كورد ل قووناغا پشتی هەلبژارتنان
غیاس خـالد زێباری
راستە هەر پارتیەكا كوردستانی ب هەلبژارتنێن جڤاتا نوونەرێن ئیراقێ كارنامە و پرۆژەیێن خوە یێن تایبەت هەبوونە و ل هەوا بانگەها هەلبژارتنا گەهاندنە خەلكی، لێ بەراورد ل گەل هەلبژارتنێن پەرلەمانێ كوردستانێ د نەرمتر بوون. ئەوا گرنگ و جوان و ئەرێنی ئەو بوو ئەڤ هەلبژارتنە ب ئازادی و كێمترین ئاریشە ب داوی هاتن و هەر پارتیەكێ ل دووڤ ئاستێ خوە دەنگ و كورسیێن خوە ب دەست ئینان، یا ل هەمیێ گرنگتر و پێدڤیتر ئەوە پارتیێن كوردستانی ئەوێن گەهشتیە جڤاتا نوونەرێن ئیراقێ ل گەرا داهاتی دا هەڤڕكی و ناكۆكیێن دناڤبەرا خوەدا ڤەدەر بكەن و بۆ داهاتی ل بەغدا پرسێن نشتیمانی و نەتەوەیی و دەستووری بكەنە كارناما خوە یا بەرهای و پێكڤە كار بكەن بۆ بهێزكرنا پێگەهێ كوردان ل سازیێن دەولەتا ئیراقێ ب تایبەت حوكمەتا داهاتی یا ئیراقێ و كاركرن ژبووی ڤەگەراندنا ئیراقێ بۆ بنەمایێ راست و درۆستێ فیدرالی ئەوێن ل دەستوورێ ئیراقێ هاتینە دیاركرن و دانانا سنوورەكی بۆ وان بنپێكریێن دەستووری دژی هەرێما كوردستانێ ل بیست ساڵێن داهاتی، مینا ماددێ سەد و چل و دادگەها فیدرالی و جڤاتا فیدرال و ڤەگارادنا شایستێن كوردستانیا دناڤ حوكمەتا ئیراقێ، چونكی ل ڤان ساڵێن دەربازبووی چەندین پلە ل سازیێن مەدەنی و لەشكری و ئێمناهی كۆ مافێن خەلكێ كوردستانێ لدەست ئینایەنە دەر، هەر وەسا نەهێلانا دیاردا بكارئینانا بڕینا مۆچە و بوودجێ كوردستانێ وەك كالایەكێ سیاسی و هەر دەمی ڤیا بێ ببڕن . هەر وەكی ل چەند سالایە بكار ئینای و كاریگەریێن نەرێنی ل سەر كوردستانێ كری . ژلایەكێ دیتر هندەك ئالیێن سیاسی ل ئیراقێ تۆڤێ شۆفینیەتێ دژی هەرێما كوردستانێ دناڤ ئیراقێ چاندییە و پێگەهێ خوە پێ بهێزكریە، ئێكگرتن و پێكڤە كاركرنا ئالیێن سیاسی یێن كوردستانێ ل حوكمەتا داهاتی یا ئیراقێ ب كارنامەیكا نشتیمانی، پێدڤیەكا زۆرا فەرا كورد و كوردستانێ یە و دێ بیتە ئەگەرێ ڤەگەراندنا دەولەت و حوكمەتا ئیراقێ بۆ ئاراستەیێ دەستووری و نەهێلانا جوداكاریێن ئەتنی و ئایینی و نەتەوەیی ل ئیراقێ و خەلكێ كوردستانێ، چونكی پێگەهێ كوردان ب ئێكگرتنێ دێ بهێزتربیت و زۆربەریا مافێن دەستووری یێن خەلكێ كوردستانێ دێ هێنە ڤەگەراندن و ئیدی حوكمەتا ئیراقێ نەشێت بەردەوامیێ بدەتە وان پنپێكرنێن دەستووری و قانوونی دژی كوردستانێ و ئەڤ چەندە د بەرژەوەندیا ئیراقێ ژی دایە و ئارامی و سەقامگیری و ئاڤەدانیا كوردستانێ دێ ل سەر هەمی باژارێن ئیراقێ رەنگڤەدەتەڤە.
