كورد و چاره‌نڤیسه‌كێ به‌رزه‌ د ده‌ڤه‌رێ دا!

ل ڤێره‌ ل مێژوویا كوردى نازڤرین و به‌حس ناكه‌ین كا چ كاره‌سات و ده‌رده‌سه‌رى دیتینه‌ و تا چ راده‌ گه‌هشتیه‌ لێوارێ ژ ناڤچوونێ!! به‌لێ ئه‌ڤ كاودانێن نوكه‌ كورد تێدا ده‌رباز دبن گه‌له‌گ مه‌ترسیدارترن ژ وان كاودانێن مێژوویێ یێن ملله‌تێ كورد و بزاڤا رزگاریخوازا كوردى تێدا ده‌رباز بووی!! چونكى چ جارا هندى نوكه‌ لایه‌نێن كوردى ژ ئێك دوور نه‌كه‌فتینه‌ و دژى ئێك نه‌ راوستیاینه‌ هه‌ر ژ لایێ سیاسی ڤه‌ و هه‌ر ژ لایێ سه‌ربازى و به‌رژه‌وه‌ندی و په‌یوه‌ندیان ڤه‌ و گه‌هشتیه‌ وێ راده‌یێ كو پێشبینی دئێته‌ كرن شه‌رێ كورد و كوردان دووباره‌ روو بده‌ت، به‌لێ ڤێ جارێ ئه‌ڤ شه‌ره‌ دێ سنووران ده‌رباز كه‌ت!!
ئه‌گه‌ر ئه‌م ب هوورى ته‌ماشه‌ی كاودانێن نوكه‌ ده‌ڤه‌ر تێدا دبۆریت بكه‌ین، دێ دیار بیت كو مه‌ترسیێن مه‌زن ل پێشیا دۆزا كوردینه‌ و دوژمن شیاینه‌ دوبه‌ره‌كیێ و سێ به‌ره‌كیێ بێخنه‌ ناڤمالا كوردى و كوردستان ل سه‌ر سنوورێن ده‌ستهه‌لاتێن حزبان هاتیه‌ دابه‌شكرن!! و هه‌ر حزبه‌كێ دیتنه‌ك و بۆچوونه‌ك هه‌یه‌ بۆ پاشه‌رۆژا دۆزا كوردى و ناكۆكیێن مه‌زن كه‌فتینه‌ د ناڤبه‌را وان دا نه‌ك ب تنێ بۆ دیتنا وان بۆ چاره‌كرنا كێشا و پاشه‌رۆژا كوردستانێ، به‌لكو ل سه‌ر دابه‌شكرنا پۆست و ده‌ستهه‌لات و پارێ كوردستانێ!! تا خه‌لك گه‌هشتیه‌ وێ قه‌ناعه‌تێ كو دۆزا كوردى د ناڤبه‌را حزبان دا به‌رزه‌ بوویه‌ و باوه‌رى ب هیچ به‌رنامه‌كى و درووشمه‌كى نه‌مایه‌ و ترسه‌كا مه‌زن ژ پاشه‌رۆژێ بۆ دروست بوویه‌!!
ب گشتى گه‌له‌ك سیناریو د ده‌ڤه‌رێ دا دئێنه‌ چاڤه‌رێكرن، به‌لێ زۆربه‌یا وان ئه‌گه‌ر ب هوورى ته‌ماشه‌كه‌ین نه‌ د به‌رژه‌وه‌ندیا دۆزا كوردی دانه‌ و هنده‌ك سیناریو ژى ب خوه‌ دژى كوردانه‌ ب هاریكاریا هنده‌ك لایه‌نێن كوردى!! چاڤه‌رێ دئێته‌ كرن شه‌ر د ناڤبه‌را هوزێن عه‌ره‌بێن سونه‌ دا روو بده‌ت پشتى كاودانێن په‌رله‌مانێ عیراقێ و ئه‌ڤه‌ هه‌مى پیلانێن ئیرانێ نه‌ دژى سونا و كوردا و ئه‌مریكا بۆ گیروكرنا رزگاركرنا مووسل!! و بۆ شه‌رێ مووسل ئه‌گه‌ر حه‌شدا شیعى به‌شدار نه‌بیت ئه‌گه‌ره‌كێ مه‌زنه‌ ئیران كارتا په‌كه‌كێ بكار بینیت بۆ دروستكرن و خولقاندنا كێشا و رێگێریكرنێ ژ پرسا ریفراندۆمێ و سه‌ربخۆیا كوردستانێ!!.
كاودانێن توركیا ده‌رئه‌نجامێن مه‌ترسیدار ژ دئێته‌ پێشبینیكرن تایبه‌ت پشتى ژناڤبرنا هه‌ولا كوداتایا سه‌ربازى و نێزیكبوونا توركیا و رۆسیا ژ لایه‌كی ڤه‌ و ژلایه‌كێ دى ڤه‌ نێزیكبوونا توركیا و ئیسرائیلێ كو خواندن خراب بۆ ڤان نێزیكبوونا دئێته‌ كرن!! چ وێرانكرنا ده‌ڤه‌رێن كوردى ل توركیا دۆزا كوردى ب تمامى ل وى وه‌لاتى پاشڤه‌ چوویه‌ و ب سه‌ناهى كێشه‌ ب رێكێن ئاشتیانه‌ چاره‌ نابیت، تایبه‌ت كو كورد نوونه‌رێن خوه‌ یێن راسته‌قینه‌ نینن، نه‌كو په‌كه‌كه‌ و هه‌ده‌په‌ و لایه‌نێن دى یێن كوردینه‌ كو ب ڤى رۆلى رابن!!
هه‌مى شرۆڤه‌ و بۆچوون بۆ وێ چه‌ندێ دچن كو ئه‌گه‌ر دونالد ترامپ ببیته‌ سه‌رۆكێ ئه‌مریكا كێشه‌ و گرفتێن مه‌زن د ده‌ڤه‌رێ دا سه‌ر هلده‌ن و دووباره‌ دۆزا كوردى ببیته‌ قوربانى به‌رژه‌وه‌ندیێن وه‌لاتێن زلهێز!!.
ئه‌ڤ بارودوخێ نوكه‌ كورد ل هه‌ر چار پارچێن كوردستانێ ب گشتى و هه‌رێما كوردستانێ ب تایبه‌تى تێدا دبۆریت نه‌تیجێ خواندنێن خه‌له‌ته‌ بۆ كاودانان و ئاراسته‌كرنا سیاسه‌تێ ژ نه‌ته‌وه‌یى بۆ حزبیكرنا كێشان! ئه‌ڤه‌ زێده‌بارى پیلانێن ده‌ره‌كى!! و ده‌رئه‌نجام بۆ ئه‌ڤی بارودوخێ كو نوكه‌ ملله‌تێ كورد تێدا ده‌رباز دبیت!! كو فه‌ره‌ نوكه‌ ملله‌تێ كورد ببیته‌ خودان بریار نه‌كو چ حزب و په‌رله‌مان و چاره‌نڤیسێ خوه‌ ب به‌رژه‌وه‌ندیێن چ حزبان ڤه‌ نه‌ گرێده‌ت ئه‌گه‌ر نه‌ كوردستان دابه‌شى ده‌ستهه‌لاتا چه‌ند حزبان بیت و پاشى ب سه‌ناهى ژناڤ دچن، له‌ورا فه‌ره‌ خه‌لك رێگێریێ ل ڤان پیلانا و مه‌ترسیا بگریت!!.

کۆمێنتا تە