كوردێن باكور نها چ ژ HDP دخوازن؟
ئه‌نجامێن هه‌لبژارتنێن په‌رله‌مانێ توركیا بێگومان نه‌خشێ سیاسی ل وی وه‌لاتی گوهۆری و پشتی ١٣ سالان بۆ جارا یه‌كێ ئاكپارتی نها نه‌شێت ب تنێ حوكمه‌تێ ئاڤا بكه‌ت و دڤێت ل گه‌ل پارته‌كا دی هه‌ڤپه‌یمانیێ دروست بكه‌ت، ئه‌و یه‌ك د ده‌مه‌كێ دایه كو HDPێ دیار كر كو ئه‌و ب چو ره‌نگان هه‌ڤپه‌یمانیێ ل گه‌ل ئاكپارتیێ ناكه‌ن و پشته‌ڤانیێ ژی ل ئاڤابوونا حوكمه‌ته‌كێ ناكه‌ن كو ئاكپارتی سه‌رۆكاتیا وێ بكه‌ت.
ره‌نگه هه‌لویستێ HDP پتر بۆ هندێ بیت كو ئه‌و بخوازیت رێژا نها یا ده‌نگده‌رێن خوه ب پارێزیت، چونكو براستی بۆ گه‌له‌ك كه‌سان سوپرایز بوو ده‌مێ كو ئاشكرا بووی رێژا ده‌نگێن HDPێ گه‌هشتیه ١٣%، لێ راستیه‌كا دی هه‌یه، ئاكپارتی سه‌ره‌رای خه‌له‌تیێن كو د ده‌مێن بۆری كری، لێ د هه‌مان ده‌می دا ئێكه‌م پارت و ده‌ستهه‌لات بوویه كو د دیرۆكا توركیا دا دان ب پرسا كوردی دانایه و بۆ چاره‌كرنا وێ ژی گه‌له‌ك پێنگاڤێن دیرۆكی هاڤێتینه. ژ به‌ر هندێ ژی هه‌كه نها HDP د ناڤ هه‌ڤپه‌یمانیه‌كێ دا نه‌بیت، ئاكپارتی دێ نه‌چار بیت خوه نێزیكی پارتا نه‌ته‌وه‌په‌رست یا توركیا بكه‌ت، چونكو داوود ئوگلۆ نها نه‌شێت ب تنێ كابینا نوو یا حوكمه‌تێ ئاڤا بكه‌ت، هه‌ڤپه‌یمانیه‌كا نوو كو د ناڤبه‌را ئاكپارتی و مه‌هه‌پێ دا دروست ببیت دێ زیانه‌كا گه‌له‌ك مه‌زن گه‌هنیته كوردان ل توركیا و باكورێ كوردستانێ، چونكو پارتا نه‌ته‌وه‌په‌رست دێ هنده‌ك مه‌رجان دانیته پێشبه‌ری ئاكپارتی دا هه‌ڤپه‌یمانیێ دروست بكه‌ت و ئێك ژ وان مه‌رجان ژی دێ راگرتنا پرۆسا ئاشتیێ و ده‌ستپێكرنا شه‌ری بیت و ئه‌ڤه ژی بێگومان دێ زیانه‌كا خوه یا مه‌زن بۆ كوردان هه‌بیت.
HDP دشێت به‌رنامه‌كێ خوه یا باش ئاماده بكه‌ت و هه‌ڤدیتنان ل گه‌ل ئاكپارتی بكه‌ت، ئاكپارتی نها پتر ژ دو پارتێن دی دشێت ل گه‌ل HDP هه‌ڤپه‌یمانیێ دروست بكه‌ت، چونكو به‌رده‌وامی دان ب پرۆسا ئاشتیێ و چاره‌كرنا پرسا كوردی ل توركیا یه‌ك ژ ئارمانجێن سه‌ره‌كی یێ HDP یه و ئاكپارتی ژی دشێت ب رێیا ئاڤاكرنا حوكمه‌ته‌كێ ل گه‌ل HDP پێنگاڤێن نوو بۆ چاره‌كرنا پرسا كوردی ب هاڤێژیت و دێ ده‌لیڤه‌كا مه‌زن ژی بۆ كوردان هێته پێش دا كو بشێن خوه برێڤه ببه‌ن و بۆ جارا یه‌كێ د حوكمه‌تا توركیا دا ب ناسناما خوه سیاسه‌تێ بكه‌ن و ل گۆر دیتنا من دڤێت ئه‌و ده‌لیڤه باش بهێته بكارئینان.
چونكو ده‌نگده‌رێن HDP ب كورد و تورك و ئالیێن دی یێن كو ده‌نگێ خوه داینه وێ پارتیێ، وان دڤێت به‌ری هه‌ر تشته‌كێ شه‌رێ ٣٠ سالێن بۆری ب دووماهیك بهێت، ئاسته‌نگیێن ل هه‌مبه‌ر چاره‌كرنا پرسا كوردی ل توركیا رابن و ده‌لیڤه بۆ كوردان بهێته دان دا ئه‌و بشێن خوه برێڤه ببه‌ن، كورد دشێن ڤان مه‌رجان بده‌نه پێشبه‌ری ئاكپارتی و ئاكپارتی ژی تا راده‌یه‌كێ دشێت ب وان مه‌رجان رازی بیت، چونكو ئاكپارتی گه‌له‌ك پێنگاڤ بۆ هندێ هاڤێتینه.
ل دووماهیێ دێ بێژم كو سه‌ركه‌فتنا HDP دێ وی ده‌می سه‌ركه‌ڤتن بیت كو ٨٠ په‌رله‌مانتار بشێن ل په‌رله‌مانێ وی وه‌لاتی رۆله‌كێ باش بۆ چاره‌كرنا پرسا كوردی ب گێرن. ره‌نگه ئه‌ڤه دووماهی شانس بیت كو كوردێن باكور داینه HDP دا دوور ژ شه‌ری پرسا كوردی بهێته چاره‌كرن و هه‌كه HDP وی شانسی بكار نه‌ئینیت ره‌نگه د هه‌لبژارتنه‌كا دیتر دا رێژا نها بده‌ستڤه ئینایه ژ ده‌ستان بده‌ت.
