كورد و ده‌وله‌تا سه‌فه‌وى (ئیران ـ شیعه)
به‌درخان زاویته‌ى
هه‌ر پشتى سه‌رهلدانا بوهارا سالا ١٩٩١ و ل دویڤ دا ئه‌نجامدانا ئَكه‌م هه‌لبژارتن ل هه‌رێما كوردستانێ ل مه‌ها پێنچى سالا ١٩٩٢ و دامه‌زراندنا كابینه‌یا ئێكێ حوكمه‌تا هه‌رێمێ و دانا په‌رله‌مانێ سه‌ركردایه‌تیا هه‌رێمێ به‌رده‌وام كاركریه و ته‌كه‌زكریه كو هه‌رێما كوردستانێ نابیته هه‌ڕه‌شه و جهێ مایتێكرنێ د كاروبارێن وه‌لاتیێن هه‌رێمى دا، تایبه‌ت ئیرانێ به‌لێ دیاره ئیران تا نوكه نه‌شیاییه ژ هنده‌ك گرێكین مێژوویى خوه رزگار بكه‌ت و وه‌ك دوژمن ته‌ماشه‌ى كوردستانێ دكه‌ت، له‌ورا هه‌ر رویدانه‌كا د ناڤبه‌را كوردان و ئیرانا شیعى رویده‌ت گرنگه ڤه‌گه‌رینه ره‌هندێن مێژوویى بۆ دروست تێگه‌هشتنا ئه‌گه‌ران و گرنگ بزانین كو:
* ل چه‌رخێ ١٢ زاینى سه‌لاحه‌دین ئه‌یۆبى باكورێ ئه‌فریقیا و شام و گه‌له‌ك ده‌ڤه‌رێن دى ژ شیعه‌یان پاقژكرن.
* د شه‌ڕێ چالدیران دا ل سالا ١٥١٤ میرگه‌هێن كوردان رۆله‌كێ مه‌زن هه‌بوو بۆ راگرتنا سه‌فه‌وییان و رێ نه‌دا ژ سنوورێن نوكه یێن ئیرانێ ده‌رباس ببن و بگه‌هنه ئه‌نادۆلێ.
* ل ده‌مێ سه‌رهلدانا شێخ عوبه‌یدللایێ نه‌هرى دژى ئیرانا قاچارى ل سالا ١٨٨٠ شێخى جیهاد راگه‌هاند دژى ئیران ـ شیعه‌یان ل مهابادێ.
* ل سالێن ١٩٧٩ـ١٩٨١ ل ده‌مێ شۆرشا كوردستانا ئیرانێ ب سه‌ركێشیا (عه‌بدولره‌حمان قاسملۆ و عزه‌ددین حسێنی) ل وى ده‌مى خومه‌ینى هێرشى كوردستانا ئیرانێ كر و گۆت ناهێلم ئیسرائیلا دویێ دروست ببیت).
ئه‌ڤه زێده‌بارى رویدانێن٣١ ئاب سالا ١٩٩٦ كو ئیرانێ هه‌ولدا ب رێیا ئۆپوزسیۆنا ئیراقێ و چه‌ند لایه‌نێن ناڤخوه و ده‌ولى كۆده‌تایه‌كێ ل ئیراقێ بكه‌ن و پارتى ژ هه‌رێمێ ده‌ربێخن و كۆنترۆلا هه‌مى ئیراقێ بكه‌ن و ل دویڤ دا پیلانا ئیرانێ ئه‌وبوو هه‌مى سنوورێن د ناڤبه‌را خوه و توركیا تا ده‌ریا سپى بگریت، به‌لێ ئه‌ڤێ سه‌رنه‌گرت و پارتى شیا هه‌مى هه‌ڤكێشه‌یان بۆ به‌رژه‌وه‌ندیا كوردستانێ بگوهۆڕیت.
دیسا ل بیرا هه‌مى كوردانه هه‌لوه‌ستێن دوژمنكارانه یێن ئیرانێ ل دژى ریفراندۆمێ و ئه‌و خیانه‌تا چێبووى و ل دویڤ دا هه‌ولدا ب شه‌ڕ هه‌رێمێ ژ ناڤببه‌ت، به‌لێ دیسا پێشمه‌رگه‌ى ئه‌ڤ پیلانه ژى ژ ناڤبر.
دڤێت باش بزانین ئیرانێ ئه‌ڤ رویدانێن مێژوویێ ژبیر نه‌كرینه و ئه‌ڤا رویده‌ت بۆ لاوازكرن و راگرتنا پێشكه‌فتنا هه‌ولێرێ و ئابۆرێ كوردستانێ یه و ئه‌ڤا رویده‌ت تایبه‌ت دژى (پارتى و مالا بارزانه)، چونكى بووینه رێگر به‌رامبه‌ر پیلانێن ئیرانێ و پرۆژه‌یێ وان یێ هیلالێ شیعى! و بۆ كوردستانه‌كا سه‌ربه‌خوه كاردكه‌ن!.
به‌لێ به‌رده‌وام ئه‌مریكا به‌رامبه‌ر دۆزا كوردى رۆله‌كێ خراب و مه‌ترسیدار هه‌بوویه وه‌كى ئه‌وا د ناڤبه‌را سالا ١٩٧٢ و ١٩٧٥ رویداى. ل وى ده‌مى به‌رده‌وام دگۆت مه‌ئیراق هه‌مى یاكونترۆل كرى بتنێ كوردستان نه‌بیت، ئه‌مریكا ل وى ده‌مى و ب رێیا خیانه‌تا جه‌زائیر شۆرشا ئیلۆنێ و ده‌ستكه‌فتێن رێكه‌فتنا ١١ ئادارێ ژناڤبرن و سه‌دام حسین ئینا سه‌ر حوكمى و كۆنترۆلا ئیراقێ كر.
دروست وه‌كى نوكه كو ئیراق هه‌مى كه‌فتیه ل ژێر كۆنترۆلا ئیرانێ بتنێ هه‌ولێر و دهۆك نه‌بن، له‌ورا دبێژین ئه‌رێ مێژوو دێ دوباره بیته‌ڤه هه‌مبه‌رى كوردستانێ و ئه‌مریكا هه‌مان سیاسه‌تا به‌رێ بكه‌ت و پشتدده‌ته هه‌رێمێ و رۆژئاڤاى كوردستانێ.
یان ئه‌مریكا ڤێ جارێ به‌روڤاژى خیانه‌تا جه‌زائیر و ریفراندۆمێ دێ هه‌لوه‌سته‌كێ دى وه‌رگریت و پشت ناده‌ته كوردان!
به‌لێ خۆیایه كارڤه‌دانێن هه‌رێمى و نیڤده‌ولى دژى مۆشه‌ك بارانكرنا هه‌ولێرێ و شه‌هیدكرنا خه‌لكێ سڤیل هێز و سه‌نگا هه‌ولێرێ دیاركر و بارودۆخه‌كێ نوى ئینایه پێش و هه‌رێمێ و دۆزا كوردى دێ ده‌ربازى قۆناغه‌كا دى كه‌ت و پێشبینیا فشار و سزایین مه‌زن دئێته‌كرن دژى ئیرانێ و گرۆپێن چه‌كدار یێن گرێداى ڤى وه‌لاتی.
