كورد فۆبیه‌كا به‌رده‌وام یا رۆژهه‌ڵاتا ناڤین
پرسا كوردى ل رۆژهه‌ڵاتا ناڤین ژ گرنگترین پرسێن نه‌چاره‌سه‌ركرى دهێته هه‌ژمارتن و ده‌وله‌تێن داگیركه‌رێن كوردستانێ ته‌ڤ ل سه‌ر مانا نه‌خشێ سایكس-پیكۆى وه‌كو خوه درژدن و تێكدانا ڤى نه‌خشى ب مه‌ترسى ل سه‌ر ئاسایشا خوه یا نه‌ته‌وى دزانن، ئه‌ڤجا هه‌ر پێنگاڤه‌كا كورد پاڤێن و ببیته سه‌ده‌مێ ب ده‌ستڤه ئینانا هنده‌ك مافێن نه‌ته‌وى شێت و هار دبن و هیستریا وان دگریت نموونه ژى رێككه‌فتنا 11 ئادارا 1970ێ ل نابه‌ینا شۆره‌شا كوردى ب سه‌رۆكاتیا بارزانیێ نه‌مر كو توركیا هه‌موو شیانێن خوه دان خه‌بتاندن بۆ تێكدانا وێ رێككه‌فتنێ، حوكمه‌تا به‌عس نه‌چاركر ژ هه‌موو ماددێن وێ رێككه‌فتنێ پاشگه‌ز ببیت.
نوكه ژى ب هه‌مان عه‌قلیه‌تێ ده‌وله‌تێن داگیركه‌رێن كوردستانێ ڤێ سه‌ره‌ده‌ریێ دگه‌ل پرسا كورد دكه‌ن ل هه‌ر چار پارچێن كوردستانا داگیركرى ب تایبه‌ت ژى هه‌رێما كوردستانێ و رۆژئاڤایێ كوردستانێ كو ئه‌ڤرۆ بوونه هژماره‌كا بسه‌نگ د شه‌رێ دژى تیرۆرێ دا و ده‌وله‌تێن زلهێز راسته‌وخۆ سه‌ره‌ده‌ریێ دگه‌ل پێشه‌نگێن كوردان دكه‌ن كو ئه‌ڤه دیارده‌ك نوویه و داگیركه‌رێن كوردستانێ نكارن ڤێ گوهۆڕینێ بپه‌ژرینن ب تایبه‌ت پشتى ئه‌مریكا بریارا ئێكسه‌ر پر چه‌كرنا هێزێن پێشمه‌رگه‌ى و یه‌په‌گێ داى.
گلۆبالیزمێ و شه‌رێ تیرۆرێ نه‌خشێ په‌یوه‌ندیان ل جیهانێ و ده‌ڤه‌رێ ب ره‌نگه‌ك نه‌هزركرى گوهاڕت و د به‌رژه‌وه‌ندیا گه‌لێن بنده‌ست و بێ ده‌وله‌ت دا شكه‌ست، ئێدى پیرۆزیا سنۆرێن ده‌وله‌تان نه‌ما ب تایبه‌ت ل رۆژهه‌ڵاتا ناڤین و ئه‌ڤێ چه‌ندێ رێ خوه‌شك كر كو ئه‌و چه‌مبه‌را پۆڵاینا كوردستان د ناڤ خوه دا بێ پشت و هه‌ڤال هێڵاى ب هه‌ڕفیت و كورد و بزاڤا كوردى پشته‌ڤان و هه‌ڤال به‌ند په‌یدا ببن، ئه‌ڤێ چه‌ندێ ژى داگیركه‌رێن كوردستانێ حێچ كرنه چنكو ئه‌و ل وێ باوه‌رێ نه‌بوون كوردان شیانێن شكاندنا وێ چه‌مبه‌رێ هه‌بیت.
