كوردەك دێ بیتە دادوەرێ خەلاتێن (گۆلدن گلۆب) ل ئەمریكا
زنار تۆڤی:
مەنسور جیهانی، رۆژنامەڤان و رەخنەگرێ كورد، دێ بیتە ئەندام و دادوەرێ گەڕا (83) یا بەلاڤكرنا خەلاتێن (گۆلدن گلۆب) ل وەلاتێ ئەمریكا.
ناڤهاتی، بۆ رۆژناما ئەڤرۆ دیاركر كو تیم گری جێگرێ سەرۆكێ خەلاتێن (گۆلدن گلۆب) ب رەنگەكێ فەرمی ئەز داخوازكریمە وان رێورەسمان و ل سالا 2026 دێ بمە دادوەر ل گۆلدن گلۆب، ئەو خەلات ئێكە ژ گرنگترین روودانێن هونەری یێن ئەمریكا و دەنگدەرێن وی رێورەسمی ژ رەخنەگر و رۆژنامەڤانێن ب ئەزموون د بیاڤێ سینەمایێ دا ل سەرانسەری جیهانێ دا پێكهاتینە، هەروەسا ئەز ئەندامێ فیدراسیۆنا نێڤدەولەتی یا رۆژنامەڤانا مە و ئەڤە ماوێ 15 سالانە پشكداریێ د فەستیڤالێن جیهانی دا دكەم، ل گەل هندێ ژی نووچە و راپۆرت و رەخنەیان دەربارەی فلم و سینەمایێ بۆ میدیایێن هەرێما كوردستانێ و رۆژهەلاتا ناڤین و جیهانی دنڤیسم، هەروەسا پێشتر ل سالێن 2023، 2024 و 2025 ێ، د راپرسییا رەخنەگرێن فەستیڤالا (كان) دا دادوەرێ سایتێ سینەمایا (ئیندی واییر) بوویمە.
هەروەسا گۆت: من راپۆرت و نووچە دەربارەی سینەماكارێن كورد و ئیرانی و دەربارەی فەستیڤالێن گرنگ یێن سینەمایی ل ئاژانس و میدیایێن گرنگێن جیهانی بەلاڤكرینە، هەروەسا ل 15 سالێن بۆری ل فلمە فەستیڤالێن نێڤدەولەتی یێن وەكو (كان، بەرلین، ڤینێز، سان سباستییەن، كارلۆڤی ڤاری، لۆكارنۆ، گۆتبۆرگ، تسالۆنیكی، زۆریخ، پۆسان، ئیدفا، ساندەنس، ترابیكا، مۆنترال، تۆرینتۆ، هات داكس، بیگ سكای، ئەبۆزەبی و ب دەهان فەستیڤال و روودانین دی یێن سینەمایی، من نووچە بۆ میدیایێن كوردستانی و ئیرانی و رۆژهەلاتا ناڤین و چەندین میدیایێن جیهانێ دروستكرینە.
