‌یرانا دارایی زۆر خالێن لاواز و كار و ره‌فتارێن خه‌له‌ت دیاركرن كو فه‌ره مفا ژێ بهێته وه‌رگرتن و ببنه وانه بۆ نه دوباره‌كرنا ڤان خه‌له‌تیان ژ وان خه‌له‌تیان زۆربوونا لقان كو بوویه سه‌ده‌مێ سنۆرداركرنا كارێ حزبی و لاوازكرنا رێخستنێ و تێكه‌لبه‌ونا ده‌ستهه‌لاتان و زێده‌بوونا رۆتینێ دكارێ حزبیدا و یا ژ هه‌میێ گرنكتر كادرێ پارتی به‌ره به‌ره یێ سه‌نگا خوه ژ ده‌ستده‌ت و ئه‌و سه‌نگ و بهایێ به‌رێ نه‌مایه! و فه‌ره بۆ هه‌ر پارێزگه‌هه‌كێ به‌رنامه‌كێ تایبه‌تێ رێخستنێ هه‌بیت یێ گونجایی بیت ل گه‌ل بارودۆخێ وێ پارێزگه‌هێ و ده‌ڤه‌رێ نه‌ك هه‌می ب ئێك به‌رنامێ رێخستنێ كاركه‌ن! و ئه‌ڤ لۆبیێن د ناڤ پارتیدا په‌یدا بووین كو زۆر جاران بووینه ئه‌گه‌ر پارتی خویكا ره‌فتار و كارێن وان بده‌ت، بێنه كونترۆلكرن و ژناڤبرن و پارتی ب ئێك ده‌ست و رح و بۆ ئێك ئاراسته كاركه‌ت! و درووشمێ عه‌شیره‌تگێریێ كو پارتی پێ دئێته تومه‌تباركرن كو پارته‌كا عه‌شائیریه! فه‌ر هه‌ر زوو پارتی ب شێوه‌كێ ئه‌كادیمی و سه‌رده‌میانه كاركه‌ت و دادپه‌روه‌رانه كارێ رێخستنێ بكه‌ت و ره‌فتارێن وێ ل گه‌ل هزرێن عه‌شائیری ب به‌رنامه و سنۆردار بن نه‌ك تێكه‌لی هه‌می كارێن حزبی بن. خاله‌كا دی كو فه‌ره سه‌ركردایه‌تیا پارتی ببریارێن ژیرانه و به‌رنامه و پلان كار سه‌ر بكه‌ن ئه‌وه كو پشتی چه‌ندین هه‌لبژارتنا دیار بوو كو (ئێكه‌تی ئافره‌تان و ئێكه‌تی قوتابیان و ئێكه‌تی لاوان) چ رۆلێ هۆسا نه بۆ و دیاربوو هه‌تا چ راده د لاوازبوون و نه‌شیاینه ڤان ته‌خا كاری سه‌ربكه‌ن ب دروستی به‌لكو كارێ وان هه‌ر لیژنا و لقێن حزبی پێرابووینه له‌ورا گه‌له‌كا گرنگه پارتی پلانه‌كا دارێتی یا درێژخایه‌ن هه‌بیت و سه‌ر و ژنوو ڤان ئێكه‌تیان رێكبێخیت یان ب بریاره‌كا مه‌كته‌با سیاسی بهێنه هه‌لوه‌شاندن و ببنه نڤێسینگه‌ه سه‌ر ب ل قان ڤه و ب دیتنا من ئه‌ڤه باشترین چاره‌یه چونكی بلا مێژوو مه نه خاپینیت نوكه ده‌مێ كاریه و چاڤێ ڤی ملله‌تی هه‌میێ ل پاشه‌رۆژێ یه كا كورد د گه‌هنه چ قووناغ و دێ چ ده‌ستكه‌فت هه‌بن و ملله‌تێ كورد هه‌می دزانن كو پارتی خودانا ڤی پرۆژێ نه‌ته‌وه‌یی یه له‌ورا چاڤه‌رێنه پارتی ڤان به‌ربه‌ستان بشكێنیت و ب پلان و به‌رنامه خوه نوو بكه‌ت دا كو بشێت خه‌ونێن ڤی ملله‌تی بینته جی و پیلانێن دوژمنان ژ ناڤببه‌ن و ڤێ باوه‌ریا خه‌لكی موكم كه‌ن نه‌ك ژ ده‌ستده‌ن چونكی با راپتر یا ڤی ملله‌تی باوه‌ری ببه‌رنامه و كارێن حزبێن دی نینه تایبه‌ت بۆ پرسێن نه‌ته‌وه‌یی! له‌ورا هه‌میان چاڤێ وان ل پارتیه كو ل ده‌سپێكێ كێشێن ناڤخوه چاركه‌ت و درووشمێ خه‌لات و سزا په‌یره و كه‌ت و كه‌سێن هه‌ژی و شاره‌زا راسپێریت بۆ ئیداره‌كرنا كارێن حزبی و حوكمی و ب دروستی باده‌كا گه‌نده‌لیێ كار ل سه‌ر بكه‌ت و چاره‌كه‌ت و ل دووڤدا كێشێن ده‌ره‌كی ل گه‌ل پارتێن دی یێن كوردی چاره‌كه‌ت و ب تنێ بۆ به‌رژه‌وه‌ندی و پاشه‌رۆژا ڤی ملله‌تی كاركه‌ن دا بگه‌هیته ئارمانجا خوه كو ئه‌و ژی ده‌وله‌ته‌كا سه‌ربه‌خوه یه.
