كورد ل ئه‌مریكا و ئورۆپا ل دژی گه‌فێن ئیرانێ ده‌ست ب خوه‌نیشادانان كرن
ئه‌ڤرۆ، هۆشه‌نگ تاجر:
كورد ل ئه‌مریكا و ئورۆپا ل هه‌مبه‌ر گه‌فێن ئیرانێ یێن ل دژی پارتێن رۆژهه‌لاتێ كوردستانێ ده‌ست ب خوه‌نیشادانان كرن و داخواز ژ نه‌ته‌وه‌یێن ئێكگرتی ژی كرن كو ل هه‌مبه‌ر گه‌فێن ئیرانێ بێده‌نگ نه‌بیت، چونكو ئیرانێ ده‌ست ب پیلانه‌كا مه‌ترسیدار ل دژی پارتێن رۆژهه‌لاتێ كوردستانێ كریه.
دیاكو خه‌یات چالاكڤانێن سیاسی یێ رۆژهه‌لاتێ كوردستانێ ل ئورۆپا بۆ ئه‌ڤر دیار كر كو وان وه‌كو كۆمه‌ك ژ چالاكڤانێن و كوردێن رۆژهه‌لاتێ كوردستانێ ل ئورۆپا و ئه‌مریكا ده‌ست ب خوه‌نیشادان كرینه و ل پرانیا وه‌لاتێن ئێكه‌تیا ئورۆپا وه‌لاتیان ل دژی گه‌فێن ئیرانێ یێن ل هه‌مبه‌ر پارتێن رۆژهه‌لاتێ كوردستانێ خوه‌نیشادان كرن و گۆت: (بێگومان ژ بلی كوردێن رۆژهه‌لاتێ كوردستانێ هژماره‌ك ژ كوردێن پارچێن دی یێن كوردستانێ ژی د خوه‌نیشادان دا پشكدار بوون و داخواز ژ نه‌ته‌وێن ئێكگرتی و وه‌لاتێن ئێكه‌تیا ئورۆپا هاته كرن كو ل هه‌مبه‌ر گه‌فێن ئیرانێ بێده‌نگ نه‌بن، چونكو ئیرانێ ده‌ست ب پیلانه‌كا نوو ل دژی پارتێن رۆژهه‌لاتێ كوردستانێ كریه و ئیرانێ دڤێت ب رێیا گه‌فان و تۆپبارانكرنێ و تیرۆركرنێ پارتێن رۆژهه‌لاتێ كوردستانێ نه‌چار بكه‌ت كو ژ ئاخا هه‌رێما كوردستانی ده‌ركه‌ڤن، ئه‌و یه‌ك ژی بێگومان دێ كاریگه‌ریه‌كا خوه یا مه‌زن ل پاشه‌رۆژا رۆژهه‌لاتێ كوردستانێ كه‌ت، ژ به‌ر هندێ ژی مه ب رێیا ڤان خوه‌نیشادان ل ئورۆپا و ئه‌مریكا خواست كو وه‌لاتێن جیهانێ ب گشتی ژ پیلانێن ئیرانێ د ئاگه‌هدار بن).
ناڤهاتی ئه‌و یه‌ك ژی دیار كر كو مه به‌ری نها ژی گه‌له‌ك جاران دیار كریه كو دڤێت پارتێن رۆژهه‌لاتێ كوردستانێ هه‌موو ئاریشێن د ناڤبه‌را خوه دا چاره‌سه‌ر بكه‌ن و ئێكه‌تیا نه‌ته‌وه‌یی ل رۆژهه‌لاتێ كوردستانێ دروست بكه‌ن، مخابن ژ به‌ر هنده‌ك ئاریشان هه‌تا نها ژی ئه‌و یه‌ك نه‌هاتیه كرن، نها دوژمنێ گه‌لێ كوردستانێ ئانكۆ ده‌وله‌تا ئیرانێ ب هه‌موو ره‌نگه‌كێ كار دكه‌ت دا پارتێن رۆژهه‌لاتێ كوردستانێ ژ ئاخا هه‌رێما كوردستانێ ده‌رخینیت، بێگومان ئاشكرایه هه‌كه ئیران تشته‌كێ وه‌سا بكه‌ت دێ كاریگه‌ریه‌كا خوه یا گه‌له‌ك خراب ل پاشه‌رۆژا رۆژهه‌لاتێ كوردستانێ كه‌ت، دڤێت پارتێن رۆژهه‌لاتێ كوردستانێ پێكڤه ده‌ست ب قۆناغه‌كا نوو بكه‌ن و د ئاستێ نێڤده‌وله‌تی دا ده‌ست ب بزاڤێن مه‌زن یێن دبلۆماسی بكه‌ن و گۆت: (د ره‌وشا نها دا پشته‌ڤانیا وه‌لاتێن ئێكه‌تیا ئورۆپا و رێكخراوێن دی یێن مافێن مرۆڤی گه‌له‌ك گرنگه، دڤێت پارتێن رۆژهه‌لاتێ كوردستانێ ده‌نگێ خوه بگه‌هیننه هه‌موو جیهانێ و راستیا نها یا ل رۆژهه‌لاتێ كوردستانێ و گه‌فێن ئیرانێ بۆ رایا گشتی ئاشكرا بكه‌ن و داخوازا پشته‌ڤانیێ بكه‌ن، لێ مخابن هه‌لوه‌ستێ پارتێن رۆژهه‌لاتێ كوردستانێ وه‌كو پێدڤی نینه و ئه‌و یه‌ك ژی مه‌ترسیه‌كا خوه یا مه‌زن بۆ پاشه‌رۆژا رۆژهه‌لاتێ كوردستانێ هه‌یه).
هه‌ژی ئاماژه‌پێدانێ یه كو ده‌مه‌كه به‌رپرسێن سیاسی و سه‌ربازی یێن ئیرانێ گه‌فا هندێ ل پارتێن رۆژهه‌لاتێ كوردستانێ دكه‌ن كو دڤێت ب ته‌مامی ژ ئاخا ئیراقێ و هه‌رێما كوردستانێ ده‌ركه‌ڤن و دوهی ژی فه‌رمانداره‌كێ دی یێ سه‌ربازی یێ ئیرانێ راگه‌هاند كو ئه‌و دشێن هه‌موو باره‌گایێن پارتێن رۆژهه‌لاتێ كوردستانێ ل ئاخا هه‌رێما كوردستانێ ژناڤ ببه‌ن و گۆت: (گرۆپێن تیرۆرستی ل سه‌ر سنۆرێ ئیرانێ ئاریشێن گه‌له‌ك مه‌زن دروست دكه‌ن، ده‌م یێ هاتی كو وان گرۆپان د ناڤ ئاخا هه‌رێما كوردستانێ دا ژناڤ ببه‌ین، ئیرانێ چه‌كێن گه‌له‌ك پێشكه‌فتی هه‌نه و دشێت ئێرشی وان گرۆپان بكه‌ت، چونكو گرۆپێن تیرۆرستی ژ ئاخا ئیراقێ و هه‌رێما كوردستانێ ده‌ربازی ئیرانێ دبن و ئاریشان بۆ ئیرانێ دروست دكه‌ن).
