كوردێن باشور و رۆژهه‌لات ل چایخانا وی دگه‌هنه ئێك
هه‌ورامان، عه‌زیز هه‌ورامی:
مام ده‌روێش، كه‌سه‌كێ دانعه‌مرێ خه‌لكێ ده‌ڤه‌را هه‌ورامانه، به‌ری چه‌نده‌كێ رابوویه ب ڤه‌كرنا چایخانه‌كێ ل باژێركێ بیاره، كو ده‌ڤه‌ره‌كا سنوری یه ل گه‌ل رۆژهه‌لاتێ كوردستانێ و وه‌لاتێ ئیرانێ و ئه‌و دبێژیت: ژبه‌ركو چایخانا من دناڤبه‌را سنورێن دو وه‌لاتان دا رۆژانه كوردێن رۆژهه‌لاتێ كوردستانێ ل گه‌ل یێن هه‌رێما كوردستانێ ل چایخانا من هه‌ڤدو دبینن و جهێ من بوویه ئه‌گه‌رێ وێ چه‌ندێ كو هه‌ڤنیاسینه‌كا باش دناڤبه‌را كوردێن باشور و رۆژهه‌لات دا په‌یدا بیت.
ده‌روێشی گۆت: ئه‌ڤ ساله ژبه‌ر نه‌هاتنا بارانان ئه‌م نه‌شیاین كارێ چاندنێ بكه‌ین، له‌ورا من ئه‌ڤ چایخانه ل ڤێره ڤه‌كر كو نێزیكی مالا منه و رۆژانه ل ده‌مژمێر شه‌شی سپێدی هه‌تا هه‌شتی شه‌ڤ یا ڤه‌كری یه و ژبلی كوردان هنده‌ك جاران فه‌رمانبه‌رێن خالا سنوری یا لایێ ئیرانێ ژی دهێن چایێ ڤه‌دخۆن، هه‌ر چه‌نده ل جهێن گه‌شتیاری چار ب هزار دینار دهێته فرۆتن، لێ ئه‌ز ب (250) دیناران دفرۆشم.
