كوردستان یا تووشی شه‌ره‌كێ تێكهه‌ل و فره‌ره‌هه‌ند بووی
د راستی دا ئه‌ڤ ره‌وشا عیراق تێدا دبۆریت گه‌له‌كا ب مه‌ترسی یه ژ رویێ شه‌ڕێ تائیفه‌گه‌ری ڤه و رۆژ ل دووڤ رۆژێ بارودۆخ ئالۆزدبیت و به‌ر ب ئالۆزتره، وه‌كو یا ئاشكرایه ئاراسته‌یا ڤی شه‌ڕی یا به‌ر ب هه‌رئێك ئایدۆلۆژیا (ویلایه‌تا فقهی) و ئایدولۆژیا (خیلافه‌تا ئیسلامی) ڤه دچیت و هه‌روه‌سا یێ بوویه شه‌ڕێ تۆلڤه‌كرنێ د ناڤبه‌را توندره‌وێن هه‌ردو مه‌زهه‌بێن (سونه و شیعه) دا و كوردستان ژی یا كه‌فته به‌رانبه‌ر ئاگرێ ڤی شه‌ڕی، هه‌رئێك ژ ڤان هه‌ردو هێزان كو دوژمنێن دۆزا مه‌نه هه‌ولدده‌ن ب هه‌ر رێ و شێوازه‌كێ بیت هێزا كوردان پرت و پرت بكه‌ن چ وه‌كو ملله‌ت یان ژی كادرێن رێخستنێن سیاسی دا كو بشێن مه ژێك بدزن و ل سه‌ر زالببن و جاره‌كا دی شه‌ڕێ براكوژی و ئاگرێ فتنێ ل كوردستانێ به‌رفره‌ه بكه‌ن ب رێیا هنده‌ك كه‌سانێن نه‌به‌رپرس و جێبه‌جێكارێن ئه‌جنده‌یێن دوژمنان، (كو ئه‌ڤ توخه‌مه مرۆڤه وه‌كو وی كه‌ینه یێ ئاگر به‌ردایه مالا خوه ژبه‌ر كێچان) واته د هزرا وان كه‌سان دایه جاره‌كا دی ملله‌تێ كورد راده‌ستی و ژدانا دوژمنێ مه بكه‌نه‌ڤه ژبه‌ر كو ل دووڤ باوه‌را وان هنده‌ك كێموكاسی ل سیسته‌مێ ده‌ستهه‌لا تداریا هه‌رێما كوردستانێ هه‌نه، له‌ورا وه‌كو جاران هه‌ر گوهێ وان ل زوَڕنا داگیركه‌رێن كوردستانێ یه، هه‌روه‌سا ملله‌تێ كورد و هه‌موو هێز و لایه‌نێن سیاسی ژی دڤێت خوه باش تێبگه‌هینن و پێگه‌هینن و خوه ب روودانان را بگه‌هینن، چونكو ل ڤێ قووناغێ و ل ده‌ڤه‌را رۆژهه‌لاتا ناڤین روودان ب له‌ز و مه‌ترسینه وه پێدڤیه ل سه‌ر هه‌ر كه‌س و لایه‌نه‌كێ كوردستانی خوه دوور بگرن ژ تێكه‌لكرنا به‌رژه‌وه‌ندیان ل گه‌ل دوژمنێن دۆزا مه، له‌ورا سه‌رۆك بارزانی به‌ری هه‌ركه‌سه‌كی هه‌ست ب ڤێ مه‌ترسیێ كریه و نامه‌یكا ڤه‌كری و ئاشكه‌را ل (16/4/2015) ئاراسته‌ی جه‌ماوه‌ر و حوكمه‌ت و په‌رله‌مان و لایه‌نێن سیاسیێن كوردستانێ كر و تێدا ئه‌و هه‌ڕه‌شه دیاركرن یێن ل سه‌ر داهاتیێ خه‌لكێ كوردستانێ و ئه‌و هه‌ره‌شه ژی بۆ ژناڤبرنا ئێكرێزی و ئێك هه‌ڵویستیا ملله‌تێ كورده. یا ئاشكه‌رایه كو هه‌موو دوژمنێن كوردستانێ ل سه‌رئێك ستراجی كاردكه‌ن و یێ شه‌ره‌كێ تێكه‌ل و فره‌ره‌هه‌ند ل گه‌ل ملله‌تێ كورد دكه‌ن ژ لایێ (ئابووری، سیاسی، له‌شكری، ژێكدزین، ده‌روونی دیپلۆماسی و. . هتد)، بۆ نموونه:
1- برینا به‌هرا بودجا هه‌رێما كوردستانێ ل سالا (2014) ل سه‌رده‌مێ (مالكی).
2- ده‌رزئێخستنا د ناڤ كادرێن رێخستنێن سیاسی یێن كوردستانی دا، داكو ئێكتر بشكێنن و موزایه‌داتان ل سه‌ر ئێكتر بكه‌ن.
3- دیاردا ژ هه‌موویان حێبه‌تیتر ل ڤێ دووماهیێ دروستكرنا (حه‌شدا شه‌عبی) بوو ل كوردستانێ ب تایبه‌تی ل ده‌ڤه‌رداریا شنگال، كو ئه‌ڤه خوه بخوه بۆ ده‌سپێكرنا شه‌ره‌كێ ناڤخوه‌یێ یێ ب وه‌كاله‌ت بوو، كو ئه‌ڤ كریاره ژی ب پشته‌ڤانیا لایه‌نه‌كێ سیاسی یی َ به‌رچاڤ بوو ل كوردستانێ، كو ئه‌ڤ جۆره كریاره ژی وه‌كو ڤێ گۆتنا مه‌زنا دهێت دبێژن (هه‌ر ده‌ما بێهنا رویڤی ته‌نگ بوو دێ واقینیت)، براده‌رێ رویڤی ژی دزانیت واقاندن یا خه‌له‌ته و دوژمنێن وی ژی وی د نیاسن ئه‌و چ مێره و لێ ئه‌ڤه ژی كه‌لتۆرێ وی یه و ناهێته هێلان و دوژمنێن وی ژی ئه‌ڤه دڤێت دا بزانن دێ چاوا نێچیرێ كه‌نێ.
