كوردستان یان بیلارۆسیا؟!
تریفا دوسكی
گوهۆرینا ئاخا خوه ب ئاخه‌كا بیانى ب خوه كاره‌ساته‌كه، ل گوپیتكا تراژیدیا ژیانێ مرۆڤ په‌نایێ به‌ر گوهۆرینێ ڤه دبه‌ت، ئه‌رێ كى مالا خوه ب ماله‌كا دى دگوهۆریت؟، هه‌كه بێئومیدى نه‌بیت و ئه‌ڤه بخوه تیگه‌هشتنه بۆ رامانان ل جهێ خوه، كورد هه‌رده‌م گرێدایى ئاخ و سه‌قا و خوه‌زاییا كوردستانێ یه، له‌وما هه‌رده‌م خوه ل شكه‌فت و چیایان ڤه‌شارتیه هه‌تاكو خوه بپارێزیت، لێ نها ئه‌ڤ كۆچا ب شێوه‌كێ خافلته‌ى و ترسناك ده‌ركه‌فتى، ئه‌نجامێ هندێ یه دزانیت ئه‌و خاك و خوه‌زاییه، هه‌روه‌كو نه‌شێت به‌رگریێ ژ وه‌لاتیبوون و ماف و ژیانا خوه بكه‌ت، سیفه‌تا چه‌له‌نگى و مێرخاسیا كوردان ژ هندێ هاتیه كو به‌رگریا مانه‌ڤه‌یا خوه كریه، لێ ئه‌و ته‌خ چوویه و پتریا چینێن ل ناڤ كوردستانێ مایین گه‌هشتیه ده‌رئه‌نجامێ هندێ مان ل كوردستانێ و خوه‌راگرى ل هه‌مبه‌ر بێكاریێ و گرانى و بێبهاكرنا مرۆڤان ب رێیا نه‌بوونا ده‌لیڤه‌یێن كارى بۆ ده‌رچوویێن زانكۆیان و كه‌سانێن خودانشیان، ب خوه شه‌ڕه‌كه ل هه‌مبه‌ر مانونه‌مانێ.
مانه‌ڤێ پێدڤى ب قوربانیدانێ هه‌یه ب خه‌ون و كار و ژیان و پاشه‌رۆژا نه‌دیار دڤێت بجه‌نگى، سه‌فه‌را كوردان درێژه زنجیرا مه‌رگه‌سات و كارساتێن پێشتره ژ سالا 1980 را هه‌تا نها چه‌ند جاران ب لیشاو كورد چووینه هاندران سالا 1988 كۆمه‌كا زۆر یا كوردان چوونه ئه‌ورۆپا 1991، دیسا هه‌مان كێشه هه‌بوو، دیسا ل شه‌ڕێن براكوژیا 1995 دیسا ب كۆم كۆچكرن هه‌بوو، ئه‌و چ كاره‌ساته كوردان ل سنوورى دگه‌هینته ئێك ره‌نگه ئه‌ڤ شه‌پولا ترسناك به‌حسێ تراجیدیا خێزانه‌كێ و سه‌د خیزانان ناكه‌ت، ئه‌ڤ چاره‌نڤیسێ ملله‌ته‌كى یه بۆ هزار سالێن دى نه‌خشێ ژیانا وى ب روهوریشالان دا ب كلتوور و زمان و مال و گیان و ده‌روون دا گوهۆرین دى ب سه‌ردا هێن. ئه‌ڤێن لسه‌ر سنوورى په‌یامه‌كى دده‌نه مه هه‌میان ئه‌م هه‌ینه و دێ مینین چو دى مه قوربانى و رۆلێ قوربانیان نه‌ڤێت، بێ حه‌ز خواستێن خوه چاره‌نڤیسێ خوه داینه ده‌ست سینووران ئه‌ڤه سه‌فه‌را خۆشیێ و چاره‌سه‌ریێ نینه، ئه‌ڤه وه‌غه‌را مان و نه‌مانێ یه، گه‌شتا چاره‌نڤیسێ ملله‌ته‌كى یه.
هه‌لبه‌ت ره‌نگه زۆر كه‌س بێژن هیچ كێشه نینن، ژبلى بێكاریێ، ل ڤێره گوتنه‌كا هانا ئارانت هه‌یه سه‌بارت توندوتیژیێ و ده‌ستهه‌لاتێ دبیژت: ده‌ستهه‌لاتدار ل ناڤ خه‌لكى و ب رێیین قانوونى و ره‌وا هه‌یه و دێ گه‌هیتنه ئارمانجێن خوه بده‌ستڤه‌ئینانا وان ده‌ستكه‌فتان و ئارمانجا توندوتیژیه‌كا نه‌دیار هه‌یه ب شێوه‌یێ ناسیۆنالیزم هه‌تاكو رێیێن خوه ب بها كه‌ن و بێخنه ناڤا قانوون و نیشتمیانپه‌روه‌ریێ، ل ڤێرێ جۆره‌كێ زبر و زه‌نگیا نه‌راسته‌وخوه لسه‌ر په‌یڤا واته‌یا وه‌لاتیبوونێ دروست دبیت و مرۆڤ دبیته قوربانى و د ئه‌نجاما وان كیشه‌یان دا ب سالان كۆچكرن دروست دبیت، دبیت كورد ب گشتى هزر ل هنده‌ك ستراتیژیتا هه‌ڤگرتى بكه‌ت، پرۆتوكوله‌كا هه‌ڤگرتى هه‌بیت ژلایێ ده‌زگه‌هێن په‌یوه‌ندیدار ڤه د راساتا ڤى كێشا مه‌زن دا بكه‌ن، چ دى كه‌سێ تاوانبار نه‌كه‌ت و هه‌ر لایه‌نه‌ك لایه‌نێ دى بكه‌ته ئه‌گه‌ر كێماسیێن ل هه‌ر داموده‌زگه‌هه‌كى هه‌یه، بلا به‌س بیت شه‌ڕێ نه‌ره‌وا لسه‌ر كورسیان و ده‌ستهه‌لاتێ و باج و پاره و و داهاتان بكه‌ین، بلا پلانه‌ك هه‌بیت لسه‌ر ڤێ ئه‌زمۆنێ رابوه‌ستن چاوا باشتر بكه‌ن، بلا بتنێ مرۆڤ و وه‌لاتى ببیته خالا كار لسه‌ركرنێ واقعیانه هزر لسه‌ر كێشه‌یێن وه‌لاتى بێته‌كرن، بلا ژدل كوردستانێ ب بیلارۆسیا نه‌گوهۆرن، مه زۆر قوربانى دان، ئه‌ڤه هه‌ێما مه هه‌میانه، هه‌موو كه‌س تێدا خودان مافن.
