كوردێن رۆژئاڤا ژ سیاسه‌تا روسیا یا ل هه‌مبه‌ر رۆژئاڤایێ كوردستانێ دلگرانن
ئه‌ڤرۆ، هۆشه‌نگ تاجر:
ده‌مه‌كه وه‌زیرێ ده‌رڤه یێ روسیا ب ره‌نگه‌كێ ئاشكرا دیار دكه‌ت كو ئه‌مریكا هاریكاریا كوردان دكه‌ت دا كورد ئاخا سووریێ پارچه بكه‌ن و به‌ری دو رۆژان ژی لاڤرۆڤی راگه‌هاند كو پرانیا ده‌ڤه‌رێن په‌ترۆلێ ل ژێر كۆنترۆلا كوردان دانه و كوردێن رۆژئاڤا ژی ژ هه‌لویستێ روسیا دلگرانن.
زه‌كه‌ریا عه‌فرین چاڤدێرێ سیاسی یێ رۆژئاڤایێ كوردستانێ بۆ ئه‌ڤرۆ دیار كر كو چه‌ند رۆژن وه‌زیرێ ده‌رڤه یێ روسیا به‌رده‌وام دژبه‌ریا مافێن ره‌وا یێن كوردان ل سووریێ دكه‌ت و ب داخۆیانیێن خوه یێن توند ب ره‌نگه‌كێ راسته‌وخوه پشته‌ڤانیێ ل توركیا دكه‌ت دا هێرشی رۆژئاڤایێ كوردستانێ بكه‌ت و گۆت: (به‌ری نها روسیا گه‌له‌ك بزاڤ كرن كو كورد و شام نێزیكی هه‌ڤدو ببن و پرسێن د ناڤبه‌را خوه دا ب رێیا دانوستاندنان چاره‌سه‌ر بكه‌ن، لێ شامێ گوه نه‌دا روسیا و نها ژی ب جهێ كو روسیا بزاڤا ئارامكرنا ره‌وشا سووریێ بكه‌ت ده‌ست ب دژبه‌ریا كوردان كریه، هه‌لویستێ روسیا نها بوویه جهێ دلگرانیا هه‌موو كوردان، چونكو دژبه‌ریا ئاشكرا یا روسیا ل هه‌مبه‌ر مافێن ره‌وا یێن گه‌لێ كورد ل سووریێ وه‌سا دكه‌ت كو توركیا و گرۆپێن دی یێن چه‌كدار جاره‌كا دی ده‌ست ب هێرشێن خوه ل دژی گه‌لێ كورد بكه‌ن، ژ به‌ر هندێ ژی دڤێت ئه‌مریكا، ئێكه‌تیا ئورۆپا و وه‌لاتێن دی رێ نه‌ده‌ن كو روسیا ده‌ست ب كاره‌كێ وه‌سا بكه‌ت).
ناڤهاتی ئه‌و یه‌ك ژی دیار كر كو لاڤرۆڤ دبێژیت پرانیا ده‌ڤه‌رێن په‌ترۆلێ ل سووریێ ل ژێر كۆنترۆلا كوردان دانه و ئه‌مریكا ژی دڤێت وه‌سا كوردان ب هێز بكه‌ت دا كورد ژ سووریێ جودا ببن، ئه‌و یه‌ك راست نینه، چونكو به‌ری نها هه‌موو ده‌ڤه‌رێن په‌ترۆلێ ل ژێر كۆنترۆلا داعشێ دا بوون و كوردان ب خوونا خوه ئه‌و ده‌ڤه‌ر ئازاد كرن و نها ژی كورد به‌رهه‌ڤن ل گه‌ل شامێ ب رێیا دانوستاندنان هه‌موو پرسێن هه‌ی چاره‌سه‌ر بكه‌ن لێ مخابن به‌رپرسێن سووریێ هه‌تا نها ژی دانپێدان ب مافێن ره‌وا یێن گه‌لێ كورد ل سووریێ نه‌كرینه، رژێما سووریێ دڤێت ب پشته‌ڤانیا روسیا جاره‌كا دی حوكمێ ل هه‌موو سووریێ و رۆژئاڤایێ كوردستانێ بكه‌ت، بێگومان كورد ژی قه‌بوول ناكه‌ن و كوردان دڤێت خوه برێڤه ببه‌ن و گۆت: (هه‌لویستێ خراب یێ روسیا ب چو ره‌نگه‌كێ ناهێته قه‌بوول كرن، كوردان نه‌ڤێت ئاخا سووریێ پارچه بكه‌ن، به‌لكو كوردان دڤێت ل سه‌ر ئاخا خوه ب ره‌نگه‌كێ ئازاد بژین و ئه‌و یه‌ك ژی چو مه‌ترسیا خوه بۆ ئێكپارچه‌یا ئاخا سووریێ نینه، به‌لكو هه‌لویستێ روسیا و شامێ دبیته ئه‌گه‌ر كو ره‌وشا سووریێ پتر ئالۆز ببیت و دڤێت روسیا نه‌بیته ئه‌گه‌رێ ئالۆزیێن زێده‌تر ل سووریێ).
ناڤهاتی ئه‌و یه‌ك ژی دیار كر كو باشترین تشتێ نها كورد بكه‌ن ئه‌وه كو هه‌ر دو جڤاتێن كوردی یێن رۆژئاڤایێ كوردستانێ ب سه‌رپه‌رشتیا ئه‌مریكا جاره‌كا دی ڤه‌گه‌رنه ڤه سه‌ر مێزا دانوستاندنان و هه‌موو پرسێن هه‌ی د ناڤبه‌را خوه دا چاره‌سه‌ر بكه‌ن، هه‌كه كورد بشێن ئێكه‌تیا خوه ل سووریێ ئاڤا بكه‌ن دێ شێن مه‌ترسیێن ل سه‌ر رۆژئاڤا ژی نه‌هێلن، ژ به‌ر هندێ ژی ئێكه‌تیا ناڤمالیا كوردان ل سووریێ و رۆژئاڤایێ كوردستانێ گه‌له‌ك گرنگه، دڤێت هێزێن كوردان وانان ژ دیرۆكا خوه وه‌ربگرن و بزانن كو هه‌تا ئه‌و نه‌بنه ئێك مه‌ترسی ل سه‌ر هه‌موو كوردان دێ هه‌بیت، كورد دشێن ب ئێكه‌تیا خوه روسیا و شامێ ژی نه‌چار بكه‌ن كو دانپێدانێ ب مافێن ره‌وا یێن گه‌لێ كورد ل سووریێ بكه‌ن.
