كورد داخوازا پشكا خوه ژ قه‌رێن ئاژانسێن نێڤده‌وله‌تى و یۆئێنێ دکەن
ئەڤرۆ نیوز:
هه‌ر چه‌نده هێشتا رێككه‌فتنا سیاسی ل سه‌ر نه‌هاتیه كرن، به‌لێ هه‌رێما كوردستانێ هووركارێێن لیسته‌كێ ئاماده كرینه بۆ وان پارێن ژ ئالیێ رێكخراوێن نێڤده‌وله‌تی و ئاژانسێن نه‌ته‌وێن ئێكگرتى ڤه دده‌نه ئیراقێ و دڤێت پشكا كوردستانێ ژى ژێ بهێته دان، نوكه دووڤچووڤ بۆ دهێته كرن و بریاره شانده‌ك بچیته به‌غدا.
ئیراق بوودجه‌ى وه‌كو پێدڤى ناده‌ته هه‌رێما كوردستانێ، بتایبه‌تى ژى مووچێ فه‌رمانبه‌ران، دیسان ئیراق وان پاران ژى ناده‌ته هه‌رێما كوردستانێ، یێن وه‌كو قه‌ر یان وه‌كو هاریكارى ژ ئالیێ رێكخراوێن جڤاكێ نێڤده‌وله‌تى ڤه دده‌نه حكومه‌تا ئیراقێ، هه رچه‌نده وان پاره ب مهر‌جه‌كێ دایه ئیراقێ كو دڤێت ل سه‌ر هه‌موو ئیراقیان دا بهێته دابه‌ش كرن، لێ هه‌تا نوكه ئیراقێ چ پاره ژ وى نه‌دایه هه‌رێما كوردستانێ، بۆ نموونه پارێ تایبه‌ت ب پێشخستنا دامه‌زراوێن ئه‌منى یێن ئیراقێ كو ژ ئالیێ ئه‌مریكا و هه‌ڤپه‌یمانان ڤه هاتینه دان و پارێ تایبه‌ت ب په‌ره‌پێدانا پارێزگه‌هان و ئاڤه‌دانكرنا ئیراقێ ژ ئالیێ رێكخراوێن جیهانى ڤه هاتینه دان بۆ ئیراقێ و چ ژ وان پاران نه‌داینه كوردستانێ.
هه‌ر ژ سالا 2008 هه‌تا 2014 به‌غدا گه‌له‌ك غه‌در ل كوردستانێ كریه، پشكه‌كا زۆر یا بودجێ كوردستانێ ب به‌هانه‌یا بوودجێ سیادى، ژ %17 و بۆ كێمتر ژ %10 ڤرێكریه، هه‌رێما كوردستانێ لژنه‌ك دروست كریه بۆ هه‌لسه‌نگاندنا وى پارێ كوردستانێ و به‌غدا بۆ نه هنارتى، وه‌ك بوودجێن هاریكاریێ و ئاژانسێن نه‌ته‌وێن ئێكگرتى، دڤێت شاندێ هه‌رێما كوردستانێ رێككه‌فتنێ ل گه‌ل به‌غدا بكه‌ت، داكو هه‌رێم به‌هرا خوه ژ وان قه‌ر و هاریكاریان وه‌ربگریت.
