كورد شانازیێ ب كێ ببن؟!
ههكه تورك شانازیێ ب كهمال ئهتاتۆركى ببن، ڤێتنامى ب هۆشیمنى، ئافریكیێن باشۆر ب نیلسۆن ماندیلاى، ئهمركیى ب جۆرج واشتتنۆنى و فهرنسى ب ناپلیۆنى ببن، ئهرێ كورد ههمى شانازیێ ب كێ ببن؟! ناڤێن ل سهرى مه كرینه نموونه، وهك سیمبۆلێن نهتهوهیى یێن وان وهلاتانن، ژبلى سیمبۆلێن رهوشهنبیرى، جڤاكى و ئابوورى … هتد. ب راستى مرۆڤ ههست ب كێمبوونێ دكت، دهمێ دبینت ههتا كو سروود و ئالایێن كوردێن پهرچهكرى و گهلهك پرنسیپێن نیشتیمانى ژى ژ ههڤ جودانه و كهس خوه ب كهسێ نادت كو پچهك داگێڕانێ بۆ یێ دى بكهت دا كو خهلكهك بزانت كوردستانى ژى مینا وهلاتێن دن خودانێن خوه و هندهك سیمبۆلین نهتهوهیى یێن ههڤپشكبن!
ئهڤه دزڤڕته وێ ئهقلیهتا ئهشیرهتگهریێ كو هێشتا مهژیێ مه ژێ پاقژ نهبوویى كو چو ئالى بهرههڤ نینن دانپێدانێ ب شاشیێن خوه یێن دیرۆكى بكهت و مفاى ژ وان شاشیان وهربگرت، دگهل دهمى كۆنترۆلێ ل سهر بكهت و د خزمهتا بهرژهوهندیا گشتى دا راستڤه بكهت. واته دهمێ ئهم نهشێن خوه ب گوهۆڕین و دانپێدانێ ب بۆهریێ خوه یێ تال نهكین، ئهم ههر دێ مینین ئێخسیرێن وێ دیتنا بهرتهنگ، ب بۆهرینا دهمى ئهو كهسانێن نێزیك و ل دهوروبهرێن سهرانێن تهڤگهرێن سیاسى دێ بنه دو روو و راستیێ نهوێرن بێژن و ئهو ژى ل گهل ههمان سیاسهتێ دێ بهردهوامیێ ب كاروانێ كهڤنپهرسیێ دهن و بهرژهوهندیێن خوه پارێزن.
ئهڤ ئێشه تنێ د دۆسییا د سیۆمبۆلێن سیاسى دا دیار نابت، ههتا د سیمبۆلێن رهوشهنبیرى ژى دا كو رهوشهنبیر و ئهدیب و هونهرمهند و رۆژنامهڤان خودانێن وانن، دێ بینین شهڕه ل سهر كهڤنترین شاعرێ نهتهوهیى، پرانیا برایێن سۆران وهسا دبینن كو (بابا تاهرێ ههمهدانیه) و كرمانج وهسا دبینن (مهلایێ باتهیى یه) یان ئهڤه ل دهمهكییه كو ههردو شاعرێن ناڤهیناین و پرانیا شاعر و ئهدیبێن كلاسیك و هندهكێن نوو ژى بهتر ب زمانێ داگیركهران بهرههمێن خوه نڤیساندینه و دنڤیسن.
واته دهمێ ته گهلهك سهركرداتیێن سیاسى ههبن كوردستانا پارچه پارچه كرى ب رێڤه دبن و ههر حزبهك دامهزرینهرێ حزبا خوه ب سیمبۆل و نیشانا نهتهوهیى لقهلهمبدهت، نهدانپێدانێ ب تنێ ب یێن دى نهكن و دبت دامهزرینهر و سهروهرێن حزبێن دى ب خائین و خوهفرۆش ل قهلهم بدت و تاوانباربكت كو ئهو لایهن بووینه ئهگهر كو ههتا نها كوردستان نهبوویه خودان كیان و دهولهت.
ئهز ب خوه حهیرى دمینم، دهمێ ئالیهكێ كوردى د ڤێ فهرتهنهیا سیاسى دا، درووشمێ سهرخوهبوونێ و دهولهتێ بلند دكهت، نزا پشتگهرمیێ ب كێ دكهت؟! ههكه پشتگهرمی ب دوسێ ئالیهكان ژى بت، گهلهكا ب زهحمهته كورد ببنه دهولهت ب هیڤیا فاكتهرێن ناڤخوهییڤه. ههكه پشتگهرمیه ب فاكتهرێن دهرڤه، سوحبهت ئاشكرایه، ههتا نها چو ئالیێن دهولى، فهرمى ژ بلى دژاتیا دهولهتا كوردان چو تشتێ فهرمى د بهرژهوهندیا كوردان دا نهگۆتیه.
راسته د بهرژهوهندیا جڤاكێ نیڤدهولهتى دا نینه كورد نها ببن دهولهت د سینۆرێن سایكس ـ پیكۆى بخهبتن، لێ دهمێ كورد خوهدى پهیامهك ههڤگرتى بن و ئالا و سروود و سیمبوولێن نهتهوهیى ب رهنگهكى بن و خهلكێ كوردستانێ هوشیاریا حهزا دهولهتێ و سهرخوهبوونێ ههبت، گڤاشتنێ ل سهر جڤاكێ دهولى بكن ب رێكا خوهنیشاندان و ب هێزكرنا لۆبیێ كوردى ل سهرانسهرى جیهانێ، ههكه گهلهك دهولهتان نهڤێن كورد ببن خوهدى دهولهت ژى، دبت لێزڤڕینهكێ د سیاسهتا خوه دا بكن، لێ ب ڤى رهنگى دهڤهرا زهر تنێ دانپێدانێ ب بارزانى بكت وهك سیمبۆلێ كوردستانا باشور، دهڤهرا كهسك ب سارى وهك ئالترناتیڤ بۆ بارزانى تنێ دانپێدانێ ب مهلیك مهحموودى بكت و باكورى تنێ ب ئۆجهلانى بكهن و تهڤ بزاڤ و شۆڕشێن كوردى رهتك بكن و ب عهشائیرى ل قههلهم بدهن، رهوشا مه دێ ههر ئهڤه بت و گازیا سهرخوهبوونا كوردستانێ، ژبلى د بهرژهوهندیێن هێزێزین زلهێزین جیهانێ دابت كورد ببن دهولهت وهك دى ژ سینۆرێ مه دهرباز نابت و دێ گۆتارا مه د كیستێ مه مینت.