بلندبوونا ئاستێ كێشا كوردى ل جیهانێ و به‌ر ب دانپێنه‌كا ناڤ نه‌ته‌وى ب ده‌وله‌تا كوردستانێ ڤه دچیت، حێبه‌تى نه‌بن ده‌ما هوون دبینن ته‌ڤ سه‌رۆك و رێبه‌رێن پارتێن سیاسى ل رۆژهه‌ڵاتێ و ب تایبه‌ت ئه‌ردۆغان و چه‌پ و راستێن توركى ته‌ڤشۆ مه‌ڤشۆ بئاخڤن و هه‌رچى په‌یڤێن دوورى ره‌وشتى و ئه‌تیكێتێن دیبلۆماسى ژ ده‌ڤى بپه‌شن!!
ب راستى ژى ئه‌ردۆغان و یێن ل بازنا ئه‌ردۆغانى دزڤڕن یێن بووینه پێترانكێن هه‌موو جیهانێ ب تایبه‌ت كاریكاتۆریست و ساتیرستان (ساخر، لێبۆك) و رۆژ ناچن ئه‌گه‌ر ب عه‌قلێ ئه‌ردۆغانى و سه‌ره‌ده‌ریێن وى تڕانه پێ نه‌هێنه كرن و رۆژنامه ب ئه‌ردۆغانى یێن خنێ بووین!! هه‌تكبه‌ریێن ئه‌ردۆغانى به‌رامبه‌رى رۆژنامه‌ڤان و ساتیرستان هه‌وجه‌ى چ نموونا ناكه‌ت، لێ یا ژهه‌موویێ هه‌تكبه‌رتر ده‌ما ساتیرستێ بناڤ و ده‌نگێ ئه‌لمان دیته‌ر هاله‌رفۆرده‌ن ل سه‌ر گرتن و شه‌رێ ئه‌ردۆغانى ل دژى كوردان و هێرشێن وى ل سه‌ر ئه‌لمانیا گۆتى: ئه‌لمانیا نه كوردستانه!! ب ره‌نگه‌ك دن ئه‌وا به‌رى نوكه بۆ داگیركه‌رێن كوردستانێ دچوو سه‌رى ئه‌ڤرۆ ب سایا گلۆبالیزم و شه‌رێ تیرۆرێ ناچیته سه‌رى، كورد شیانه جهێ خوه ل پێشیا سه‌نگه‌رێن شه‌رێ تیرۆرێ ببنن و سه‌ركه‌فتنێن مه‌زن تۆمار بكه‌ن، هه‌م كوردستانێ و هه‌م جیهانێ ژ شه‌رانگێزیا تیرۆرێ و پشته‌ڤانێن وێ بپارێزن.
بۆ ڤه‌ڕه‌ڤه‌ندنا فۆبیا كوردى و هێلانا نه‌خشێ سایكس-پیكۆى داگیركه‌رێن كوردستانێ هه‌ر رێكه‌كێ دگرن و یا ژ هه‌موویێ به‌رچاڤتر دانانا دیوارى ل نابه‌ینا رۆژئاڤایێ كوردستانێ و كوردستانا باكور و بریارا دانانا دیواره‌كى د نابه‌ینا رۆژهه‌ڵات و باكورێ كوردستانێ دا و توركیا ئاڤاكرنا وى دیوارى ب ستۆیێ خوه‌ڤه دگریت و بۆ باشۆر و باكورى ژى هه‌وجه ناكه‌ت چنكو رێزه چیایێن بلند به‌ربه‌ستن.
ل به‌ر رۆناهیا فۆبیا داگیركه‌رێن كوردستانێ ژ كوردان هه‌ى ما ده‌م نه‌هاتیه ئه‌مژى په‌یماننامه‌كا نیشتمانى ل دژى داگیركه‌ران مۆهر بكه‌ین و دووماهیێ ب ڤى په‌رته‌وازه‌یا نه‌ته‌وى بینین و هه‌موو شیانێن هه‌ین بده‌ینه خه‌بتاندن بۆ نه‌هێلانا نه‌خشێ سایكس-پیكۆى و ئێك كرنا ناڤمالا كوردى؟
